¿Tikonmatia?
¿Kinchijchiuayaj barcos ika papiro ne uejkauj?
Seki papiro.
MIAKEJ kimatij ke ne uejkauj egipcios itech tajkuilouayaj papiro. Griegos uan romanos no itech tajkuilouayaj.a Sayoj ke miakej amo kimatij ke papiro amo sayoj itech tajkuilouayaj ta no ika kinchijchiuayaj barcos.
Ome taman barcos tein kiajsikej kampa kitokkej se egipcio tein kinextiaj keniuj katkaj barcos tein chijchiujtoyaj ika papiro.
Panoua 2,500 xiujmej achto, tanauatijkej Isaías kijkuiloj ke taltikpakneminij akin nemiaj “kampa ika moajsij ueyiamej tein onkakej Etiopía” kintitankej “itech ueyiat akin kitematiltitij tein panos, itech barcos tein chijchiujtokej ika papiro”. Satepan, tanauatijkej Jeremías kijtoj ke keman medos uan persas kalakiskiaj Babilonia, kinchichinoskiaj “barcos tein chijchiujtokej ika papiro” porin ijkon babilonios amo ueliskia choloskej (Is. 18:1, 2; Jer. 51:32).
Akin momachtiaj Biblia amo kimoujkakakij maj arqueólogos kiajsinij seki taman tein kinextia ke ne uejkauj kinchijchiuayaj barcos ika papiro, porin kimatij ke Biblia se amatajkuilol tein Dios kichiuak maj moijkuilo (2 Tim. 3:16). Maj tikitakan seki taman tein kiajsinij ompa Egipto tein kinextia ke barcos kinchijchiuayaj ika papiro.
¿KENIUJ KATKAJ BARCOS TEIN CHIJCHIUJTOYAJ IKA PAPIRO?
Kampa kintokayaj egipcios, kiajsinij seki dibujos tein kinextiaj keniuj kitekiaj papiro uan keniuj kinchijchiuayaj barcos. Takamej kitekiaj papiro uan kiojolochilpiayaj. Satepan kikuiaj miak tein kiojolochilpijkaj uan kinsenilpiayaj. Kemej itempan chijchiujtok kemej se triángulo, keman kinsenilpiayaj kuali motilintiaya uan taxikouaya. Se amatajkuilol tein ika tajtoua tein mochiuaya ompa Egipto kijtoua ke seki barcos kipiayaj hasta panoua 17 metros uan uelia kitaliliayaj 10 oso 12 remos tajtanakastan.
Dibujos tein kinextiaj keniuj egipcios kichijchiuayaj se barco ika papiro.
¿KEYEJ KINCHIJCHIUAYAJ BARCOS IKA PAPIRO?
Ompa Egipto onkaya miak papiro kampa ika moajsia ueyiat Nilo. Uan no, amo ouij kinkisaya ika kinchijchiuaskej barcos. Uan maski satepan okachi peuak kikuij kouit keman kinchijchiuayaj uejueyi barcos, nesi ke akin kintemouayaj amichimej uan okseki tapialmej kisentokayaj kikuiaj barcos tein amo uejueykej tein chijchiujtoyaj ika papiro.
Miak xiujmej kitekitiltijkejok barcos tein chijchiujtoyaj ika papiro. Se takat griego akin monotsaya Plutarco akin nemik itech inintonaluan itatitaniluan Cristo, kijkuiloj ke ijkuak seki taltikpakneminij kikuiajok barcos tein chijchiujtoyaj ika papiro.
a Papiro moskaltia itech amej tein amo uejueykej uan tein uejueykej tein amo ijsiujka motalojtokej. Ueli moskaltia kemej 5 metros, uan kampa tsineujtok kipia kemej 15 centímetros youaltik.