Xikontajtani Dios maj mitsontatiochiui

Dios techtayokoliani tein semi kualtsin: maj ueli timonojnotsakan iuan uan maj tikiluikan tein tikmachiliaj. Tekiuaj David kiluij Dios: “Tejua Akin tikaki netataujtil, mouan motokiskej nochi tataman taltikpakneminij” (Salmo 65:2). Sayoj ke, ¿keniuj moneki timotataujtiskej uan ijkon Dios techkakis uan techtatiochiuis?

XIKONILUI NOCHI TEIN TIKONMACHILIA UAN XIONYOLYEMANIK

Salmo 62:8 kijtoua: “Iixpan yejuatsin xiktapokan nanmoyolo”. Keman timotataujtiskej, maj tikiluikan Dios nochi tein tikmachiliaj. Dios Akin kipia nochi chikaualis kipatiuita keman tikiluiaj nochi tein tikmachiliaj.

XIKONNOJNOTSA DIOS IKA ITOKAY

Dios moixmati kemej Tachijchiujkej, Teiknelijkej uan Tetasojtakej. Sayoj ke sayoj se itokay, Biblia kijtoua: “Nejua niJiova. Yejua nejon notokay” (Isaías 42:8). Jiova, itokay Dios, ixnesi kemej siete mil itech Biblia. Miakej akin kitematiltiayaj tein Dios kijtouaya, kikuiaj itokay keman kinotsayaj Dios. Tanauatijkej Abrahán kijtoj: “Jiova, [...] ika kualtakayot, xinechkaua maj niksentoka nitajto [mouan]” (Génesis 18:30). Keman tiktataujtiskej Jiova, maj tiknotsakan ika itokay.

XIONMOTATAUJTI ITECH MOTAJTOL

Dios kimati tein tikmachiliaj uan tein tiknemiliaj maski titajtoskej okse tajtol. ITajtol techiluia: “Axkan melau nikajsikamati ke Totajtsin Dios amo kinchichikojtasojta in tagayot. Ta, Yejuatsin kiniknelia tagayot tech nochi in senmanauak komo yejuan kimouistiliaj Yejuatsin uan chipaukanentinemij” (Hechos 10:34, 35).

Amo sayoj moneki tiktataujtiskej Dios komo tiknekij maj techtatiochiui. Itech okseki tamachtilismej tikitaskej toni no moneki maj tikchiuakan.