Okse ilibro Samuel
7 Ijkuak tekiua okatka ikalijtik, Jehová okiyolseui ijkuak okimakixti inmak akinmej okikokoliayaj. 2 Ijkuakon tekiua okilui profeta Natán: “Nikan kanin ne nichanti okichijkej ika cedrokouitl pero iArca akin melauak toTajtsin Dios kajki ijtik se kaltsintli tlen okichijkej san ika tsotsoli”.* 3 Natán okinankili tekiua: “Xikchiua tlen kajki moyolipan* porque Jehová mouan kajki”.
4 Non youak Jehová ijkin okilui Natán: 5 “Xio, xikitati notekipanojka David uan xikilui: ‘Nin tlen kijtoua Jehová: “¿Tleka moneki techkalchiuis kanin nechueyichiuaskej? 6 Desde ijkuak onikinkixti israelitas Egipto uan hasta axkan amo keman onechueyichijkej itech se kali, yejuan onechueyichiuayaj itech kaltsintli uan tabernáculo tlen san okiuikatinemiayaj. 7 Ijkuak onikinyekanaya israelitas, ¿kox itlaj onikinmilui akinmej kinyekanaj intribus israelitas tlen onikintlali makimaluikan noaltepe? Kox onikintlajtlani ‘¿Tleka amo otechkalchiuijkej ika cedrokouitl?’”’. 8 Axkan xikilui notekipanojka David: ‘Nin tlen kijtoua Jehová akin kinnauatia nochtin ángeles: “Ne onimitspejpenki ijkuak otikinmaluiaya ichkamej* kanin sakayo* para tikinyekanas israelitas. 9 Mouan niyetos maski san kanin tias uan moixpan nikinpojpolos akinmej mitskokoliaj. Nikchiuas mamitstlakaitakan ijkon ken kintlakaitaj tlakamej tlen ueyititokej. 10 Nikinmakas israelitas kanin chantiskej, ompa mokauaskej uan chantiskej kanin amikaj makinkuejso.* Akinmej amo yolkualmej ayakmo kintlajyouiltiskej ijkon ken achto okintlajyouiltiayaj, 11 desde ijkuak onikintlali jueces itech noaltepe Israel. Ne nimitsyolseuis ijkuak nimitsmakixtis inmak akinmej mitskokoliaj.”’”
“‘“Noijki Jehová yomitsilui, Jehová kichiuas itech mofamilia makisakan akinmej tlanauatiskej.* 12 Ijkuak yitlamis monemilis uan timikis* ne nikchiuas se moxui, se mokone matlanauati uan itekiuajkayo uejkauas. 13 Ye nechkalchiuis kanin kiueyichiuaskej notoka uan ne nikchiuas nochipa matlanauati uan itekiuajkayo mauejkaua. 14 Ne niyetos itajtsin uan ye yetos nokone. Ijkuak itlaj amo kuali kichiuas, ne niktlakotemas uan niktlajyouiltis ijkuak nikuitekis* ijkon ken kichiuaj tlakamej. 15 Ye okachi niktlasojtlas uan amo nikkauas. Saúl akin moixpan onikachi,* achto oniktlasojtlaya pero satepan ayakmo oniktlasojtlak. 16 Mokalijtik uan motekiuajkayo nochipa yetos uan motrono noijki nochipa yetos”’”.
17 Natán okimatilti David nochi nonmej tlajtolmej uan nochi tlen okitak.
18 Satepan David oyajki uan omotlalito ixpan Jehová uan okijto: “ToTeko Jehová tejuatsin tiUeyititok, ne uan nofamilia amo technamiki nikan tiyetoskej. 19 ToTeko Jehová tejuatsin tiUeyititok, amo san non otikijto porque noijki tikijtoua, ikalijtik motekipanojka nochipa yetos uan non se tlanauatil para nochtin, toTeko Jehová tejuatsin tiUeyititok. 20 Tejuatsin okachi kuali techixmati, toTeko Jehová tejuatsin tiUeyititok, ¿tlen okachi uelis nimitsiluis? 21 Ika motlajtol uan ijkon ken tikneki yotikchi nin tlamantli tetlajtlachialti uan yotikmatilti motekipanojka. 22 Ikinon tejuatsin melauak tichikauak, toTeko Jehová tejuatsin tiUeyititok, amikaj onka ijkon ken tejuatsin uan san tejuatsin tiDios. Mochijtok nochi tlen otikkakej. 23 ¿Kox onka okse altepetl ijkon ken moaltepe Israel? NoDios te otikinmakixti para mayetokan moaxkauan. Ijkuak inpatka otikchi tlamantli tetlajtlachialti miakej omitsixmatkej. Te otikinmakixti israelitas Egipto para mayetokan moaxkauan, otikinpojpolo altepemej uan indioses. 24 Otikchi moaltepe Israel nochipa mayeto moaxka uan tejuatsin Jehová otimochi inDios”.
25 “ToTajtsin Dios Jehová amo xikilkaua tlen kipanos motekipanojka uan itekiuajkayo uan nochipa xikchiua tlen yotikijto. 26 Motoka nochipa makitlakaitakan uan makijtokan: ‘Jehová akin kinnauatia nochtin ángeles ye inDios israelitas’. Uan ixuiuan motekipanojka nochipa mayetokan moixpan. 27 Porque tejuatsin Jehová akin tikinnauatia nochtin ángeles uan inDios israelitas, tejuatsin otikititi motekipanojka tlen tikchiuas ijkuak otikijto: ‘Ne nikchiuas itech mofamilia makisakan akinmej tlanauatiskej’,* ikinon ne akin nimotekipanojka onimoyolchika para nimitstlatlaujtis. 28 ToTeko Jehová tejuatsin tiUeyititok, tejuatsin akin melauak toTajtsin Dios uan melauak tlen tikijtoua uan tikchiuas tlamantli kuali tlen otikilui motekipanojka. 29 Tla tikneki xikteochiua nokalijtik ne akin nimotekipanojka uan nochipa mayeto moixpan, porque tejuatsin toTeko Jehová tiUeyititok ijkon yotikijto. Nochipa xikteochiua nokalijtik ne akin nimotekipanojka”.