Éxodo
1 Ijkin omotokayotiayaj ikoneuan Israel tlen iuan oajsitoj Egipto, sejse tlakatl oajsito iuan ifamilia: 2 Rubén, Simeón, Leví uan Judá. 3 Isacar, Zabulón uan Benjamín. 4 Dan, Neftalí, Gad uan Aser. 5 Nochtin ixuiuan Jacob okatkaj 70 uan José yochantiaya Egipto. 6 Satepan José omiki, noijki omikej nochtin ikniuan uan akinmej ijkuakon oyoltokaj. 7 Israelitas okinpixkej miakej inkoneuan uan opejki momiakiliaj. San niman omomiakilijkej uan omochijkej sapanoua chikauakej, ikinon okitemitijkej non tlali.
8 Satepan okse tekiua tlen amo okixmatiaya José opejki tlanauatia Egipto. 9 Ye okilui ialtepe: “Israelitas okachi miakej uan okachi chikauakej amo ken tejuan. 10 Moneki kuali tikitaskej tlen tikchiuaskej para ayakmo mamomiakilijtokan. Tla amo ijkon tikchiuaskej ijkuak mochiuas se guerra, yejuan kinpaleuiskej akinmej techkokoliaj, techmijmiktiskej uan yaskej”.
11 Yejuan okintlalijkej akinmej okinnauatiayaj tlakeualmej para chikauak makintekipanoltikan israelitas uan ijkon okintlajyouiltiayaj. Okinchiualtijkej makichiuakan altepetl Pitom uan Raamsés, ompa okitlatiayaj tlakuali uan tlen okatka iaxka faraón. 12 Pero ijkuak okachi okintlajyouiltiayaj, israelitas okachi omomiakiliayaj uan omoxitiniayaj. Egipcios sapanoua okinmimakasiayaj* israelitas. 13 Ikinon okinchiualtijkej israelitas mayetokan tlakeualmej uan chikauak okintekipanoltijkej. 14 Fiero okintlajyouiltiayaj porque chikauak okintekipanoltiayaj. Okinchiualtiayaj makipatlakan tlali uan makinchiuakan adobes, noijki okinnauatijkej makichiuakan tlatlamantli tekitl itech tlalmej. Okintlajyouiltijkej uan chikauak okintekipanoltijkej ika tlatlamantli tekitl tlen okichiuayaj tlakeualmej.
15 Satepan tekiua tlen otlanauatiaya Egipto, omotlapoui inuan ome parteras tlen okatkaj hebreas. Se omotokayotiaya Sifrá uan okse omotokayotiaya Pua. 16 Tekiua okinmilui: “Ijkuak nankinpaleuiskej hebreas manesikan* inkoneuan uan nankitaskej katej ipan silla kanin kipiaskej inkone, moneki ijkin nankichiuaskej: tla kipiaskej se chokotsin, xikmiktikan. Pero tla kipiaskej se takotsin, amo xikmiktikan”. 17 Pero parteras sapanoua okitlakaitayaj* akin melauak toTajtsin Dios. Amo okichijkej tlen okinnauati tekiua tlen otlanauatiaya Egipto uan amo okinmiktiayaj chokotsitsintin. 18 Satepan tekiua tlen otlanauatiaya Egipto, okinnotski parteras uan okintlajtlani: “¿Tleka amo onankinmiktijkej chokomej?”. 19 Parteras okinankilijkej faraón: “Siuamej hebreas amo ken egipcias. Yejuan chikauakej uan kipiaj inkone achto ajsiti partera”.
20 ToTajtsin Dios okinteochi parteras uan israelitas okachi omomiakiliayaj uan okachi omochiuayaj chikauakej. 21 Parteras okiteititijkej sapanoua okitlakaitayaj akin melauak toTajtsin Dios. Ikinon satepan ye okichi makinpiakan inkoneuan. 22 Satepan faraón okinauati nochi ialtepe: “Xikintlamotlakan ijtik aueyatl* Nilo, nochtin chokomej hebreos tlen yikin oneskej,* pero xikinkauilikan takomej mayoltokan”.