Josué
2 Ijkuak okatkaj Sitim, Josué ikone Nun okintitlanki ome tlakamej maichtakatlachiatij uan okinmilui: “Xiakan uan xikitatij tlali pero okachi xikitakan Jericó”. Yejuan oyajkej uan ijkuak oajsitoj, omokajkej ikalijtik Rahab, se siuatl tlen omonemakaya. 2 Akin otlanauatiaya Jericó okiluijkej: “¡Techkaki! Otikmatkej sekimej tlakamej israelitas nin youak nikan oichtakatlachiakoj”. 3 Ijkuak tekiua ijkon okimatki, otlanauati makiluitij Rahab: “Xikinkixti tlakamej tlen katej mokalijtik, porque yejuan san oichtakatlachiakoj”.
4 Pero Rahab okintlati tlakamej tlen oichtakatlachiatoj. Satepan ye okinmilui akinmej okipaleuiayaj tekiua: “Nonmej ome tlakamej opanokej pero amo nikmati de kanin uitsej. 5 Yejuan oyajkej ijkuak otlapoyauik, ijkuak ayamo otlatsakuayaj itech altepetl. Amo nikmati ik kanin oyajkej pero tla san niman nanyaskej nankinmajsitiuij”. 6 (Pero ye okinkauato ikpak* ikal, ompa okintlati itlampa ixijyo lino tlen oyektentoka).* 7 Tlakamej tlen okipaleuiayaj tekiua otlatemotoj ik aueyatl* Jordán, ik kanin opanouayaj. Altepetl san niman okitsakej ijkuak yejuan okiskej.
8 Achto kochiskiaj akinmej oichtakatlachiatoj, Rahab otlejkok okinmitato. 9 Ye okinmilui: “Ne nikmati Jehová namechmakas nin tlali. Tejuan timechimakasij* noijki nochtin akinmej nikan chantij uiuiokaj porque ompa nanuitsej. 10 Otikmatkej Jehová okiuatski mar Rojo namoixpan ijkuak onankiskej Egipto. Noijki otikmatkej okse lado Jordán onankinmiktijkej tekiuajkej Sehón uan Og, yejuan okinnauatiayaj amorreos. 11 Tinochtin otimomojtijkej ijkuak ijkon otikkakej uan amikaj kineki namechixnamikis. Porque Jehová namoDios, ye Dios akin tlanauatia iluikak uan nikan tlaltikpak. 12 Ken ne onamechpaleui* noijki moneki namejuan nankipaleuiskej* ifamilia nopapa. Namechtlatlaujtia, xikijtokan* ixpan Jehová ijkon nankichiuaskej uan techkajteuilikan itlaj para namechneltokilis. 13 Xikkauakan mayolto nopapa, nomama, nokniuan uan akinmej iuan katej, techmakixtikan para amo timikiskej”.
14 Tlakamej okinankilijkej: “¡Tiktemakaskej toyolilis namopatka! Tla amo nankijtouaj tlen otikchiuakoj, timechiknomatiskej uan amo timechkauaskej ijkuak Jehová techmakas nin tlali”. 15 Nin siuatl ochantiaya tlakpak uan inakastlan tepamitl tlen okiyaualouaya altepetl, desde iventana okitlali mekatl para ik ompa matemokan tlakamej. 16 Noijki okinmilui: “Para amo namechajsiskej akinmej namechtemojtinemij xiakan tepeyo uan ompa ximokauakan eyi tonal. Uelis nanyaskej ijkuak yejuan ualmokopaskej”.
17 Yejuan okiluijkej: “Tejuan san tikchiuaskej tlen te otikijto matikijtokan* tikchiuaskej, 18 tla tiktlalis nin mekatl chichiltik tlen petlani desde moventana tlen axkan ika techtemouijtok. Moneki nikan yetoskej mopapa, momama, mokniuan uan ifamilia mopapa, ijkuak tikmokauiskej nin tlali. 19 Akin kisas kiauak yetos itlajtlakol tla mikis uan amo moneki tejuan techtlajtlakoltiskej. Pero yetos totlajtlakol tla ikaj mikis uan tla itlaj amo kuali kipanos akin yetos mokalijtik. 20 Tla ikaj tikiluis tlen otikchiuakoj, ayakmo tikchiuaskej tlen otikijtojkej uan amo yetos totlajtlakol”. 21 Rahab okinnankili: “Mapano ijkon ken nankijtouaj”.
Ijkuak ijkon okinmilui yejuan oyajkej uan desde iventana ye okilpi mekatl chichiltik tlen petlani. 22 Akinmej oichtakatlachiatoj oyajkej tepeyo uan ompa omokajkej eyi tonal. Maski tlakamej tlen okintitlanki tekiua nouian otlatemojkej amo okinmajsikej ikinon omokopkej inmialtepe. 23 Satepan ome tlakamej tlen oichtakatlachiatoj oyajkej, okipanouijkej aueyatl uan okiluitoj Josué ikone Nun nochi tlen okinpanok. 24 Yejuan okiluijkej Josué: “Jehová techmakas non tlali. Nochtin akinmej ompa chantij uiuiokaj porque okimatkej ompa tiajsitiuij”.