Números
24 Ijkuak Balaam okitak Jehová okipaktiaya kinteochiuas israelitas, ayakmo oyajki okimatito kox itlaj amo kuali kinpanoskia israelitas. Okachi kuali ye otlachixki kanin tlauaki. 2 Balaam otlachixki uan okinyekitak israelitas oxexelitokaj por tribus. Ijkuakon Balaam okiseli iespíritu toTajtsin Dios. 3 Satepan okinmijto ninmej tlajtolmej:
“Nin tlen kijtoua Balaam ikone Beor,
nin kijtoua tlakatl tlen okixtlapojkej,
4 nin tlen kijtoua akin kinkaki itlajtoluan toTajtsin Dios,
akin kipia nochi chikaualis itlaj okinextili,
akin omotolo* ijkuak yokixtlapojkaj:
5 ¡Jacob kuajkualtsitsintin mokaltsitsinuan!
¡Kualtsin kanin nanchantij israelitas!
6 Yonanmosojkej ken barrancas,
ken kanin tlaxochio tlen inakastlan panoua aueyatl,*
ken áloes* tlen Jehová okintokak,
ken cedrokojmej tlen katej inakastlan atl.
7 Uan itech ome kuetlaxtekonmej chipini atl
uan isemilla kitokaj kanin kajki miak atl.
Intekiua okachi ueyititok amo ken Agag
uan itekiuajkayo kiueyitlaliskej.
8 ToTajtsin Dios kinkixtijtok ompa Egipto.
Yejuan kitaj toTajtsin Dios ken ikuakonuan se toro tlen amo okimansojtilijkej.
Kinpojpolos altepemej tlen kitlajyouiltiaj,
kintejtexos iomiouan uan kinpojpostekis ika flechas.
9 Ye motoloua* uan moteka ken se león,
¿akin mixeuis kipepeualtis non león?
Makinteochiuakan akinmej mitsteochiuaj
uan makinuijuikaltikan* akinmej mitsuijuikaltiaj”.
10 Ijkuakon Balac okualanki iuan Balaam. Balac okualankamiktoka hasta omomatlaxkalo uan okilui Balaam: “Onitlanauati mamitsnotsatij para xikinuijuikalti akinmej nikinkokolia, pero te eyi uelta yotikinteochi. 11 Okachi kuali san niman ximokopa mokalijtik. Ne oniknekiaya itlaj nimitsmakas pero Jehová amo okitekauili itlaj xikseli”.
12 Balaam okinankili Balac: “Ijkin onikinmilui tlakamej tlen otikintitlanki: 13 ‘Maski Balac nechmakas ikal tlen kipia miak plata uan oro, ne amo uelis nikchiuas itlaj kuali noso amo kuali tla Jehová amo nechnauatis’. Ne noijki onikinmilui san nikijtos tlen Jehová nechiluis. 14 Ne nimokopas noaltepe pero xiuiki uan nimitsiluis tlen satepan nin altepetl kitoktis* moaltepe”. 15 Satepan okinmijto ninmej tlajtolmej:
“Nin tlen kijtoua Balaam ikone Beor,
nin tlen kijtoua tlakatl tlen okixtlapojkej,
16 nin tlen kijtoua akin kinkaki itlajtoluan toTajtsin Dios,
akin kixmati akin Ueyititok,
akin kipia nochi chikaualis itlaj okinextili,
akin omotolo ijkuak yokixtlapojkaj:
17 ne nikitas pero amo axkan,
nikitas pero amo san niman.
Se sitlali kisas itech ixuiuan Jacob
uan intlajkotia israelitas kisas se bastón tlen kinejneki* akin tlanauatia.
Ye kikuatlapanas Moab
uan kinkuatlapanas akinmej kichiuaj tlen amo kuali.
18 Ye kimoaxkatis Edom,
uan Seír kimoaxkatiskej akinmej kikokoliaj,
ijkuakon israelitas kiteititiskej yolchikauakej.
19 Se ixui Jacob kinnauatis oksekimej
uan kinmiktis nochtin akinmej omomakixtijkej itech non altepetl”.
20 Ijkuak Balaam okitak Amalec, okinmijto ninmej tlajtolmej:
“Maski Amalec achto altepetl,
kipojpoloskej”.
21 Ijkuak okinmitak quenitas, noijki okinmijto ninmej tlajtolmej:
“Mokalijtik kuali kajki uan mocha kajki ipan ueyi tepexitl.
22 Pero ikaj kichichinos* Cayín.
¿Ok poliui miak para Asiria mamitsuika?”.
23 Balaam ok okijto ninmej tlajtolmej:
“¿Akin momakixtis ijkuak toTajtsin Dios ijkin kichiuas?
24 Ajsikiuij barcos tlen uitsej itempa Kitim,
kitlajyouiltiskej Asiria
uan kitlajyouiltiskej Éber.
Pero ye noijki kipojpoloskej”.
25 Satepan Balaam omoketski uan omokopki kanin okatka, uan Balac noijki oyajki.