Apocalipsis

10 Onikitak okse ángel chikauak tlen oualtemouaya iluikak. Ye otlakentoka ika mixtli uan okipiaya se kosamalotl ipan itsonteko. Ixko okatka ken tonaltsin uan ikxiuan okatkaj ken tlaketsalmej tlen omotayaj ken tlitl. 2 Okikitskijtoka se rollo tsikitsin tlen ayakmo otetsilitoka.* Ikxi tlen kajki iyekma okitlali ipan mar pero ikxi tlen kajki iopochma okitlali ipan tlali. 3 Ijkuakon chikauak otsajtsik ken ijkuak tsajtsi se león. Ijkuak chikauak otsajtsik, otlajtojkej chikome tlatikuiniltin.

4 Ne yinitlajkuiloskia ijkuak otlajtojkej chikome tlatikuiniltin pero onikkak ikaj otlajto iluikak uan okijtouaya: “Ichtaka xiktlati tlen okijtojkej chikome tlatikuiniltin uan amo xikijkuilo”. 5 Ángel tlen onikitak omoketoka ipan mar uan ipan tlali, okajkokuik iyekma itech iluikak 6 uan okitemakak itlajtol ika itoka toTajtsin Dios akin nochipa yoltok, akin okichijchi iluikak, tlaltikpak, mar uan nochi tlen ompa onka. Okijto: “ToTajtsin Dios ayakmo okachi mochias. 7 Ijkuak ángel chikome yikipitsas trompeta, melauak mochiuas kuali tlajtoli santo tlen amo omomatiaya. ToTajtsin Dios okinmatilti non kuali tlajtoli iprofetas tlen okitekichiuiliayaj”.

8 Onikkak oksepa onechtlapoui akin otlajto iluikak. Ye onechilui: “Xio uan xikonana rollo tlen tlapotok uan kikitskijtok ángel. Non ángel moketok ipan mar uan ipan tlali”. 9 Ne onia kanin okatka ángel uan onikilui manechmaka rollo tsikitsin. Ye onechilui: “Xikonana rollo uan xikkua. Mokamak tsopelias ken neujtli* pero moijtik chichias”. 10 Onikonanki rollo tsikitsin tlen okikitskijtoka ángel uan onikkua. Nokamak otsopeliak ken neujtli* pero noijtik ochichiak ijkuak onikkua. 11 Satepan onechiluijkej: “Moneki oksepa tiktematiltis tlen toTajtsin Dios okijto kinpanos tlatlamantli altepemej, akinmej nouian chantij, akinmej tlatlamantli intlajtol uan miakej tekiuajkej”.