¿Kuali yetok maj se choka?

¿Kemansa tionmokokouani? Xa niman tionpajtik uan amo tikonelnamikiok. Sayoj ke, tayokol tein se kimachilia keman aksa momikilia amo ijkon. Tapajtijkej Alan Wolfelt, itech iamaix Healing a Spouse’s Grieving Heart (Yolseuilis keman momikilia se inamik), kimelaua: “Tayokol tein se kimachilia keman aksa momikilia ouij se kixikos. [...] Sayoj ke ijkon kemej panouaj tonalmej uan ika ininnepaleuil oksekin, tayokol yolik kaxantias”.

Maj tikitakan toni kichiuak taixyekankej Abrahán keman momikilij inamik Sara. Biblia kijtoua ke Abrahán semi moyolkokoj uan tayokolchokak, nejon kinextia ke amo niman panok tein kimachiliaya.a Jacob no ijkon kipanok, kichiujkej maj kineltoka ke se koujtajtapial kikuajka ikonetsin José. Yejua ika moyolkokojtoya “miak tonalmej” uan nion ichankauan ueliaj kiyolseuiayaj. Xiujmej satepan kisentokaya kiyolkokouaya maj José momikiliani (Génesis 23:2; 37:34, 35; 42:36; 45:28).

Axkan, no ijkon kinpanoua miakej keman momikilia se ininchankauj oso se akin kuali iuan mouikayaj. Xiontanemili itech nejin tein sekin kipanouanij.

• “Nonamik, Robert, momikilij tonal 9 metsti julio xiuit 2008 keman panok tein amo mochiaya. Nejon kualkan katka kemej okseki tonalmej, ijkon kemej nochipa, satepan keman tialmasalojkej timonauatijkej uan nechpitsoj oso nechtenamik, nechnauaj uan nechiluij ‘nimitstasojta’. Panokya chikuasen xiuit uan kisentoka nechyolkokoua maj Rob momikiliani. Amo nikmati ox se tonal amo nechyolkokosok” (Gail, akin kipia 60 xiujmej).

• “Maski panokya dieciocho xiujmej ke momikilij nonamik, niksentoka niktemoua uan nechyolkokoua maj amo nouan yeto. Keman nikita teisa tein kualtsin, nikelnamiki uan maski amo nikneki niknemilia keniuj yolpakiskia komo kiitaskia nejon” (Etienne, akin kipia 84 xiujmej).

Taixejekol maj se tayokoxto miak tonalmej keman momikilia se akin tiktasojtaj. Sejse, taman kemej kinextia tekokojkayot tein kimachilia. Yejua ika amo taixejekol maj se kijto ke amo kuali yetok kemej aksa kinextia itayokol. Amo no moneki maj tiktatikan tein tikmachiliaj porin tiknemiliaj ke amo kuali yetok. Sayoj ke, ¿toni uelis techpaleuis maj tikxikokan tayokol?