Carta tein kijkuilojkej Oloch Taojtokaltianij
Tokniuantsitsin:
ToTajtsin Dios, Jiova, yejuatsin akin kitemaka okachi kuali neskayot ika netasojtalis. Yejua ika, Biblia kijtoua: “Dios yejuatsin netasojtalis” (1 Juan 4:8, Traducción del Nuevo Mundo de las Santas Escrituras). Uan maski Jiova kipia chikaujkauelilis, iTajtol amo keman kijtoua ke “Dios yejuatsin chikaujkauelilis”. Yejuatsin taixyekana nochipa ika netasojtalis. ¡Yejua ika tiknekkej iuan timotokiskej!
Techmaka miak pakilis porin Jiova amo techchikaujkauia maj tiktekitilikan, ta yejuatsin amo se tanajnauatijkej. Yejuatsin kineki maj tejuan tiktekitilikan porin tiktasojtaj ika nochi toyolo. Keman tikchiuaj nejon, tiknextiaj ke tiknekij maj techixyekana porin tikneltokaj ke kichiua ika melaujkayot uan netasojtalis. Nejin ipa moitaya ijkuak kinchijchiuak yekinika taltikpakneminij.
Amo kinchikaujkauij Adán uan Eva maj kitakamatikan, ta okachi kuali kinkauak maj yejuan kiixpejpenakan tein kinekiaj kichiuaskej. Komo yejuan yekmelauj kitasojtaskiaj Jiova uan kitasojkamatiskiaj tein yejuatsin kichiujka ininka, yejuan kiixnamikiskiaj Satanás keman kinekia maj tajtakokan.
Satepan, itech tanojnots tein ika monauatij, Moisés kijtoj iixpan xolal Israel: “Xikita ke yekmelauj niktalia moixpan axkan nemilis uan tein kuali, mikilis uan tein amo kuali” (Deut. 30:15). Yejuan ueliaj kiixpejpenayaj keniuj yaya monejnemiltitij. No ijkon, Josué kiniluij israelitas: “Komo amo kuali nankiitaj nankitekitiliskej Jiova, xikixpejpenakan axkan akoni nankinekij nankitekitiliskej”. Sayoj ke yejuan kinankilijkej: “Tejuan, nion tiknekij tiknemiliskej, tikauaskej Jiova” (Jos. 24:15, 16). Tejuan no ijkon tiknemiliaj axkan. Porin tiktasojtaj Jiova “nion tiknekij tiknemiliskej” tikauaskej Jiova.
Kemej tiitatojtokakauan Cristo kuali tikajsikamatij tein kijtosneki se kiixpejpenas tein se kichiuas. Tayekananij itech nechikol kinixtalijtokej maj techyolchikauakan uan maj techmejmelauakan, maski ijkon amo kitemouaj kiixyekanaskej tonemilis nion totakuaujtamatilis. Tatitanil Pablo kijkuiloj: “Uan tejuan kuak tamechkalpanotiue, ijkuakon amo tiknekij tamechmachililtiske totanauatil ke monekis xikneltogakan totamachtilis. Porin tejuan tikmatij ya ke namejuan kuali momajxitij ya namotakuautamatilis. Uan kuak tejuan tamechkalpanotiue, ijkuakon sayo tiknekij tamechpaleuiske para keniu kachi ok nanmoyolpakiltijtiyaske” (2 Cor. 1:24).
Techmaka miak pakilis keman tikchiuaj teisa porin tiknekij tikchiuaskej uan amo porin techchikaujkauiaj. Jiova techyoleua maj tikchiuakan tein kuali porin tiktasojtaj. Itech itajtoluan Pablo nesi hasta kani motelneki nejin: “Uan takan nejua nikinxejxelouilia in pobres nochi norikojyo uan komo amo nikpia tetasojtalis, ijkuakon nochi nenkajti san ten nikchiutinemis. Uan takan no nejua nimotemaktia ma nechmiktikan uan ma [kichichinokan] notakayo porin notakuautamatilis uan komo amo nikpia tetasotalis, ijkon nochi nenka san ten nikchiua” (1 Cor. 13:3).
Semi kiyolpaktia Jiova uan kiueyichiua keman kiita ke miak millones tokniuan takamej uan siuamej kitekitiliaj porin kitasojtaj ika nochi ininyolo.
Uan Jiova, kintasojta ika nochi iyolo nochin itekitikauan, akin no ompa nanpouij konemej uan telpochmej akin nankinextiaj ke nankitasojtaj Jiova uan amo nejin taltikpak kampa kitemouaj sayoj moyolpaktiskej ika tein nikan motemaka. Kuali xikmattokan, ke tejuan no tamechtasojtaj ika nochi toyolo (Luc. 12:42, 43).
Porin nankitasojtaj Jiova, itech se xiuit tein tiualpanokej, tokniuan takamej, siuamej uan telpochmej nanpanokej 1,748,697,447 horas itech tanojnotsalis. Uan porin kitasojtaj Jiova semanauak taltikpak 7,782,346 tokniuan tapaleuijkej itech tanojnotsalis. Tiyolpakij porin 268,777 tokniuan, akin ompa mopoujkej telpochmej, moauijkej uan ika nejon kinextijkej ke motemaktijkej iuan Jiova. Nejin kijtosneki ke moauijtoyaj 5,168 tokniuan itamiampa sejse semana. ¡Nejin semi techyolpaktia!
Itech nejin tonalmej tein semi ouijkej, itekitikauan Dios kipanouaj miak kuejmolmej, ouijkayomej, kokolis, kintajyouiltiaj uan tajyouiaj porin xiuejkejya. Sayoj ke amo tipouij “iuan nekes ten kinekij motsinkixtiske” nion “timoyolkejkepaj”. Tamechteltasojtaj nannochin (Heb. 10:39; 2 Cor. 4:16).
Nanmokniuan,
Oloch Taojtokaltianij akin kinixyekanaj iTaixpantijkauan Jiova