Números
23 Satepan Balaam okilui Balac: “Nikan xikinchiua chikome altares uan xikinmikti chikome toros uan chikome ichkamej”.* 2 Balac san niman okichi ijkon ken Balaam okilui. Yejuan ome ipan sejse altar okitemakakej, se toro uan se ichka.* 3 Satepan Balaam okilui Balac: “Nikan ximokaua kanin otiktemakak tetliokolil tlen mochichinoua* uan ne manio. Xamo Jehová itlaj nechiluis. Ne nimitsiluis tlen ye nechmatiltis”. Uan Balaam oyajki ikpak* se tepetsintli.
4 Satepan toTajtsin Dios okitlapoui Balaam, ikinon Balaam okijto: “Onikintekpanki* chikome altares uan ipan sejse altar oniktemakak se toro uan se ichka”. 5 Jehová okilui Balaam tlen omonekiaya kijtos uan okilui: “Ximokopa kanin kajki Balac uan ijkon xikijto”. 6 Ijkuak ye omokopki okitak Balac uan príncipes tlen oualayaj Moab okatkaj inakastlan tetliokolil tlen mochichinoua. 7 Satepan Balaam okinmijto ninmej tlajtolmej:
“Balac akin tlanauatia Moab onechnotsato Aram,
desde itech tepemej ik kanin kisa tonaltsin:
‘Xiuiki uan nopatka xikuijuikalti* Jacob,
xiuiki uan xikijto tlajyouis Israel’.
8 ¿Tleka moneki nikinuijuikaltis akinmej toTajtsin Dios amo kinuijuikaltia?
¿Tleka moneki nikijtos matlajyouikan akinmej Jehová amo kintlajyouiltia?
9 Ikpak temej* nikinmita
uan ikpak tepetsitsintin noijki nikinmita.
Non altepetl san iselti ompa chanti,
uan amo poui inuan okseki altepemej.
10 ¿Akin uelis kinpouas ixuiuan Jacob tlen sapanoua miakej ken xali?
Tla israelitas xexelitokej naui partes, ¿ikaj uelis kipouas se parte?
Techkauili manimiki ijkon ken akinmej yolkualmej
uan manipojpoliui ken yejuan”.
11 Ijkuakon Balac okilui Balaam: “¿Tleka ijkon techtoktia?* Onimitsualikak para xikinuijuikalti akinmej nechkokoliaj pero te san tikinteochiua”. 12 Ye okinankili: “Moneki nikijtos tlen Jehová kineki manikijto”.
13 Balac okijto: “Nimitstlatlaujtia nouan xiuiki kanin uelis tikinmitas. Ompa san sekimej tikinmitas desde ompa nopatka xikinuijuikalti”. 14 Ikinon okiuikak itech tlali kanin kajki Zofim ikpak Pisgá. Ompa okinchi chikome altares uan ipan sejse altar okitemakak se toro uan se ichka. 15 Balaam okilui Balac: “Nikan ximokaua kanin otiktemakak tetliokolil tlen mochichinoua uan ne manimotlapouiti iuan toTajtsin Dios”. 16 Jehová okinotski Balaam uan okilui tlen omonekiaya kijtos uan okilui: “Ximokopa kanin kajki Balac uan ijkon xikijto”. 17 Ijkuak ye omokopki kanin kajki Balac, okitak ye uan príncipes tlen oualayaj Moab, tlen iuan okatkaj omochixtokaj inakastlan tetliokolil tlen mochichinoua. Balac okitlajtlani: “¿Tlen omitsilui Jehová?”. 18 Satepan Balaam okinmijto ninmej tlajtolmej:
“Balac ikone Zipor,
ximoketsa, xitlakaki uan techkaki.
19 ToTajtsin Dios amo tlakajkayaua ijkon ken kichiua se tlakatl
nion kipatla tlen kijtoua ijkon ken kichiua se tlakatl.
Ijkuak toTajtsin Dios itlaj kijtoua, melauak kichiua.
Ijkuak itlaj kitematiltia, melauak mochiua.
20 Xikita onechualikakej para manitlateochiua,
ye yotlateochi uan ne amo uelis nikpatlas.
21 Ye amo kipaktia makitlajchiuikan Jacob
uan amo kitekauilia makipano tlen amo kuali Israel.
Jehová inDios inuan kajki
uan yejuan kiueyichiuaj ken intekiua.
22 ToTajtsin Dios kinkixtijtok ompa Egipto,
yejuan kitaj toTajtsin Dios ken ikuakonuan se toro tlen amo okimansojtilijkej.
23 Amitlaj ipati tla ikaj kijtos Jacob kipanos tlen amo kuali,
nion amikaj tlen tetlajchiuia uelis kinmixnamikis israelitas.
Ijkin uelis moijtos itech ixuiuan Jacob uan israelitas:
‘¡Xikitakan tlen yokichi toTajtsin Dios!’.
24 Nin altepetl meuas ken se león
uan moketsas ken león.
Amo moseuis hasta makikua tlen okikitski
uan amo moseuis hasta makoni inmieso akinmej okinmikti”.
25 Ijkuakon Balac okilui Balaam: “Tla amo ueli tikinuijuikaltia, amo xikinteochiua”. 26 Balaam okinankili Balac: “Yonimitsiluijka nikchiuaskia tlen Jehová nechiluiskia”.
27 Balac okilui Balaam: “Nimitstlatlaujtia nouan xiuiki uan oksekan matiakan. Xamo akin melauak Dios kuali kitas desde ompa xikinuijuikalti”. 28 Ijkuakon Balac okiuikak Balaam ikpak tepetl Peor tlen kajki iyekapan Jesimón. 29 Ompa Balaam okilui Balac: “Nikan xikinchiua chikome altares uan xikinmikti chikome toros uan chikome ichkamej”. 30 Balac okichi ijkon ken Balaam okilui, ipan sejse altar okitemakak se toro uan se ichka.