Rut
1 Akinmej ochantiayaj Israel amo okipiayaj tlen kikuaskej ijkuak jueces otlaixkomakayaj. Ikinon se tlakatl tlen ochantiaya Belén de Judá ochantito altepetl Moab iuan isiua uan ome ikoneuan. 2 Non tlakatl omotokayotiaya Elimélec,* isiua omotokayotiaya Noemí.* Noijki ome ikoneuan omotokayotiayaj Mahlón* uan Kilión.* Yejuan oneskej* Efrata, kijtosneki Belén de Judá. Satepan oajsitoj altepetl Moab uan ompa omokajkej.
3 Elimélec omiki ijkuak ompa okatkaj, ikinon Noemí uan ome ikoneuan omokajkej inselti. 4 Satepan itelpochuan omonamiktijkej inuan siuamej tlen ochantiayaj Moab: se omotokayotiaya Orpá uan okse omotokayotiaya Rut. Yejuan ompa omokajkej kanaj majtlaktli xiuitl. 5 Satepan Mahlón uan Kilión noijki omikej, ikinon Noemí ayakmo okipiaya inamik nion ikoneuan. 6 Ijkuakon ye okijto mokopaskia ialtepe uan iuan oyajkej isiuamonuan. Porque ompa Moab, Noemí okikak Jehová oksepa okiteochijtoka ialtepe uan okimakatoka tlen kikuas.*
7 Noemí uan ome isiuamonuan okiskej kanin ochantiayaj. Ijkuak onejnentiayaj para ajsiskiaj tlali Judá, 8 Noemí okinmilui isiuamonuan: “Okachi kuali xiakan uan ximokopakan ikalijtik sejse namomama. Jehová manamechtlasojtla uan amo manamechkaua ijkon ken namejuan onankintlasojtlakej uan amo onankinkajkej notelpochuan nion ne. 9 Jehová manamechmaka akin iuan nanmonamiktiskej uan se namochan kanin kuali nanyetoskej”. Satepan okinpipitso* uan otlauelchokakej. 10 Pero yejuan okiluiayaj: “Amo timokopaskej, mouan tiaskej uan tichantiskej moaltepe”. 11 Pero Noemí okinmilui: “Nochpochuan, ximokopakan. ¿Tleka nankinekij nouan nanyaskej? ¿Kox ok uelis nikinpias nokoneuan para inuan nanmonamiktiskej? 12 Nochpochuan ximokopakan, ne yonikokoxkatik* uan ayakmo uelis nimonamiktis. Matikijtokan uelis nimonamiktis nin youak uan nikinpias nokoneuan, 13 ¿nankinchiaskej mamoskaltikan para uelis inuan nanmonamiktiskej? ¿Nanmochiaskej uan nanyetoskej namoselti? Amo nochpochuan. Jehová nechtlajyouiltijtok uan nimoyolkokoua miak ijkuak nikita namejuan noijki nantlajyouiaj”.
14 Ijkuakon yejuan oksepa otlauelchokakej. Satepan Orpá okipipitso* imonna uan oyajki, pero Rut amo okinek kikajteuas imonna. 15 Ikinon Noemí okilui: “Ximokopa iuan Orpá porque ye yomokopki ialtepe uan okinueyichiuato idioses”.
16 Pero Rut okilui: “Amo techchiualti manimitskajteua uan oksekan manio. Porque ne nias kanin te tias uan ne nimokauas kanin te timokauas. Moaltepe yetos noaltepe uan moDios yetos noDios. 17 Kanin te timikis ne nimikis uan ompa nechtokaskej. Tla niyoltok amo nimitskajteuas, Jehová fiero manechtlajyouilti tla nimitskajteuas”.
18 Ijkuak Noemí okitak Rut amo okinekiaya yas, ayakmo itlaj okilui. 19 Uan yejuan ome oyajkej Belén. Ijkuak oajsitoj, nochtin akinmej ompa ochantiayaj omotlajtlachialtijkej uan siuamej okijtojkej: “¿Ye Noemí?”. 20 Uan ye okinmilui: “Amo techiluikan Noemí,* techiluikan Mara* porque akin kipia nochi chikaualis okichi sapanoua manimoyolkoko. 21 Nochi onikpiaya ijkuak onia pero Jehová okichi manimokopati uan ayakmo itlaj nikpia. ¿Tleka nantechiluiaj Noemí? Jehová nechtlajyouiltia, akin kipia nochi chikaualis okichi sapanoua manitlajyoui”.
22 Ijkon opanok ijkuak Noemí okiski altepetl Moab uan omokopki ikalijtik iuan isiuamo tlen omotokayotiaya Rut uan okatka moabita. Ijkuak oajsitoj altepetl Belén ompa yikin okololojtokaj cebada.