¿Tikonmatia?

Ne uejkauj, ¿toni monekia kichiuas aksa akin kinekiskia yas itech barco?

ITECH itonaluan Pablo, amo onkayaj barcos maj teuikanij okseko. Komo aksa kinekia yas kansaika, monekia tajtanis ox moajsia se barco tein kiuikaskia tanamak kampa ika yejua kinekia yas uan ox kinekia kiuikas (Hech. 21:2, 3). Maski barco amo ajsiskia kampa yejua yaya, ueliskia ompa yas uan kampa moketsaskia, kitemoskia okse tein yaskia ompakauin kampa yejua yaya (Hech. 27:1-6).

Amo itech nochi xiuit barcos ueliaj kinnejnemiltiayaj uan amo no ixyetoya se hora keman kisayaj. Akin kinejnemiltiayaj barcos maski takistoya kemansa amo kisayaj porin kineltokayaj seki taman, kemej neskayot, komo kiitayaj se tiltik totot tsajtsitok ipanian barco oso komo kiitayaj atentenoj se barco tein uejueliuik. Kinejnemiltiayaj barco sayoj komo ejekat yaya kampa ika yaskiaj, nejon kinpaleuiaya maj kiojtokaltikan. Yejua ika, keman akin kinekia yas kansaika kiajsia se barco tein ueliskia kiuikas, monekia yas kampa kisaskia uan mochias hasta keman tanauatiskiaj ke kisaskiaya.

Tajkuilojkej Lionel Casson kijtoua: “Ompa Roma kipaleuiayaj akin kinekia yas kansaika maj niman kiajsini se barco, ijkon amo monekia kitemojtinemis. Barcos ejkoyaj atentenoj kampa tamia ueyiat Tíber. Ompakauin moajsia xolal Ostia kampa moajsiaj miak oficinas. Nejon oficinas katka ininaxka akin kipiayaj barcos: kampa ajsiaj barcos ompa Narbona [tein axkan Francia], kampa ajsiaj barcos ompa Cartago [tein axkan Túnez], [...] uan oksekiok. Akin kinekia yas kansaika sayoj monekia yas oficina uan tajtanis ox moajsia se barco tein yaskia kampa ika yejua yaya”.

Akin yayaj itech barco niman ajsiaj kampa kinekiaj yaskej, sayoj ke katka tamouilil. Keman tatitanil Pablo tanojnotsato itech okseki altepemej, miakpa barco kampa yaya pankalakik itech ueyiat (2 Cor. 11:25).