Nanochin tein nankitasojtaj Jiova

Nanochin tein nankitasojtaj Jiova:

Jesús kijtoj: “Nankajsikamatiyaskej de ne Tajtoltsin ten yek melauj. Uan [...] yejua ne namechtojtomatiuj” (Juan 8:32). ¡Techtelyolseuia nejin tajtolmej! Kemaj uelis tikixmatiskej tein melauak maski tinemij itech “takuitapan [“itamian”, NM] tonalmej” kampa semi takajkayauaj (2 Timoteo 3:1). Tinochin tikelnamikij ke techyolpaktij tikixmatiskej tamachtilis tein melauak tein moajsi itech iTajtol Dios. ¡Tel kualtsin nejon!

Amo sayoj moneki kuali tikixmatiskej tein melauak uan tikteixmatiltiskej, ta no moneki tikchiuaskej itech tonemilis. Moneki tiksentokaskej itech inetasojtalis Dios. Sayoj ke ¿keniuj uelis tiksentokaskej itech inetasojtalis? Jesús kinankilij nejin netajtanil itech youak achto ke momikiliskia, keman kiniluij itatitaniluan tein amo kikaujkej: “Komo namejuan nankitakamatiyouej nijin notanauatiluan, [...] nankisentokaskej nankiseliskej notetasojtalis. Uan no ijkon mochiuas, kuak Nejuatsin niktakamatiuj itanauatiluan de Notajtsin [...,] niksentoka[s] nikselijtiyas itetasojtalis” (Juan 15:10).

¿Tikitaj toni kipaleuij Jesús maj kisentoka itech inetasojtalis Dios? Yejua kitakamatia itanauatiluan iTajtsin. No ijkon tejuan. Tein techpaleuis maj tiksentokakan itech inetasojtalis Dios, moneki tikauaskej maj techyekana tamachtilis tein melauak itech nochi tein tikchiuaskej. Kemej kijtoj Jesús nejon youak: “Komo melauj nankiajsikamatij ya nochi nijin tajtolmej, ijkuakon moneki xitatakamatiyakan para ijkon Dios namechyolpaktijtiyas” (Juan 13:17).

Ika nochi toyolo tiknejnekij maj nejin amaix techpaleui tinochin maj tikchiuakan ijkon kemej timomachtiaj, uan maj ‘tiksentokakan itech inetasojtalis Dios [...] ika nemilis nochipaya tein tikitstiyouij’ (Judas 21, NM).