Achto ilibro Samuel
5 Ijkuak filisteos yokipixtokaj iArca akin melauak toTajtsin Dios, okiuikakej desde Ebenézer hasta Asdod. 2 Satepan filisteos okiuikakej iArca akin melauak toTajtsin Dios itech itemplo indios Dagón uan okitlalijkej inakastlan Dagón. 3 Mostlatika, akinmej ochantiayaj Asdod san kualkan* omejkej uan okajsikej Dagón oixtlapachitoka tlalpan iyekapan iArca Jehová. Ikinon okajkokuikej uan okitlalijkej kanin okatka. 4 Pero mostlatika san kualkan, Dagón oksepa oixtlapachitoka tlalpan iyekapan iArca Jehová. Itsonteko uan imauan Dagón okintekej uan okatkaj kaltentli. San omokaj icuerpo tlen okatka ken michi. 5 Ikinon hasta axkan, iteopixkauan Dagón uan oksekimej ijkuak kalakij itech itemplo ompa Asdod amo moketsaj kaltentli.
6 Jehová okintlajyouilti akinmej ochantiayaj Asdod uan akinmej ik ompa ochantiayaj. Ye okichi matsinsauayokisakan uan ijkon okinkojko. 7 Ijkuak tlakamej tlen ochantiayaj Asdod okitakej tlen opanotoka, okijtojkej: “Ayakmo moneki touan yetos iArca inDios israelitas, porque ye fiero otechtlajyouilti uan noijki okitlajyouilti todios Dagón”. 8 Ikinon okinnechikojkej nochtin akinmej okinnauatiayaj filisteos uan okintlajtlanijkej: “¿Tlen moneki tikchiuaskej ika iArca inDios israelitas?”. Yejuan otlanankilijkej: “Moneki tikuikaskej iArca inDios israelitas ompa Gat”. Ijkuakon ompa okiuikakej.
9 Ijkuak Arca okikauatoj Gat, akinmej ompa ochantiayaj sapanoua omomojtijkej porque Jehová okintlajyouilti. Ye okintlajyouilti akinmej yokipiayaj miak xiuitl uan konemej, nochtin akinmej ompa ochantiayaj okichi matsinsauayokisakan. 10 Ikinon iArca akin melauak toTajtsin Dios okiuikakej Ecrón. Pero ijkuak Arca ompa okiuikakej, ecronitas opejki chikauak tsajtsij uan okijtojkej: “¡Otechualikilijkej iArca inDios israelitas para techmiktiskej uan noijki mamikikan akinmej nikan chantij!”. 11 Ijkuakon okinnechikojkej nochtin akinmej okinnauatiayaj filisteos uan okinmiluijkej: “Xikixtikan iArca inDios israelitas uan oksepa xikuikakan kanin okatka, para ijkon amo timikiskej tejuan uan akinmej nikan chantij”. Nochtin akinmej ompa ochantiayaj omomojtiayaj porque omokuayejyekouayaj* mikiskej. Porque akin melauak toTajtsin Dios fiero okintlajyouilti, 12 akinmej amo omikej otlajyouijkej porque otsinsauayokiskej. Akinmej ochantiayaj itech altepetl chikauak okijtouayaj makinpaleuikan uan hasta iluikak omokakiaya ken otsajtsiayaj.