Génesis
35 Satepan toTajtsin Dios okilui Jacob: “Oksepa xio, xitlejko Betel uan ompa ximokaua. Ompa techchiuili se altar, ne akin melauak niDios, ne onimitsmonextili ijkuak otikcholilijtoka mokni Esaú”.
2 Ijkuakon Jacob okilui ifamilia uan nochtin tlen iuan okatkaj: “Ayakmo xikinpiakan dioses tlen oksekan kinueyichiuaj, ximochipauakan uan ximotlapatilikan. 3 Matiuiaj, matitlejkokan Betel. Ompa nikchiuilis se altar akin melauak toTajtsin Dios, ye onechkak ijkuak onimotekipachouaya uan oniktlatlaujti. Noijki maski san kanin nio ye nochipa nouan kajki”. 4 Ijkuakon yejuan okimakakej Jacob nochi dioses tlen oksekan okinueyichiuayaj tlen okinpixtokaj uan noijki inpipiloluan tlen okinpiayaj itech innakasuan. Uan Jacob nochi okitokak itlampa se ueyi kouitl tlen amo uejka okatka ompa Siquem.
5 Ijkuak oksepa opejki nejnemij, toTajtsin Dios okichi sapanoua mamomojtikan akinmej ik ompa ochantiayaj. Ikinon amikaj okinkuitlapantokak ikoneuan Jacob. 6 Satepan Jacob uan nochtin tlen iuan oyayaj oajsitoj Luz, tlen noijki itoka Betel, tlen kajki tlali Canaán. 7 Okichi se altar uan ompa okitokayoti El-Betel* porque ijkuak okicholilijtoka ikni, ompa okimonextili akin melauak toTajtsin Dios. 8 Satepan Débora akin okichichiti Rebeca omiki uan okitokakej itlampa se roblekouitl, ikxitlan tepetsintli kanin okatka Betel. Ikinon non kouitl okitokayoti Alón-Bacut.*
9 Jacob oualaya desde Padán-Aram uan toTajtsin Dios oksepa okimonextili uan okiteochi. 10 Ijkuakon toTajtsin Dios okilui: “Motoka Jacob pero ayakmo ijkon timotokayotis, axkan motoka yetos Israel”. Ikinon toTajtsin Dios opejki kiluia Israel. 11 ToTajtsin Dios noijki okilui: “Ne niDios akin kipia nochi chikaualis. Xikinpia mokoneuan uan ximomiakili. Te tiyetos inpapa miakej altepemej uan sekimej moxuiuan tlanauatiskej. 12 Nimitsmakas tlali tlen onikmakak Abrahán uan Isaac uan noijki nikinmakas moxuiuan”. 13 Ijkuakon toTajtsin Dios okika Jacob uan oyajki.
14 Jacob okiketsalti se tlaketsali kanin toTajtsin Dios iuan omotlapoui, non tlaketsali okatka de tetl* uan ipan okinoki* vino tlen kitetliokoliaj. Noijki ipan okinoki aceite. 15 Jacob ok okitokayoti Betel kanin toTajtsin Dios iuan omotlapoui.
16 Satepan okikajtejkej Betel. Efrat ok uejka omokauaya uan yinesiskia* ikonetsin Raquel pero amo ueli onesiaya.* 17 Uan ijkuak okachi otlajyouijtoka uan amo ueli onesiaya ikone, partera okilui: “Amo ximomojti porque noijki tikpias nin mokone”. 18 Pero Raquel yimikiskia uan ijkuak yitlamiskia iyolilis, okitokayoti ikone Ben-Oní.* Pero ipapa konetl okitokayoti Benjamín.* 19 Raquel omiki uan okitokakej itech ojtli tlen oyaya Efrat, tlen noijki motokayotia Belén. 20 Jacob okiketsalti se tlaketsali kanin okitokakej Raquel. Hasta axkan non tlaketsali kiteititia kanin toktok Raquel.
21 Satepan Israel oyajki uan okitlali ikaltsin uejka de kanin okatka torre Éder. 22 Ijkuak Israel ochantitoka itech non tlali, Rubén omotekak iuan Bilhá tlen okatka okse isiua ipapa uan Israel okimatki tlen opanok.
Jacob okinpixki 12 ikoneuan. 23 Jacob okipixki iuan Lea achto ikone tlen okitokayotijkej Rubén, noijki okipixkej Simeón, Leví, Judá, Isacar uan Zabulón. 24 Jacob okipixki iuan Raquel, José uan Benjamín. 25 Jacob uan Bilhá okipixkej Dan uan Neftalí. Bilhá okatka itlakeual Raquel. 26 Jacob uan Zilpá okipixkej Gad uan Aser. Zilpá okatka itlakeual Lea. Jacob okinpixki nonmej ikoneuan ompa Padán-Aram.
27 Satepan Jacob oajsito kanin okatka Isaac. Oajsito Mamré ik Quiryat-Arbá tlen noijki itoka Hebrón, kanin Abrahán uan Isaac ochantitoj. 28 Isaac okajxiti 180 xiuitl. 29 Ijkuakon saiktlami omijyoti uan omiki. Okitokakej ijkon ken okintokakej iuejkatatajuan,* ye miak xiuitl oyoltoka uan opaki. Esaú uan Jacob okitokakej inpapa.