Jueces
13 Israelitas oksepa opejki kichiuaj tlen amo kuali ixpan Jehová. Ikinon Jehová okinka 40 xiuitl inmak filisteos.
2 Ijkuakon okatka se tlakatl tlen omotokayotiaya Manóah, tlen ialtepe okatka Zorá. Ye opouiaya itech ifamilia Dan. Isiua Manóah amo ueli okinpiaya ikoneuan. 3 Pero se tonal iángel Jehová okimonextili non siuatl uan okilui: “Maski te amo ueli tikinpia mokoneuan, satepan tikpias se chokotsin. 4 Amo moneki tikonis vino nion okseki tlamantli tlen teuintia, nion amo moneki tikkuas itlaj tlen sokio. 5 Xikkaki, te tikpias se chokotsin. Amo moneki kitekiliskej itsonkal, porque toTajtsin Dios okipejpenki chokotsin desde achto nesis* mayeto nazareo. Uan ye peuas kinmakixtis israelitas inmak filisteos”.
6 Satepan non siuatl oyajki okiluito inamik: “Se tlakatl tlen kitekichiuilia akin melauak toTajtsin Dios onechitako. Sapanoua tetlajtlachialti omotaya, porque omotaya ken se iángel akin melauak toTajtsin Dios. Amo oniktlajtlani de kanin oualaya uan ye amo onechilui tlen itoka. 7 Pero onechilui: ‘Xikkaki, te tikpias se chokotsin ikinon amo moneki tikonis vino nion okseki tlamantli tlen teuintia, nion amo moneki tikkuas itlaj tlen sokio. Porque toTajtsin Dios okipejpenki chokotsin para mayeto nazareo maski ayamo nesi uan ijkon yetos hasta ijkuak mikis’”.
8 Manóah okitlatlaujti Jehová: “Techtlapojpolui Jehová, nimitstlatlaujtia, oksepa mauiki tlakatl tlen kitekichiuilia akin melauak toTajtsin Dios para matechilui ken moneki tikiskaltiskej chokotsin tlen nesis”. 9 Akin melauak toTajtsin Dios okikak Manóah, ikinon iángel akin melauak toTajtsin Dios oksepa okitato siuatl ijkuak okatka* tlala. Pero Manóah amo okatka iuan isiua. 10 Siuatl san niman okiluito inamik: “¡Xikita! Oksepa onechmonextili tlakatl tlen yonechmonextilijka”.
11 Manóah san niman oyajki iuan isiua kanin okatka non tlakatl uan okitlajtlani: “¿Te akin otimotlapoui iuan nosiua?”. Ye okinankili: “Kema”. 12 Ijkuakon Manóah okilui: “¡Mamochiua tlen otikijto! Pero techilui, ¿ken moneki moskaltis chokotsin? ¿Uan tlen kichiuas?”. 13 Iángel Jehová okinankili Manóah: “Yonikilui mosiua tlen amo moneki kichiuas. 14 Amo moneki kikuas uvas nion itlaj tlen okichijkej ika uvas, amo moneki konis vino nion okseki tlamantli tlen teuintia, nion amo moneki kikuas itlaj tlen sokio. Moneki kichiuas ijkon ken yoniknauati”.
15 Ijkuakon Manóah okilui iángel Jehová: “Nimitstlatlaujtia ayamo xio, timitsyektlaliliskej se tentsojkonetl”. 16 Pero iángel Jehová okilui Manóah: “Tla nimokauas, amo nikkuas tlakuali. Pero tla tikneki xikmaka Jehová se tetliokolil tlen mochichinoua”.* Pero Manóah amo okimatiaya non tlakatl okatka iángel Jehová. 17 Ijkuakon ye okilui iángel Jehová: “¿Tlen motoka? Tiknekij tikmatiskej para timitsueyichiuaskej ijkuak mochiuas tlen otikijto”. 18 Pero iángel Jehová okinankili: “¿Tleka techtlajtlania notoka? ¿Amo tikita notoka tetlajtlachialti?”.
19 Manóah okonanki tentsojkonetl, tetliokolil tlen mochiua ika semilla uan okimakak Jehová ipan se tetl.* Ijkuak Manóah iuan isiua ompa okatkaj, toTajtsin Dios okichi itlaj tetlajtlachialti. 20 Ijkuak tlitl tlen okatka itech altar otlejkouaya iluikak, Manóah iuan isiua okitakej iángel Jehová otlejkok itlajkotia tlitl. Yejuan san niman omoixtlapachojkej tlalpan. 21 Ijkuakon Manóah okajsikamatki* okatka iángel Jehová. Manóah iuan isiua ayakmo keman okitakej iángel Jehová. 22 Manóah okilui isiua: “¡Timikiskej porque otikitakej toTajtsin Dios!”. 23 Pero isiua okilui: “Tla Jehová kinekiskia techmiktis, amo kiseliskia tetliokolil tlen otikchichinojkej* nion tetliokolil tlen mochiua ika semilla. Noijki amo techititiskia tlen otikitakej nion techiluiskia tlen otechilui”.
24 Satepan isiua Manóah okipixki ikone uan okitokayoti Sansón. Jehová okiteochiuaya chokotsin ijkuak omoskaltijtiaya. 25 Satepan Sansón okiseli iespíritu Jehová uan opejki kipaleuia ijkuak okatka Mahané-Dan, tlen kajki itlajkotia altepetl Zorá uan altepetl Estaol.