Jueces
12 Ijkuakon okinnechikojkej tlakamej tlen pouij itech itribu Efraín. Okipanouijkej aueyatl* uan oyajkej ik Zafón,* yejuan okikualankailuijkej Jefté: “¿Tleka amo otechilui mouan matiakan ijkuak otikinmixnamikito ammonitas? Ikinon timitschichinoskej* te uan mokalijtik ijkuak ompa tiyetos”. 2 Pero Jefté okinnankili: “Ne uan noaltepe otimokualanijkej inuan ammonitas. Onanmechilui techpaleuikan pero namejuan amo onantechpaleuikoj. 3 Onikinmixnamikito ammonitas maski nimikiskia porque onikitak amo onantechpaleuikoj. Pero Jehová okichi manikintlanili ikinon ¿tleka axkan nankinekij nanechmiktiskej?”.
4 Satepan Jefté okinnechiko tlakamej tlen ochantiayaj Galaad uan okinmixnamikitoj tlakamej tlen pouij itech itribu Efraín. Tlakamej tlen ochantiayaj Galaad okintlanilijkej akinmej pouij itech itribu Efraín, akinmej okijtojkaj: “Namejuan galaaditas tlen nanchantij itech itlal itribu Efraín uan itribu Manasés, nanpouij itech itribu Efraín pero san nancholojtinemij”. 5 Akinmej ochantiayaj Galaad oyajkej ik kanin okipanouiayaj aueyatl Jordán uan ompa okinchiatoj tlakamej tlen pouij itech itribu Efraín. Uan ijkuak okinekiayaj choloskej akinmej pouij itech itribu Efraín, okijtouayaj: “Techkauili manipano”. Pero tlakamej tlen ochantiayaj Galaad sejse okintlajtlaniayaj: “¿Tiefraimita?”. Ijkuak otlanankiliaya: “¡Amo!”, 6 okiluiayaj: “Xikijto xibolet”. Pero ye okijtouaya: “Sibolet”, porque amo kuali okitenkixtiaya non tlajtoli. Ikinon okikitskiaya uan okimiktiaya ik kanin okipanouiayaj Jordán. Ijkuakon okinmiktijkej 42,000* efraimitas.
7 Jefté akin galaadita, okatka injuez israelitas chikuase xiuitl. Satepan omiki uan okitokakej itech ialtepe Galaad.
8 Ijkuak Jefté ayakmo oyoltoka, Ibzán tlen ochantiaya Belén omochi injuez israelitas. 9 Ye okinpixki treinta itelpochuan uan treinta ichpochuan. Okintitlanki ichpochuan mamonamiktitij inuan tlakamej tlen amo opouiayaj itech ifamilia. Uan okinualikak treinta siuamej para mamonamiktikan inuan itelpochuan. Ye okatka injuez israelitas chikome xiuitl. 10 Satepan Ibzán omiki uan okitokakej ompa Belén.
11 Ijkuak Ibzán ayakmo oyoltoka, Elón akin zabulonita okatka injuez israelitas majtlaktli xiuitl. 12 Satepan Elón akin zabulonita, omiki uan okitokakej ompa Ayalón itech itlal itribu Zabulón.
13 Ijkuak Elón ayakmo oyoltoka, Abdón ikone Hilel akin piratonita, omochi injuez israelitas. 14 Okinpiaya cuarenta ikoneuan uan treinta ixuiuan uan yejuan okipiayaj sejse inburro tlen ipan oyayaj. Ye okatka injuez israelitas chikueyi xiuitl. 15 Satepan Abdón ikone Hilel akin piratonita, omiki uan okitokakej ompa Piratón tlen kajki Efraín, itech tepetl tlen inmiaxka amalequitas.