Achto ilibro Samuel
12 Satepan Samuel okinmilui nochtin israelitas: “Onikchi nochi tlen onantechtlajtlanilijkej uan oniktlali se tekiua para manamechnauati. 2 ¡Nikan kajki tekiua tlen nanmechyekanas! Ne yonikokoxkatik,* yonikuaistayak uan nokoneuan namouan katej. Desde ijkuak onikatka nitelpochtli hasta axkan ne namechyekantiuits. 3 Axkan ok nikan nika, ikinon techiluikan: ¿Se tonal ikaj onikixtili itoro noso iburro? ¿Ikaj oniktlachteki noso oniktlajyouilti? ¿Itlaj onechmakakej para amitlaj manikijto? Tla ikaj ijkon onikchiuili, manechtelui ixpan Jehová uan ixpan akin ye okipejpenki uan ne nikopilis”. 4 Yejuan okinankilijkej: “Amikaj otiktlachtekili nion amikaj otiktlajyouilti uan amo keman itlaj otikseli”. 5 Samuel okijto: “Amikaj uelis nechteluis porque axkan Jehová kikaktok nochi nin uan akin okipejpenki noijki kikaktok”. Yejuan otlanankilijkej: “Ye nochi kikaktok”.
6 Satepan Samuel okinmilui israelitas: “Jehová akin kikaktok nochi nin, ye okichi Moisés uan Aarón makinkixtikan namouejkatatajuan ompa Egipto. 7 Axkan ximonechikokan porque namechixkomakas ixpan Jehová uan nikilnamiktos nochi tlamantli kuali tlen Jehová okichi por namejuan uan namouejkatatajuan”.
8 “Ijkuak Jacob oajsito Egipto, namouejkatatajuan okitlatlaujtijkej Jehová makinpaleui ikinon Jehová okititlanki Moisés uan Aarón para makinkixtikan ompa Egipto uan okinualikakej nikan machantikij. 9 Pero namouejkatatajuan okilkajkej Jehová inDios ikinon ye okinka imak Sísara akin okinyekanaya isoldados Hazor. Noijki okinka inmak filisteos uan akin otlanauatiaya Moab, yejuan okinmixnamikej. 10 Israelitas okitlatlaujtijkej Jehová makinpaleui uan okiluijkej: ‘Jehová, otitlajtlakolchijkej porque otimitskajkej uan opejki tikinueyichiuaj Baales uan imágenes de Astoret. Pero axkan techmakixti inmak akinmej techkokoliaj para oksepa timitstekichiuiliskej’. 11 Jehová okititlanki Jerubaal, Bedán, Jefté uan Samuel para manamechmakixtikan inmak akinmej namechkokokoliaj uan ijkon namejuan kuali nanyetoskiaj. 12 Pero ijkuak onankitakej onamechixnamikiko Nahás akin kinnauatia ammonitas, namejuan miak uelta onantechiluijkej: ‘¡Tejuan tiknekij se tekiua!’ pero onankilkajkej Jehová namoDios ye namoTekiua. 13 ¡Xikitakan Jehová okitlali se tekiua para namejuan! Nikan kajki namotekiua tlen onankitlajtlankej uan onankipejpenkej. 14 Kuali nanyetoskej tla namejuan sapanoua nankitlakaitaj* Jehová, nankitekichiuiliaj, nankitlakamatij* uan tla amo nankixnamikij tlen Jehová tlanauatia. Noijki kuali nanyetoskej tla namejuan uan namotekiua nankiueyichiuaj Jehová namoDios. 15 Pero tla amo nankitlakamatij tlen Jehová kijtoua uan nankixnamikij tlen Jehová tlanauatia, Jehová namechtlajyouiltis uan kintlajyouiltis namopapanuan. 16 Ikinon ximonechikokan uan xikitakan Jehová kichiuas namoixpan itlaj tetlajtlachialti. 17 Namejuan yinankimatij yoajsik tonal para kololoskej trigo. Nikiluis Jehová makichiua matlatijtikuini uan makiaui. Ijkon nankimatiskej uan nankajsikamatiskej* amo kuali tlen onankichijkej ixpan Jehová, ijkuak onankitlajtlankej se tekiua”.
18 Satepan Samuel okitlatlaujti Jehová uan non tonal Jehová okichi matlatijtikuini uan makiaui. Ijkuakon nochtin israelitas sapanoua okimakasikej* Jehová uan Samuel. 19 Nochtin israelitas okiluijkej Samuel: “Tejuan san timotlakeualuan, topatka xiktlatlaujti Jehová moDios. Tejuan okachi otitlajtlakolchijkej ijkuak otiktlajtlankej se tekiua pero amo tiknekij timikiskej”.
20 Pero Samuel okinmilui israelitas: “Namejuan onankichijkej tlen amo kuali pero amo ximomojtikan. Xiktekichiuilikan Jehová ika nochi namoyolo uan amo keman xikkauakan Jehová. 21 Amo xikkauakan namoDios uan amo xikinueyichiuakan dioses tlen amitlaj inpati porque nonmej dioses amo tlapaleuiaj uan amikaj uelis kimakixtiskej. 22 Jehová amo namechkauas israelitas porque itoka ueyititok uan Jehová yonamechpejpenki para xiyetokan ialtepe. 23 Ne amo uelis nikkauas nimotlatlaujtis namopatka. Tla ijkon nikchiuaskia, nitlajtlakolchiuaskia ixpan Jehová. Ne ok namechmachtis ken uelis nankichiuaskej tlen kuali uan tlen moneki. 24 Pero namejuan sapanoua xiktlakaitakan* Jehová. Noijki ika nochi namoyolo nochipa xiktekichiuilikan uan amo xikilkauakan nochi tlamantli tlen ye yokichi namopatka. 25 Pero tla namejuan uan namotekiua ok nankichiuaj tlen amo kuali, nanmechmiktiskej”.