Tlen okijkuilo Lucas

8 Satepan Jesús otetlapouito itech altepemej uan altepetsitsintin. Ye otetlapouiaya kuali tlajtoli tlen kijtoua toTajtsin Dios ualtlanauatis ipan tlaltikpak. Noijki iuan oyayaj 12 apóstoles. 2 Noijki sekimej siuamej tlen okinpajti uan oksekimej tlen okinkixtili ejekamej.* Ompa oyaya María tlen okiluiayaj Magdalena uan achto okinpiaya chikome ejekamej.* 3 Noijki ompa oyaya Juana isiua Cuza. Non tlakatl okitaya tekitl ichan Herodes. Noijki iuan oyayaj Susana uan oksekimej siuamej tlen okipaleuiayaj Jesús uan iapóstoles ika tlen okipiayaj.

4 Akinmej oualayaj itech tlatlamantli altepemej oyayaj kitatiuij Jesús uan miakej omonechikouayaj. Ye okinmilui nin neskayotl:* 5 “Se tlakatl okitokato* isemilla. Ijkuak otokaya,* seki semilla ouetski itempa ojtli ikinon ipan otlajtlaksakej* uan totomej okikuajkej. 6 Okseki semilla ouetski kanin teyo* pero ouaki ijkuak oixuak porque tlauaki kanin ouetski. 7 Okseki semilla ouetski ijtik uitsyo, pero omoskalti uitsyo uan okipacho. 8 Okseki semilla ouetski ipan kuali tlali uan oixuak. Ijkuak otlaki,* se semilla okitemakak 100”. Ijkuak Jesús otlanki okintlapoui, chikauak okijto: “¡Mayektlakaki akin kineki tlakakis!”.

9 Idiscípulos okitlajtlanijkej tlen okijtosnekiaya non neskayotl.* 10 Ye okinmilui: “Namejuan namechkauiliaj xikajsikamatikan seki tlamantli santo tlen amo omomatiaya itech iTekiuajkayo toTajtsin Dios. Pero oksekimej nikinmachtia ika neskayomej,* porque maski tlachiaj amitlaj kitaskej uan maski tlakakij amitlaj kajsikamatiskej. 11 Nin kijtosneki neskayotl.* Semilla kijtosneki iTlajtol toTajtsin Dios. 12 Semilla tlen ouetski itempa ojtli kijtosneki akinmej kikakij iTlajtol toTajtsin Dios, pero satepan uits Diablo uan kiuiuitla tlajtoli inyolipan, para amo matlaneltokakan uan amo mamomakixtikan. 13 Semilla tlen ouetski kanin teyo,* kijtosneki akinmej kikakij iTlajtol toTajtsin Dios uan san niman kineltokaj ika pakilistli, pero amo uejkatlan moneluayotia. Yejuan amo uejkika tlaneltokaj uan moxelouaj ijkuak tlajyouiaj. 14 Semilla tlen ouetski ijtik uitsyo kijtosneki akinmej kikakij iTlajtol toTajtsin Dios, pero kintekipachoua okseki tlamantli. Kinyoltilana tomin uan san kinekij moyolpaktiskej, ikinon non tlamantli kipachoua iTlajtol toTajtsin Dios uan kitemaka tlakilotl pero amo chikaua. 15 Semilla tlen ouetski ipan kuali tlali kijtosneki akinmej ika kuali inyolo kikakij iTlajtol toTajtsin Dios, kiseliaj, tlaxikouaj uan kitemakaj tlakilotl”.

16 “Amikaj kixotlaltia se tlauili uan satepan kitsakua ika se komitl noso kitlalia tlatlampa kanin kochi. Kitlalia kanin kintlauilis akinmej kalakiskej. 17 Porque se tonal monextis nochi tlen tlatitok, uan nochi tlen kuali tlatitok se tonal momatis uan amo nochipa tlatitos. 18 Kuali xitlakakikan porque akin itlaj kipia okachi kimakaskej. Pero akin amitlaj kipia kikixtiliskej tlen mokuayejyekoua* kipia”.

19 Ijkuakon imama uan ikniuan Jesús okitatoj, pero amo ouelik opanokej porque miakej ompa okatkaj. 20 Ikinon okiluitoj Jesús: “Momama uan mokniuan katej kiauak uan kinekij mitsitaskej”. 21 Ye okinnankili: “Akinmej kikakij uan kitlakamatij* iTlajtol toTajtsin Dios, yejuan nokniuan uan nomama”.

22 Se tonal, Jesús otlejkok itech se barco inuan idiscípulos. Ye okinmilui: “Matiakan okse lado itempa mar”. Uan oyajkej. 23 Pero Jesús okochki ijkuak oyayaj itech barco. Ijkuakon opejki chikauak ejeka uan barco yiapolakiskia porque opejki atemi. 24 Discípulos okijxititoj uan okiluijkej: “¡Tlamachti! ¡Tlamachti! ¡Timikiskej!”. Jesús omejki, okitlakaualti ejekatl uan atl. Satepan nochi san otlamoka. 25 Ye okintlajtlani: “¿Amo nantlaneltokaj?”. Yejuan omomojtijkej, omotlajtlachialtijkej uan okimoluiayaj: “¿Akin nin tlakatl? Hasta ejekatl uan atl kinnauatia uan kichiuaj tlen ye kijtoua”.

26 Satepan oajsitoj itempa altepetl Gerasa tlen kajki iyekapan altepetl Galilea. 27 Ijkuak Jesús otemok itech barco, se tlakatl tlen ompa ochantiaya okinamikito uan okipiaya se ejekatl.* Nin tlakatl amo okatka ichan porque ochantiaya itech panteón uan yiuejkika amo omotlakentiaya. 28 Ye chikauak otsajtsik ijkuak okitak Jesús, ixpan omotlankuaketski uan chikauak okilui: “¿Tlen otikchiuako nikan Jesús iKone Dios tlen Ueyititok? Nimitstlatlaujtia amo techtlajyouilti”. 29 (Porque Jesús yokiluijka ejekatl* makisa ijtik tlakatl. Nin ejekatl* miak uelta yokichijka tlakatl makichiua tlen ye kineki. Tlakatl miak uelta yokilpijkaj ika cadenas uan okimaluiayaj, pero ye nochipa okinkotonaya cadenas. Ejekatl* okichiuaya uejka mauia tlakatl). 30 Jesús okitlajtlani: “¿Tlen motoka?”. Ye okinankili: “Notoka Legión”. Porque miakej ejekamej* okatkaj ijtik tlakatl. 31 Yejuan okitlatlaujtijkej Jesús amo makintitlani kanin tlauejkatlan. 32 Ijkuakon miakej pitsomej* otlakuajtokaj itech tepetl, ikinon ejekamej* okitlatlaujtijkej Jesús makinkauili kalakiskej inmijtik pitsomej* uan ye okinkauili mayakan. 33 Yejuan okiskej ijtik tlakatl uan okalakej inmijtik pitsomej.* Ijkuakon pitsomej* omotlamotlatoj ijtik atl uan omelsinkej. 34 Akinmej okinmaluiayaj pitsomej* ocholojkej ijkuak okitakej tlen opanok. Noijki okintlapouitoj akinmej ochantiayaj itech altepetl uan akinmej ik ompa ochantiayaj.

35 Ijkuakon miakej otlachiatoj tlen opanok. Ijkuak ompa oajsitoj, tlakatl tlen okinpiaya ejekamej* okatka* ikxitlan Jesús. Nochtin omomojtijkej ijkuak okitakej tlakatl yotlakentoka uan yotlalnamikiaya. 36 Akinmej okitakej tlen opanok, okinmiluijkej akinmej otlachiatoj ken opajtik tlakatl. 37 Miakej tlen ochantiayaj ik Gerasa okiluijkej Jesús mauia porque yejuan sapanoua omomojtiayaj. Ye otlejkok itech barco uan oyajki. 38 Tlakatl tlen okinpiaya ejekamej* okitlatlaujti Jesús makikauili iuan mauia, pero Jesús amo okikauili uan okilui: 39 “Ximokopa mochan uan nochtin xikintlapoui ken omitspaleui toTajtsin Dios”. Tlakatl oyajki uan okitematilti itech nochi altepetl ken okipaleui Jesús.

40 Ijkuak Jesús omokopki, miakej kuali okiselijkej porque okichixtokaj. 41 Ijkuakon oajsito se tlakatl itoka Jairo tlen otlayekanaya itech sinagoga.* Ye omotlankuaketski ixpan Jesús uan okitlatlaujti mauia ichan, 42 porque yoixpolitoka itakotsin tlen okipiaya kanaj 12 xiuitl uan san se okipiaya.

Ijkuak Jesús yoyaya, miakej okipatsmiktiayaj. 43 Ompa noijki oyaya se siuatl tlen yokipiaya 12 xiuitl oeskisaya uan amikaj ueli okipajtiaya. 44 Ye omotoki ikuitlapan Jesús, okikitskili itempa itlaken uan ayakmo oeskiski. 45 Jesús otlajtlanki: “¿Akin onechkitski?”. Nochtin okijtouayaj amikaj okikitski, pero Pedro okilui: “ Tlamachti, miakej nikan katej uan mitspatsmiktiaj”. 46 Pero Jesús okijto: “Ikaj onechkitski porque onikmachili okiski nochikaualis”. 47 Siuatl opejki uiuioka ijkuak okitak amo uelis motlatiskia, omotlankuaketski ixpan Jesús uan okijto inmixpan nochtin tleka okikitski uan ken san niman opajtik. 48 Jesús okilui: “Nokone, yotipajtik porque titlaneltoka. Xio uan amo ximotekipacho”.

49 Ijkuak Jesús otlajtojtoka, oajsito se tlakatl tlen oualaya ichan Jairo uan okilui: “Motakotsin yoixpoliuik. Ayakmo xikkuejso Tlamachti”. 50 Jesús okikak tlen okijto tlakatl ikinon okilui Jairo: “Amo ximomojti uan xitlaneltoka porque motakotsin kuali yetos”. 51 Ijkuak Jesús oajsito ichan Jairo, okalak san inuan Pedro, Juan, Santiago, ipapa takotsin uan imama. 52 Nochtin ochokayaj uan omoelpanuitekiayaj porque omoyolkokouayaj ikinon ye okijto: “Ayakmo xichokakan porque takotsin san kochi uan amo oixpoliuik”. 53 Yejuan san okiuetskilijkej ijkuak ijkon okinmilui porque okimatiayaj takotsin yoixpoliuik. 54 Pero Jesús okimakitski takotsin uan okilui: “Takotsin ximeua”. 55 Takotsin omoyoliti uan oualme. Satepan Jesús otlanauati makitlamakakan. 56 Ipapa uan imama takotsin sapanoua opakej, pero Jesús okinnauati amikaj makiluikan tlen opanok.