Maj tikinpaleuikan akin amo tachiaj maj kiixmatikan Jiova
1. ¿Keniuj kinextij Jesús ke ininka motekipachouaya akin amo tachiayaj?
1 Keman Jesús kistiaya itech altepet Jericó, ome takamej akin amo tachiayaj uan tajtaniaj tomin peujkej kitsajtsiliaj: “Totekotsin [...], xitechonyolikneli”. Jesús xa semi motekipachojtoya, porin kimatia ke amo uejkaua yayaj kimiktitij. Maski ijkon, yejua motsakuilij, kinnotsak uan kinpajtij (Mat. 20:29-34). ¿Keniuj uelis titeikneliskej ijkon kemej kichiuak Jesús?
2. ¿Keniuj uelis tikinnojnotsaskej ika Biblia akin amo tachiaj akin tikinajsij itech ojti?
2 Maj tikinpaleuikan. Komo tikajsij se taltikpaknenkej akin amo tachia, kemej neskayot itech ojti, maj tikiluikan tiakonimej uan maj tikmatiltikan ke uelis tikpaleuiskej. Yekinika xa amo totech takuaujtamatis, porin kemansa moajsij akin ininka mauiltiaj uan kinchiuiliaj tein amo kuali akin amo tachiaj. Sayoj ke komo tikualtakamej uan tiknextiaj ke yekmelauj ininka timotekipachouaj, xa okachi kuali momachilis. Uan no, moneki tikmatiskej ke moajsij akin tepitsin tachiaj oso senkis amo, nejon techpaleuis maj tikmatikan keniuj uelis tikpaleuiskej. Satepan ke tikpaleuiskej, uelis tikiluiskej ke tikteixmatiltiaj tein Biblia tamachtia. Maj tikixtajtoltilikan se tajkuilol itech Biblia, kemej Salmo 146:8 oso Isaías 35:5, 6. No uelis tiknextiliskej keniuj kitemouis amaixmej ika audio itech jw.org. Komo taltikpaknenkej ueli taixtajtoltia ika braile, maj tiktajtanikan ox kiuelitaskia kiselis se amaix tein ika tajtoua Biblia itech nejon taman tajkuilol. Komo kipia se computadora ika se programa tein ueli kiixtajtoltia tajkuilol tein ixnesi itech tepos, xa no uelis kipaleuis okseki taman tamachtilismej tein moajsij itech jw.org uan amaixmej tein uelis kitemouis ika se taman tein moixmati kemej RTF. Nejin ome taman kemej uelis se kitemouis amaixmej sayoj moajsij itech tajtol español uan okseki tataman tajtolmej tein okachi mokuij semanauak taltikpak. (Xikonita recuadro “Keman tikonpaleuis aksa akin amo tachia...”.)
3. ¿Keniuj uelis tikinajsiskej akin amo tachiaj akin nemij kampa titanojnotsaj?
3 Maj tikintemokan akin amo tachiaj. Tein melauj, keman tiyouij kajkalpan amo semi tikinajsij akin amo tachiaj, porin miakpa amo kiuelitaj tajtoskej iniuan akin tanotsaj ininkaltenoj uan amo kinixmatij. Yejua ika, moneki timochikauaskej tikintemoskej uan tikinmachtiskej tein kijtoua Biblia (Mat. 10:11). ¿Titekitij iuan aksa akin amo tachia oso timomachtiaj iuan? Komo ijkon, maj tikinnextilikan tein tamachtia Biblia. Komo kampa titanojnotsaj moajsi se kaltamachtiloyan kampa kinpaleuiaj akin amo tachiaj, maj tiktajtanikan akin ompa taixyekana ox uelis tikuikiliskej seki amaixmej itech braile uan ijkon uelis kipias itech biblioteca. ¿Tikixmatij aksa akin kipia se ichankauj akin amo tachia? ¿Moajsij taltikpaknechikolmej kampa titanojnotsaj tein kinpaleuiaj akin amo tachiaj oso kalmej kampa nemij akin amo ueli moitaj ininselti kampa moajsij akin amo tachiaj? Maj tikiluikan ichankauj akin amo tachia, akin teselia itech nejon kali oso akin taixyekana itech nejon kaltamachtiloyan ke tiitaixpantijkauan Jiova tiknekij tikinpaleuiskej akin amo tachiaj uan ke tikpiaj amaixmej itech braile uan ika audio tein uelis kinpaleuis. Maj tikinnextilikan ika Biblia ke Dios motenkaua senkis kinpajtis akin amo tachiaj. No uelis tikinnextiliskej video tein itokay “No sé qué haría sin ella”, tein moajsi itech jw.org. Nejin video kinextia keniuj se tokniuj takat akin amo tachia kipaleuiani kipias Biblia itech braile. Komo tikinyekiluiaj keyej tikinkalpanouaj, xa okachi amo ouij titajtoskej iniuan akin amo tachiaj.
4. ¿Toni techmachtia tein kipanok se tokniuj siuat akin itokay Janet?
4 Se tokniuj siuat akin amo tachia akin itokay Janet yajki kampa nemij akin amo tachiaj uan peuak tajtoua iuan se ichpoch. Janet kiluij: “Keman Jesús yetoya nikan taltikpak, kinpajtij sekin akin amo tachiayaj uan ijkon kinextij tein kichiuas satepan iniuan nochin akin amo tachiaj”. Ompa kisenitakej tein kijtoua Apocalipsis 21:3, 4, uan Janet kimelauilij keniuj iTekiuajyo Dios kichiuas nejon tein kijtoua tajkuilol. Satepan, ichpoch, kijtoj: “Amo keman nechiluijtoya nejon se akin amo tachia. Miakej akin uelij tachiaj kinemiliaj ke akin amo titachiaj techtatsakuiltijtokej porin tejuan oso touejkaujtatuan kichiujkej teisa tein amo kuali”. Janet kititanilij itech se correo electrónico tein kipaleuiskia maj kiajsi amaix Tamachtia Biblia, uan axkan mosenmachtiaj Biblia ojpa semana.
5. Maski amo tiuelij tikinpajtiaj akin amo tachiaj, ¿keniuj kinpaleuis komo ininka timotekipachouaj?
5 Tein melauj, tejuan amo ueli tikinpajtiaj akin amo tachiaj ijkon kemej kichiuak Jesús. Sayoj ke kemaj tiuelij tikchiuaj teisa. Amokuali akin taixyekantok nikan taltikpak kemej yeskia kinixtsaktok miakej taltikpakneminij, uan ompa no moajsij, sekin akin amo tachiaj. Uelis tikinpaleuiskej maj kiajsikamatikan tein tamachtia iTajtol Dios (2 Cor. 4:4). Jesús kinpajtij ome takamej akin amo tachiayaj ompakauin itech altepet Jericó porin kiniknelij (Mat. 20:34). Komo tejuan no ininka timotekipachouaj akin amo tachiaj, uelis tikinpaleuiskej maj kiixmatikan Jiova, akin kichiuas maj tachiakan uan kinmakas nemilis nochipaya.