Josué
20 Jehová okilui Josué: 2 “Xikinmilui israelitas: ‘Xikinpejpenakan altepemej kanin nanmopaleuiskej, ijkon ken onikiluijka Moisés manamechilui. 3 Ompa uelis cholos akin amo okinekiaya temiktis noso amo okimatki otemikti. Nonmej altepemej uelis namechpaleuis para amo momakopas ifamiliar akin onankimiktijkej. 4 Akin otemikti moneki mopaleuiti itech se altepetl tlen okipejpenkej uan mochias ik kanin kalakij, moneki kimiluis tlayekankej tlen ompa katej tlen opanok. Yejuan moneki kiseliskej uan kimakaskej kanin mokauas uan ompa chantis. 5 Tla akin kineki momakopas okikuitlapantokak akin otemikti, amo xiktemaktikan porque ye amo okikokoliaya ikni nion okinekiaya kimiktis. 6 Moneki ompa chantis hasta ijkuak yas ixpan altepetl* para makixkomaka. Moneki ompa mokauas hasta mamiki tlayekanteopixki tlen ijkuakon tlapaleuijtos. Satepan akin otemikti uelis mokopas ialtepe kanin okiski, uelis kalakis ialtepe uan ikalijtik’”.
7 Ikinon okinpejpenkej ninmej altepemej, Quedes tlen kajki Galilea ik itepeyo Neftalí. Siquem tlen kajki ik itepeyo Efraín uan Quiryat-Arbá noso Hebrón tlen kajki ik itepeyo Judá. 8 Ompa Jordán ik Jericó kanin kisa tonaltsin, yejuan okipejpenkej Bézer tlen kajki kanin tlauaki, tlakpak kanin tlalmelaktik tlen iaxka itribu Rubén. Ramot tlen kajki Galaad tlen iaxka itribu Gad uan Golán tlen kajki Basán tlen iaxka itribu Manasés.
9 Nonmej altepemej okinpejpenkej para nochtin israelitas uan akinmej oualayaj itech okseki altepemej. Ompa uelis yas akin amo okinekiaya temiktis pero achto altepetl kixkomakas para amo uetsis imak akin okinekiaya momakopas.