Tein tajtanij akin taixtajtoltiaj

Keman Satanás kiluij Eva ke komo kikuaya koujtakilot amo momikiliskia, ¿kiluijtoya ke taltikpaknenkej kipia teisa tein kisentoka yoltok satepan ke momikilia?

Nesi amo. Satanás amo kiluij Eva ke komo kikuaya takilot momikiliskia uan kisentokaskia nemis kampa nemij espíritus. Itechkopa kouat kiluij ke nochipa yoltoskia, ke okachi kuali nemiskia nikan taltikpak uan ke amo monekia maj Dios kiixyekana (Gén. 2:17; 3:3-5).

Komo amo ompa Edén peuak moneltoka ke tikpiaj teisa tein kisentoka yoltok keman timomikiliaj, ¿kemanian peuak moneltoka? Amo senkis tikmatij. Tikmatij ke taneltokalis tein amo melauak ixpoliuik itech itonaluan Noé keman mochiuak tetsaujkakiouit. Ijkuak sayoj momakixtijkej Noé uan ikalyetouanij akin katkaj itekitikauan Dios uan nochi tein amo melauak tein moneltokaya ixpoliuik.

Yejua ika xa peuak moneltoka ke keman timomikiliaj teisa kisentoka yoltok satepan ke mochiuak tetsaujkakiouit. Keman Dios kinpatilij inintajtol taltikpakneminij ompa Babel yejuan nemitoj “itech nochi taltikpak” uan kisentokakej kineltokakej nejon uan no kinmachtijkej oksekin (Gén. 11:8, 9). Yejua ika amo tikmatij kemanian peuak moneltoka nejon. Tein kemaj tikmatij yejua ke Satanás “in tetat den nochi nekes ten xolopijtijtinemij”, kichiuak maj noyampa moneltoka nejon tamachtilis uan semi kiyolpaktij maj ijkon panouani (Juan 8:44).