Carta para Gálatas
5 Cristo otechmakixti para ayakmo matiyetokan titlakeualmej. Ikinon ximoyekketokan uan amo oksepa xiyetokan nantlakeualmej.
2 Ne Pablo namechiluia amo namechpaleuis tlen okichi Cristo tla nankimochiuiliskej circuncisión. 3 Oksepa nikinmiluia akinmej kimochiuiliaj circuncisión moneki kitlakamatiskej* nochi tlen kijtoua iTlanauatil Moisés. 4 Amo nankatej iuan Cristo namejuan tlen nankinekij manamechitakan nanyolkualmej porque nankitlakamatij* tlanauatil. Ayakmo nankinekij nankiseliskej itetliokolil tlen kuali. 5 Tejuan tikchiaj matechitakan tiyolkualmej porque techpaleuia espíritu santo uan porque titlaneltokaj. 6 Tla tejuan tikatej iuan Cristo Jesús, amitlaj ipati tikmochiuiliskej circuncisión noso amo tikmochiuiliskej. Okachi ipati matitlaneltokakan uan non tikteititiaj ijkuak titetlasojtlaj.
7 Namejuan onankichijtokaj tlen kuali. ¿Akin okichi ayakmo xikchiuakan tlen kuali onamechmachtijkej? 8 Non tlamantli tlen namechmachtiaj amo iaxka akin namechnotsa. 9 Tepitsin levadura kisamaua nochi tixtli. 10 Namejuan nankatej iuan Cristo uan nikmati amo nanmokuayejyekoskej* okse tlamantli. Pero kitlajyouiltiskej ken kinamiki akin namechkuejsoua maski san akin yetos. 11 Nokniuan, amo nechtlajyouiltiskiaj tla ok nitlamachtiskia makimochiuilikan circuncisión. Noijki amo kinkualaniskia oksekimej nitlamachtia Jesús okimiktijkej itech kouitl.* 12 Niknekiskia makimotekilikan intlakayo* akinmej namechtlapololtiaj.
13 Nokniuan, toTajtsin Dios onamechnotski para ayakmo xiyetokan nantlakeualmej. Pero non amo kijtosneki uelis nankichiuaskej san tlen kineki namocuerpo. Okachi kuali ximosepanpaleuikan porque nanmotlasojtlaj. 14 Tikchiuaj nochi iTlanauatil Moisés ijkuak tiktlakamatij* nin tlanauatil: “Xikintlasojtla oksekimej ijkon ken te timotlasojtla”. 15 Pero tla namejuan ok nanmokualanijtokej, ximomaluikan para amo nankichiuaskej ayakmo matlaneltokakan oksekimej.
16 Ne namechiluia, xikchiuakan ijkon ken namechyekana espíritu santo uan ijkon amo nankichiuaskej tlen kineki namocuerpo. 17 Namocuerpo kineki kichiuas san tlen ye kineki ikinon kixnamiki espíritu santo uan espíritu santo kixnamiki namocuerpo. Namejuan amo ueli nankichiuaj tlen nankinekij porque espíritu santo uan namocuerpo moixnamikij. 18 Pero amo nankatej imak tlanauatil tla espíritu santo namechyekana.
19 Amo oui mota akinmej kichiuaj tlen amo kuali kinyoltilana porque yejuan auilnemij,* kichiuaj tlen pitsotik, tlajtlakolchijtinemij uan ayakmo pinauaj,* 20 kinueyichiuaj dioses, kichiuaj naualotl, tekokoliaj, mokualaniaj, chauatij, kualankamikij, motlauelitaj, moxexelouaj, kichiuaj tlen tlamachtiaj tlakamej, 21 tenexikolitaj, tlauanaj, iluichiuaj uan ompa kichiuaj tlen amo kuali uan okseki tlamantli ken non kichiuaj. Nokniuan, namechiluia ijkon ken yonamechiluijka amo kiseliskej iTekiuajkayo toTajtsin Dios akinmej ijkon kichiuaj.
22 Pero akinmej kinyekana espíritu santo tetlasojtlaj, pakij, kipiaj yolseuilistli, mochiaj, tetlakaitaj, yolkualmej, tlaneltokaj, 23 yolyamankej uan kimatij monauatiskej. Amo onka se tlanauatil tlen kixnamiki nin tlamantli. 24 Akinmej iaxkauan Cristo Jesús yokipilojkej itech kouitl nochi tlen amo kuali okimachiliayaj uan tlen okinekiaya kichiuas incuerpo.
25 Tla tikchiuaj ijkon ken techyekana espíritu santo, nochipa matikkauilikan espíritu santo matechyekana. 26 Amo matimoueyinekikan, amo matimotlatlanikan nion amo matimonexikolitakan.