Tein tajtanij akin taixtajtoltiaj
¿Toni kichiuas Jehová maj “kiyolnemilikan” tekiuanij amo uejkaua?
Itech Apocalipsis 17:16, 17 kijtoua keniuj peuas tetsaujkatajyouilis, ompa kijtoua: “Majtakti kuaomimej tein tikitak uan koujtajtapial kitauelitaskej siuaauilnenkej uan kitamikuiliskej nochi tein kipia uan kixipetsoskej. Kikuaskej inakayo uan kitamichichinoskej. Porin Dios kichiuak maj kiyolnemilikan kichiuaskej tein kisenixtalijtokej, sayoj ke tein melauj kichiuaskej tein Dios kinemilijtok, uan kimakaskej koujtajtapial nochi inintanauatil kemej tekiuanij”. Achto, toamaixuan kimelauayaj ke Jehová kichiuaskia maj tekiuanij “kiyolnemilikan” kinixpoloskej nochin taneltokalismej tein amo melaujkej.
Sayoj ke moneki tikpataskej kemej achto tikajsikamatiaj. Jehová kichiuas maj tekiuanij ‘kimakakan koujtajtapial nochi inintanauatil’, uan yejua nejon tein Jehová kichiuas maj “kiyolnemilikan”. ¿Keniuj mochiuas nejin? Para tikajsikamatiskej maj tiknankilikan seki netajtanilmej.
¿Akonimej ininka tajtoua nejin tein moijtojka ke mochiuaskia? “Siuaauilnenkej” akin no kinotsaj kemej “Ueyi Babilonia”, kinixnextia nochin taneltokalismej tein amo melaujkej. “Koujtajtapial chichiltik tein petani” kiixnextia Organización de las Naciones Unidas. Nejin kiixtalijkej itech xiuit 1919 para maj tapaleuiani maj amo moteuikanok, uan achto kiixmatiaj kemej Sociedad de Naciones (Apoc. 17:3-5). Uan “majtakti kuaomimej” kinixnextiaj nochin tekiuanij akin kipaleuiaj koujtajtapial.
¿Mosenpaleuiaj siuaauilnenkej iuan koujtajtapial chichiltik tein petani? Siuaauilnenkej ‘tokotsyetok’ ipanko koujtajtapial, nejin kijtosneki ke kipaleuia uan kineki maj kichiua tein yejua kineki.
¿Toni kipanos siuaauilnenkej? Koujtajtapial uan majtakti kuaomimej tein kipaleuiaj semi “kitauelitaskej siuaauilnenkej”, kikuiliskej nochi tein kipia uan kinextiskej ke tel amo yolkuali. Satepan kiixpoloskej, uan yejua nejon tein Jehová kijtojka ke mochiuaskia (Apoc. 17:1; 18:8). Ijkuak, senkis ixpoliuiskej nochin taneltokalismej tein amo melaujkej. Sayoj ke achto ke panos nejon, Jehová kichiuas maj tekiuanij kichiuakan teisa tein amo keman ijkon mochiujtoya.
¿Toni kinchiualtis Jehová tekiuanij? Kemej tikitakejya, Jehová kichiuas maj tekiuanij kichiuakan tein yejua “kinemilijtok”. Nejin kijtosneki ke tanauatil tein kipiaj nejon tekiuanij, Dios kichiuas maj kimaktilikan “koujtajtapial” chichiltik tein petani oso Naciones Unidas (Apoc. 17:13). ¿Kijtosneki nejin ke yejuan tekiuanij kinemiliskej kichiuaskej nejon? Amo, porin achto ipa moijtojka ke yejua Jehová kinchiualtiskia nejin (Prov. 21:1; no xikonita Isaías 44:28). ¿Yolik kitemaktijtiaskej inintanauatil? Amo, ta sepasan kichiuaskej. Uan niman keman koujtajtapial kimakaskej tanauatil, Jehová kichiuas maj kinixpolo nochipaya taneltokalismej tein amo melaujkej.
¿Toni tikchiaj maj pano amo uejkaua? Amo moneki nochipa tikitstoskej noticias para tikmatiskej ox tekiuanij yolik kipaleuijtokejya Naciones Unidas. Ta, moneki tikchiaskej maj Jehová kichiua maj sepasan kiyolnemilikan kimakaskej inintanauatil nejon Naciones. Keman mochiuasya nejon, senkis tikmatiskejya ke tetsaujkatajyouilis amo uejka poliui. Yejua ika “maj tiijsatokan” uan maj tiksentokakan kuali titaixejekokan, porin amo uejkaua miak taman sepasan mopatas (1 Tes. 5:6).