Génesis
34 Dina okatka ichpoch Lea tlen okipixki iuan Jacob. Dina oyaya kinmitati ichpochmej tlen ochantiayaj itech non altepetl. 2 Se tonal Siquem okitak Dina, Siquem okatka ikone Hamor tlen okatka heveo, Hamor noijki otlayekanaya itech non altepetl. Ijkuakon Siquem okiuikak Dina uan okichiualti iuan mamoteka. 3 Uan ye sapanoua okipakti Dina ichpoch Jacob. Siquem opejki kitlasojtla ichpochtli uan okilui okitlasojtlaya. 4 Satepan Siquem okilui ipapa tlen omotokayotiaya Hamor: “Techtlajtlaniliti non ichpochtli para mayeto nosiua”.
5 Ijkuak Jacob okimatki Siquem okipijpinati Dina, ikoneuan okatkaj tlala okinmaluijtokaj yolkamej. Jacob okijto amitlaj kijtoskia hasta ijkuak ikoneuan mokopaskiaj. 6 Satepan Hamor ipapa Siquem, oyajki omotlapouito iuan Jacob. 7 Pero ikoneuan Jacob okimatkej tlen opanok uan san niman omokopkej. Amo kuali omomachilijkej uan fiero okualankej porque Siquem okipinaui Israel ijkuak omotekak iuan ichpoch Jacob, fiero tlen okichi.
8 Hamor inuan omotlapoui uan okinmilui: “Nokone Siquem sapanoua kipaktia namochpoch, namechtlatlaujtia xikmakakan para mayeto isiua. 9 Matikinnamiktikan tokoneuan uan ijkon tikinsetiliskej tofamilias. Techinmakakan namochpochuan uan xikinuikakan tochpochuan para namejuan. 10 Uelis touan nanchantiskej uan itech totlal uelis nankipejpenaskej san kanin nankinekiskej. Ximokauakan, nikan xitlanemakakan uan xichantikan itech nin tlali”. 11 Ijkuakon Siquem okilui ipapa uan ikniuan Dina: “Namechmakas san tlen nantechtlajtlaniliskej porque nikneki techselikan. 12 Uelis nantechtlajtlaniliskej patio maniktlaxtlaua para nantechmakaskej novia uan noijki techtlajtlanilikan se ueyi tetliokolil. Ne namechmakas san tlen nankinekiskej, pero namechtlatlaujtia techmakakan ichpochtli para mayeto nosiua”.
13 Pero ikoneuan Jacob okijtojkej kikajkayauaskiaj Siquem uan ipapa, porque Siquem okipijpinati inmikni Dina. 14 Yejuan okiluijkej: “Amo uelis ijkon tikchiuaskej, porque tepinati tikmaktiliskej tokni se tlakatl tlen amo okimokuaximili itlakayo.* 15 Uelis ijkon tikchiuaskej tla nochtin tlakamej tlen katej namouan, kimokuaximiliaj intlakayo* ijkon ken tejuan otikmochiuilijkej. 16 Satepan timechinmakaskej tochpochuan uan tikinuikaskej namochpochuan para tejuan. Namouan tichantiskej uan tiyetoskej san se altepetl. 17 Pero tla amo nankichiuaj tlen timechiluijtokej uan amo nankimokuaximiliaj namotlakayo,* tiaskej uan tikuikaskej tochpoch”.
18 Hamor uan Siquem kuali okitakej tlen okinmiluijkej makichiuakan. 19 Siquem san niman okichi tlen okiluijkej porque melauak okipaktiaya ichpoch Jacob. Itech nochi ikalijtik Hamor, Siquem okachi okitlakaitayaj.
20 Ijkuakon Hamor uan Siquem oyajkej kanin okatka ipuerta altepetl uan okinmiluijkej tlakamej tlen ompa ochantiayaj: 21 “Ninmej tlakamej kinekij kuali matimouikakan. Matikinkauilikan nikan matlanemakakan uan mamokauakan itech totlal. Porque ueyi totlal uan uelis ompa mokauaskej. Tejuan uelis timonamiktiskej inuan inmichpochuan uan noijki tikinmakaskej tochpochuan. 22 San okijtojkej matikmokuaximilikan totlakayo* ijkon ken yejuan okimochiuilijkej. San ijkon kinekiskej touan chantiskej uan tiyetoskej san se altepetl. 23 Yejuan kipiaj miak tlamantli uan noijki kinpiaj yolkamej uan non yetos toaxka. Matikchiuakan tlen otechiluijkej uan touan machantikan”. 24 Nochtin tlakamej tlen okisayaj itech ipuerta altepetl, okichijkej tlen Hamor uan Siquem okijtojkej. Nochtin tlakamej tlen okisayaj itech ipuerta altepetl, okimokuaximilijkej intlakayo.*
25 Tlakamej ok okinkokouaya intlakayo ijkuak opanok eyi tonal. Ijkuakon Simeón uan Leví ikoneuan Jacob tlen okatkaj ikniuan Dina, okonankej sejse espada uan oyajkej itech altepetl. Uan ompa okinmiktijkej nochtin tlakamej, amikaj okimatiaya ijkon panoskia. 26 Yejuan okinmiktijkej Hamor uan Siquem ika espada. Satepan okikixtijkej Dina itech ikalijtik Siquem uan oyajkej. 27 Oksekimej ikoneuan Jacob oajsitoj uan okinmitakej tlakamej tlen inmikniuan okinmiktijkej. Yejuan okikixtijkej nochi tlen okatka itech non altepetl porque okipijpinatijkej inmikni. 28 Okinuikakej ichkamej,* tentsomej, vacas, toros, burros uan nochi tlen okipiayaj itech altepetl uan tlen okatka intlala. 29 Noijki okimoaxkatijkej tlen okipiayaj, okinuikakej konemej, siuamej tlen ompa okatkaj uan okikixtijkej nochi tlen okipiayaj inkalijtik.
30 Ijkuak Jacob okimatki tlen opanok, okinmilui Simeón uan Leví: “Sapanoua onantechouijtilijkej, namotlajtlakol nechkokoliskej cananeos uan perizitas tlen nikan chantij. Tejuan amo timiakej, yejuan mosetiliskej para itlaj nechtoktiskej,* nechmiktiskej uan noijki akinmej chantij nokalijtik”. 31 Pero yejuan okijtojkej: “Amo tiktekauiliskiaj tokni makitoktikan* ken se siuatl tlen monemaka”.