KAMPA TECHTAPOUIAJ ININNEMILIS
Nochipa nikauani maj Jiova nechixyekana
SE TONAL itech xiuit 1984 nikistiaya nokalijtik tein moajsia kampa ika nemij akin tominpiaj ompa Caracas (Venezuela). Niaya nitekititi, kualkan katka uan semi tonaya. Itech nitanemilijtiaya se tamachtilis tein kiska itech amaix Tanejmachtijkej tein ika tajtouaya keniuj techitaj akin nemij kampa ika tejuan tinemij. Keman nipanotiaya ininkalixpan akin nemij kampa ika nejua ninemia, nimotajtanij: “¿Keniuj nechitaj? ¿Kemej se takat akin tekiti itech se banco akin semi kuali tatani oso kemej se itekitikauj Dios akin tekiti itech se banco uan ijkon kinixpanoltia ichankauan?”. Kemej amo nikuelitak tanankilil nikixtalij nikchiuas teisa.
Niyolik itech tonal 19 metsti mayo xiuit 1940 itech xolal Amiún (Líbano). Seki xiujmej satepan timokaltalitoj xolal Trípoli. Semi timotasojtayaj kemej kalyetouanij uan tiyolpakiaj, tikixmatiaj Jiova uan tiktasojtayaj. Notatuan kinpiakej makuil konemej, eyi siuamej uan ome takamej uan nejua nixokoyot. Yejuan kiitayaj ke okachi monekia momachtiskej Biblia, yaskej nechikolmej uan kinpaleuiskej oksekin maj kiixmatikan Jiova ke motomintiskej.
Itech nechikol kampa timosentiliayaj moajsiaj miakej tokniuan taixpejpenalmej. Se monotsaya Michel Aboud, akin kiixyekanaya nechikol tein mochiuaya itajkotian semana kampa timomachtiaj se amatajkuilol. Michel peuak momachtia Biblia ompa Nueva York, uan peuak kiteixmatiltia Líbano itech xiuit 1921. Kuali nikelnamiki ke semi kinpoujkaitaya uan semi kinpaleuiaya Anne uan Gwen Beravor, ome ichpochmej akin kiselijkaj Tamachtilis tein motemaka Galaad. Nochankauan uan nejua semi kuali timouikakej iniuan. Miak xiujmej satepan semi niyolpakik porin oksepa nimoajsik iuan Anne ompa Estados Unidos. Satepan no nimoajsik iuan Gwen, akin monamiktijka iuan Wilfred Gooch uan tapaleuijtoyaj Betel tein moajsi Londres (Inglaterra).
KEMAN TITANOJNOTSAYAJ OMPA LÍBANO
Keman katka niokichpilok amo onkayaj miakej itaixpantijkauan Jiova ompa Líbano. Maski ijkon, tikinmachtiayaj oksekin tein timomachtiayaj itech Biblia. Titamachtiayaj maski seki tiopixkamej techixnamikiaj. Hasta axkan nikelnamiki seki taman tein techpanok.
Se tonal, nokniuj siuat Sana uan nejua titanojnotstoyaj itech se ueyi kali kampa miakej nemij. Se tiopixkat ajsik kampa titanojnotstoyaj porin xa kiluijkej ke ompa tietoyaj. Tiopixkat peuak kiuijuikaltia nokniuj uan kemej semi kualantoya kitopeuak itech escaleras. Semej akin ompa nemia kinnotsak policías uan yejuan kiitakej maj kipaleuianij Sana porin mokokojka. Policías kiuikakej tiopixkat uan kiajxilijkej se tepos. Yejua ika akin kinixyekanaya policías kitajtanij: “¿Toni tikchiua? ¿Tikinmachtia taltikpakneminij iTajtol Dios oso tikinmachtia maj kichiuakan tein amo kuali?”.
No nikelnamiki se tonal keman titanojnotsatoj se xolal tein uejka moajsia. Tiajkej itech se autobús tein techtaneujtijkaj. Kuali techyajtoya, sayoj ke tiopixkat kitekakilij ke ompa titanojnotstoyaj uan kichiuak maj miakej taltikpakneminij techixnamikinij. Yejuan hasta techtetenkej uan kikuakoyonijkej nopopaj. Nikelnamiki ke semi ixesyoj katka. Mokepak iuan nomomaj kampa yetoya autobús uan tinochin tikintojtokakej. Semi timotekipachojkej. Amo nikelkaua tein nomomaj kijtoj keman kiixchipaujtoya nopopaj: “Jiova, xikintapojpolui porin amo kimatij toni kichiuaj”.
Se tonal tikinkalpanotoj seki tochankauan itech xolal kampa katkaj tikayomej. Keman tiajsikej ichan noueyitat ompa yetoya obispo, se tiopixkat akin semi ueyichiujkej katka. Yejua kimatia ke notatuan katkaj itaixpantijkauan Jiova. Kemej sayoj nikpiaya chikuasen xiuit kinekia nechpinaujtis, yejua ika nechtajtanij: “¿Keyej amo titaauil?”. Nikiluij ke nipiliok katka uan ke achto monekia okachi nikixmatis tein Biblia tamachtia uan nikchikauas notakuaujtamatilis. Kemej amo kiuelitak tein niknankilij, kiluij noueyitat ke amo nikpoujkaitaya.
Amo miakpa techpanok tein amo kuali, porin miakej akin nemij Líbano kualtakamej uan kuali teseliaj. Yejua ika uelia titajtouayaj ika Biblia iniuan uan miakej tikinmachtiayaj.
TIMOKALTALITOJ OKSE ALTEPET
Keman niayaok kaltamachtiloyan se tokniuj takat kayot Venezuela takalpanoto Líbano. Keman ompa yetoya yaya nechikolmej itech tonechikol uan peuak moixmati iuan nokniuj siuat Wafa. Satepan monamiktijkej uan mokaltalitoj Venezuela. Keman Wafa techtajkuilouiliaya kiluiaya nopopaj maj timokaltalitij Venezuela porin semi techtemouaya. Satepan kemaj timokaltalitoj ompa.
Tiajsikej Venezuela itech xiuit 1953 uan timokaltalitoj Caracas, kampa ika moajsi kali kampa taixyekana tekiuaj. Kemej niokichpilok katka nikuelitaya nikitas keman tekiuaj panouaya iuan ichofer itech icarro tein semi kualtsin katka. Sayoj ke notatuan ouij kinkisak momatiskej porin nochi taman katka. Itech nejon altepet tajtouayaj okse tajtol, taman kemej nemiaj uan onkaya okseki taman takual. Uan keman notatuan momattiayajya tikpanokej se ueyi tayokol.
Opochmakopa hasta yekmakopa: Nopopaj. Nomomaj. Nejua itech xiuit 1953 keman timokaltalitoj Venezuela.
SE UEYI TAYOKOL
Se tonal nopopaj peuak amo kuali momachilia. Yejua semi chikauak katka uan amo keman mokokojtoya. Yejua ika timotekipachojkej. Tapajtianij kiluijkej ke kipiaya cáncer de páncreas uan kitekkej. Sayoj ke se semana satepan momikilij.
Ouij nechkisa nikijtos keniuj timomachiliayaj. Nejua sayoj nikpiaya 13 xiujmej. Amo uelia tikneltokayaj ke nopopaj momikilijka uan semi titayokoxtoyaj. Nomomaj ouij kikisak kiajsikamatis ke nopopaj amo yetoyaok. Sayoj ke tikajsikamatkej ke amo monekia timosenkauaskej uan Jiova techpaleuij maj titaxikouanij. Keman nikpiaya 16 xiujmej nikisak kaltamachtiloyan ompa Caracas uan nikitak ke monekia nikinpaleuis nochankauan ika tomin.
Ininneskayo nokniuj Sana uan inamik, Rubén, nechpaleuij maj okachi kuali nimouikani iuan Jiova.
Ijkuak, nokniuj Sana monamiktij iuan Rubén Araujo, akin kiselijka Tamachtilis tein motemaka Galaad uan mokepka Venezuela. Kiixtalijkej mokaltalitiuij Nueva York. Keman nochankauan kinemilijkej ke monekia nias universidad, nimomachtito Nueva York, kampa ninemik iuan Sana uan Rubén. Ininneskayo nechpaleuij maj okachi kuali nimouikani iuan Jiova. Uan no, itech nechikol kampa timosentiliayaj, Brooklyn Spanish, moajsiaj miakej tokniuan akin semi kuali mouikayaj iuan Jiova. Ome tokniuan akin semi nikintasojtak katkaj Milton Henschel uan Frederick Franz, akin tapaleuiayaj Betel tein moajsi Brooklyn.
Itech xiuit 1957 keman nimoauij.
Keman nikajxitijtoyaya se xiuit ompa universidad peuak itech nitanemilia tein nikchiujtoya. Itech amaix Tanejmachtijkej nikixtajtoltijka seki tamachtilismej tein ika tajtouayaj tekimej tein uelis se kichiuas itech inechikol Jiova uan nejon semi nechtanemililtij. Nikitaya ke precursores uan betelitas akin yetoyaj itech nonechikol semi yolpakiaj uan no niknekia niyolpakis kemej yejuan. Sayoj ke ayamo nimoauiaya, yejua ika nikitak ke monekia nimotemaktis iuan Jiova. Ijkon nikchiuak uan nimoauij itech tonal 30 metsti marzo xiuit 1957.
NIKIXTALIA TEIN OKACHI MONEKI
Satepan ke nimoauij peuak niknemilia nimochiuas precursor. Semi niknekia nikchiuas nejon tekit, sayoj ke nikmatia ke ouij nechkisaskia nikpeualtis. Nimotajtaniaya ox ueliskia niksentokas nimomachtis uan yeski niprecursor. Miakpa nikintajkuilouilij nochankauan uan yejuan no miakpa nechtajkuilouilijkej porin nikiniluij ke niknekia nikauas universidad, nimokepas Venezuela uan nimochiuas precursor.
Nimokepak Caracas itech metsti junio xiuit 1957. Sayoj ke nikitak ke nochankauan amo kinajsia tomin. ¿Keniuj ueliskia nikinpaleuis? Nechmakayaj tekit itech se banco, sayoj ke nejua niknekia nimochiuas precursor, ta tein melauj yejua ika nimokepka. Nikixtalij nikchiuas nochin ome taman. Miak xiujmej nitekitik itech banco miak tonalmej uan katka niprecursor. Nikpiaya miak tekit uan semi niyolpakia.
No semi niyolpakik keman nikixmatik Sylvia, se tokniuj siuat kayot Alemania akin semi kuakualtsin. Yejua semi kitasojtaya Jiova uan yajka mokaltalito Venezuela iniuan itatuan. Satepan timonamiktijkej uan tikinpiakej ome konemej: Michel (akin tikiluiaj Mike) uan Samira. No peuak tikyekpiaj nomomaj, yejua ika tikuikakej tokalijtik. Maski amo uelikok niksentokak kemej precursor porin nikpiayaya okseki tekimej, niksentokaya nikuelitaya nitanojnotsas. Keman tikpiayaj vacaciones uan tiueliaj, Sylvia uan nejua timochiuayaj precursores auxiliares.
NIKIXTALIA NIKCHIUAS OKSE TAMAN
Nokoneuan yajtoyajok kaltamachtiloyan keman panok tein nikijtoj yekinika. Tein melauj, amo teyi ika nimotekipachouaya uan oksekin akin no tekitiaj itech bancos semi nechpoujkaitayaj. Maski ijkon, okachi niknekia maj nechixmatikan kemej se itekitikauj Jiova. Niksentokaya itech nitanemiliaya nejon, yejua ika Sylvia uan nejua titajtojkej uan tikitakej toni tikchiuaskiaj. Komo nikauaya tekit tein nikpiaya itech banco nikseliskia miak tomin. Kemej amo akin tiktauikiliayaj tiknemilijkej ke tomin uejkauak techajsiskia komo amo tikouayaj miak taman.
Ouij nechkisak nikixtalis nikauas notekiuj. Sayoj ke nonamik uan nomomaj semi nechpaleuijkej. Axkan oksepa ueliskia nimochiuas precursor. ¡Semi niyolpakia! Niknekiaya nimochiuas precursor, sayoj ke techmatiltijkej se taman tein amo tikchiayaj.
TECHMATILTIAJ SE TAMAN TEIN SEMI KUALTSIN
Semi tiyolpakkej keman yolik tokonetsin Gabriel.
Se tonal, tapajtijkej techmatiltij ke Sylvia kipiaskia se konetsin. Nejon amo tikchiayaj. Semi tiyolpakiaj, sayoj ke niksentokaya niknemiliaya ke nikixtalijka nimochiuas precursor. ¿Ueliskiaok? Niman peuak tikchiaj tokonetsin ika yolpakilis. Sayoj ke, ¿toni panoskia ika tein nikixtalijka nikchiuas?
Satepan ke ika titajtojkej tein tikixtalijkaj tikchiuaskej, tikitakej ke ueliskia nimochiuas precursor. Tokonetsin Gabriel yolik metsti abril xiuit 1985. Nikauak tekit tein nikpiaya itech banco uan nimochiuak precursor regular itech metsti junio xiuit 1985. Satepan nikpiak tatiochiualis niyeski semej taixyekananij itech kali Betel. Kemej Betel amo yetok Caracas, ta kemej 80 kilómetros uejka, monekia niayajtos ojpa oso expa semana.
OKSEPA TIMOKALTALITOJ OKSEKO
Betel yetok itech xolal La Victoria, yejua ika tikixtalijkej ompa timokaltalitiuij. Semi nimotasojkamati iniuan nochankauan uan semi nikinpoujkaita porin semi nechpaleuijkej. Nokniuj siuat Baha kijtoj ke yejua kiyekpiaskia tomomaj. Mike monamiktijkaya, sayoj ke Samira uan Gabriel nemiajok touan uan monekia kinkaujteuaskej akin kuali iniuan mouikayaj ompa Caracas. Uan no, Sylvia monekia momatis porin axkan tinemiskiaj itech se xolalkonet. Uan tinochin monekia timomatiskej porin tinemiskiaj itech se kali tein amo ueyi katka. Mopatak miak taman keman tikixtalijkej tikauaskej Caracas uan timokaltalitiuij La Victoria.
Satepan mopatak okseki taman. Gabriel monamiktij uan Samira nemito okseko. Uan no, itech xiuit 2007, Sylvia uan nejua techyoleujkej maj tianij Betel, kampa tiksentokaj titapaleuiaj hasta axkan. Mike, tookichpil akin tayekana, tayekankej itech nechikol uan no precursor iuan inamik, Mónica. Gabriel no tayekankej uan tapaleuijtok Italia iuan inamik, Ambra. Samira precursora uan kampa nemi kichiua seki tekimej tein onkak Betel.
Opochmakopa hasta yekmakopa: Sylvia uan nejua ompa Betel tein moajsi Venezuela.Mike, tookichpil akin tayekana, iuan inamik, Mónica. Tosiuapil Samira. Tookichpil Gabriel iuan inamik, Ambra.
AMO NIKPATASKIA TEIN NIKIXTALIJ NIKCHIUAS
Nikixtaliani nikchiuas miak taman tein semi moneki. Sayoj ke amo nikpataskia, ta komo monekiskia, oksepa yejua nikixtaliskia. Semi nimotasojkamati porin uelini nitapaleuiani itech seki tekimej tein onkak itech inechikol Jiova. Ika nochi tein nikpanouani, nikitani ke semi moneki kuali se mouikas iuan Jiova. Itech tein yeski taman tein monekis tikixtaliskej, Jiova uelis techmakas “ne yolseuilis ten kachi kuika uelilis hasta amo uelis se kajsikamatis ok de keniu” (Filip. 4:6, 7). Sylvia uan nejua tiyolpakij titapaleuiskej Betel, uan tiknemiliaj ke tein tikixtalijkej tikchiuaskej yejua tein okachi kuali porin tikaujkej maj Jiova techixyekana.