Jueces
19 Itech nonmej tonalmej ijkuak israelitas amo okipiayaj intekiua, okatka se levita tlen ochantiaya sapanoua uejka ik tepeyo tlen kajki Efraín, okitemo okse isiua tlen ialtepe okatka Belén ompa Judá. 2 Pero non siuatl okikajkaya inamik uan oyajki naui metstli ikalijtik ipapa ompa altepetl Belén tlen kajki Judá. 3 Ijkuakon inamik okitemoto para oksepa iuan mamokopa, ye okiuikaya itlakeual uan ome burros. Siuatl okipanolti inamik ikalijtik ipapa uan ye opaki ijkuak okitak. 4 Ijkuakon imonta levita okilui ompa iuan mamokaua eyi tonal. Otlakuajkej, itlaj okonikej uan levita ompa okochki.
5 Ijkuak oajsik tonal naui san kualkan* omejkej para yaskiaj, ipapa non siuatl okilui imo: “Xitlakuajteua para titlaxikos uan satepan nanyaskej”. 6 Ijkuakon yejuan ome san sekan otlakuajkej uan itlaj okonikej. Satepan ipapa non siuatl okilui imo: “Nimitstlatlaujtia, ximokaua nin youak uan xiyolpaki”. 7 Ijkuak non tlakatl omoketski para yaskia, imonta miak uelta okilui mamokaua uan ye oksepa ompa omoka non youak.
8 Ijkuak oajsik tonal makuili uan san kualkan omejki para yaskia, ipapa non siuatl okilui imo: “Nimitstlatlaujtia, xitlakuajteua para titlaxikos”. Yejuan ome yolik otlakuajkej hasta otiotlakik. 9 Ijkuak non tlakatl omoketski para yaskia iuan tlen okatka okse isiua uan itlakeual, ipapa non siuatl okilui: “Xikita, yitlayouas. Nimitstlatlaujtia nikan ximokauakan nin youak, nin tonal yitlamis. Nikan ximokaua nin youak uan xiyolpaki, mostla san kualkan uelis nanyaskej para namajsitiuij mokalijtik”. 10 Pero non tlakatl ayakmo okinek ompa mokauas non youak. Ikinon omoketski uan oyajki hasta altepetl Jebús noso Jerusalén. Oyaya iuan isiua, itlakeual uan ome iburros tlen okinpejpechti.
11 Ijkuak yiajsiskiaj altepetl Jebús okachi yotlayouatoka. Ijkuakon itlakeual okitlajtlani: “¿Tleka amo tikalakij itech inmialtepe jebuseos uan ompa timokauaj nin youak?”. 12 Pero iteko okinankili: “Amo moneki tikalakiskej kanin chantij akinmej amo israelitas. Matinejnemikan hasta altepetl Guibeá”. 13 Ikinon okilui itlakeual: “Tiauij, matimochijchikauakan matiajsitij Guibeá noso Ramá. Timokauaskej nin youak itech se de nonmej altepemej”. 14 Yejuan ok onejnenkej uan ijkuak yiajsiskiaj altepetl Guibeá tlen kajki Benjamín, tonaltsin ayakmo omotaya.
15 Ijkuak oajsitoj Guibeá, ompa okalakej para mokauaskiaj non youak. Ijkuak okatkaj itech non altepetl, omotlalijkej ompa centro pero amikaj okinmiluiaya mamokalotitij ikalijtik. 16 Non youak se tlakatl tlen yokokoxkatik* otekipanoto tlala, satepan oajsito ompa centro. Ialtepe non tlakatl okatka itech tepeyo tlen kajki Efraín pero ochantito seki tonalmej altepetl Guibeá. Tlakamej tlen ompa ochantiayaj okatkaj benjaminitas. 17 Ijkuak akin yokokoxkatik okitak non tlakatl okatka centro, okitlajtlani:“¿Kanin tio? ¿De kanin tiuits?”. 18 Ye okinankili: “Tiuitsej de altepetl Belén tlen kajki Judá uan tiauij noaltepe tlen sapanoua uejka kajki ik itepeyo Efraín. Oniuia Belén tlen kajki Judá uan axkan nio ikalijtik Jehová pero nikan amikaj nechkalotia. 19 Tikualikaj miak tlakuali para toburros, noijki tikualikaj pan uan vino para ne, nin siuatl uan totlakeual. Amitlaj techpoloua”. 20 Akin yokokoxkatik kuali okiseli uan okilui: “Ne nimitsmakas nochi tlen mitspoloua pero amo ximokaua nikan centro nin youak”. 21 Ye okiuikak non tlakatl ikalijtik uan okintlamakak iburros. Yejuan omokxipajpakej, satepan otlakuajkej uan itlaj okonikej.
22 Ijkuak yejuan opaktokaj, sekimej tlakamej tlen amitlaj inpati tlen ik ompa ochantiayaj, okiyaualojkej kali uan opejki kiuiuitekij* puerta. Yejuan okiluiayaj akin yokokoxkatik: “¡Xikkixti tlakatl tlen kajki mokalijtik para iuan timotekaskej!”. 23 Akin yokokoxkatik, okiski uan okinmilui: “Amo nokniuan, namechtlatlaujtia amo xikchiuakan tlen sapanoua amo kuali. Nin tlakatl mokajtok nokalijtik, amo xikchiuakan itlaj sapanoua tepinati. 24 Nikan kajki nochpoch tlen ayamo moteka iuan se tlakatl uan noijki okse isiua nin tlakatl. Nikinkixtis uan xikinchiualtikan namouan mamotekakan tla ijkon nankinekij pero amo xiktoktikan* itlaj sapanoua tepinati nin tlakatl”.
25 Tlakamej amo okichijkej ijkon ken ye okinmilui, ikinon levita okikixti isiua uan okinmaktili nonmej tlakamej. Yejuan okichiualtijkej inuan mamoteka nochi youak, hasta ijkuak yitlanesiskia uan okikauilijkej mauia ijkuak yotlaneski. 26 San kualkan non siuatl oajsito ikalijtik akin yokokoxkatik, kanin okatka inamik. Non siuatl ouetsito kaltempa uan ompa omoka hasta ijkuak kuali otlaneski. 27 Ijkuak inamik san kualkan omejki para yaskia, okintlapo puertas uan okitak isiua ouetoka kaltempa. Imauan non siuatl okatkaj kaltentli. 28 Non tlakatl okilui isiua: “Ximeua, tiauij”. Pero ye amo okinankili ikinon non tlakatl okitlejkolti ipan iburro uan oyajki ikalijtik.
29 Ijkuak oajsito ikalijtik okitemo se cuchillo, okikitski icuerpo isiua uan okitejteki 12 pedazos. Satepan itech sejse intribu israelitas okititlanki se pedazo. 30 Nochtin akinmej ijkon okitakej, okijtojkej: “Amo keman ijkon opanouaya uan amo keman ijkon otikitayaj desde ijkuak israelitas okiskej altepetl Egipto. Namejuan ximoyektlapouikan uan techiluikan tlen tikchiuaskej”.