Hechos de apóstoles
2 Ijkuak okichijtokaj iluitl Pentecostés, nochtin san sekan okatkaj itech se kali. 2 San niman itlaj omokak iluikak. Kalijtik kanin yejuan okatkaj* omokak ken ijkuak chikauak ejeka. 3 Noijki oualmonextijkej ken tlimej milintokej tlen omotayaj ken nenepiltin. Nonmej tlimej inpan nochtin omoxexelojtiajkej. 4 Nochtin okiselijkej espíritu santo uan opejki tlajtouaj tlatlamantli tlajtoli. Okijtouayaj tlen okinmiluiaya espíritu santo makijtokan.
5 Ijkuakon ompa Jerusalén okatkaj sekimej judíos tlen otlaneltokayaj. Yejuan oualayaj itech nochi altepemej tlen katej ipan tlaltikpak. 6 Ijkuak okikakej otlaijkoyokak, miakej omonechikojkej uan amo okimatiayaj tlen kichiuaskej, porque okinkakiayaj discípulos otlajtouayaj ika intlajtol. 7 Yejuan omotlajtlachialtijkej uan okijtouayaj: “¿Amo chantij Galilea nochtin tlen tlajtojtokej? 8 Tla ijkon, ¿tleka tikinkakij tlajtouaj totlajtol? 9 Tejuan tiuitsej altepetl Partia, Media, Elam, Mesopotamia, Judea, Capadocia, Ponto, Asia, 10 Frigia, Panfilia uan Egipto. Sekimej uitsej itech altepetsitsintin tlen katej Libia ik Cirene. Oksekimej judíos uan akinmej san omochijkej judíos uitsej Roma, 11 Creta uan Arabia. Tinochtin otikkakej ika totlajtol okijtojkej tlen tlamantli tetlajtlachialti yokichi toTajtsin Dios”. 12 Nochtin omotlajtlachialtijkej uan amo okimatiayaj tlen kichiuaskej. Yejuan omotlajtlaniayaj: “¿Tlen kijtosneki tlen panotok?”. 13 Pero oksekimej okinpinauiayaj uan okijtouayaj: “Yejuan youintikej”.
14 Pedro omoketski inuan 11 apóstoles uan chikauak okinmilui akinmej ompa okatkaj: “Tlakamej tlen nanchantij Judea uan Jerusalén, xikmatikan nin tlamantli uan kuali xikkakikan tlen namechiluis. 15 Yejuan amo uintij ken namejuan nankijtouaj, porque yikin kanaj las 9 kualkan. 16 Porque nochi tlen axkan panotok okijto profeta Joel: 17 ‘ToTajtsin Dios kijtoua: “Itlamian tonalmej tlatlamantli personas nikinmakas seki noespíritu. Inkoneuan kitematiltiskej tlen ne nikinmiluis. Intelpochuan kinnextiliskej seki tlamantli uan temikiskej akinmej yikipiaj miak xiuitl tlen inuan katej. 18 Noijki itech nonmej tonalmej nikinmakas seki noespíritu notlakeualuan uan yejuan kitematiltiskej tlen nikinmiluis. 19 Nikchiuas seki tlamantli tetlajtlachialti itech iluikak uan nikinchiuas milagros ipan tlaltikpak. Yetos estli, tlitl uan tlamixpopokas. 20 Tonaltsin ayakmo tlauis uan metstli chichileuas ken estli. Satepan uits iueyi tonal Jehová uan kiteititis ye ueyititok. 21 Pero momakixtis akin kinotsa Jehová ika itoka”’”.
22 “Tlakamej tlen nanchantij Israel, xikkakikan tlen nikijtos: ‘ToTajtsin Dios okiseli Jesús Nazareno. Ijkon okiteititi ijkuak Jesús namoixpan okinchi milagros tetlajtlachialtijkej. Non kuali nankimatij namejuan. 23 Non tlakatl okitemaktijkej porque toTajtsin Dios ijkon yokimatiaya uan ijkon okimonekilti. Namejuan onankitemaktijkej inmak akinmej amo yolkualmej. Yejuan okipilojkej itech kouitl uan okimiktijkej. 24 Pero toTajtsin Dios okiyoliti uan ijkon okimakixti imak mikilistli, porque mikilistli amo ouelik kipixtos imak. 25 David otlajto de Cristo ijkuak okijto: “Jehová nochipa noixpan kajki, amo keman itlaj nechpanos porque ye kajki noyekma. 26 Ikinon oniyolpakik uan noijki nipaki ijkuak nitlajtoua. Ne nimitsneltokas ijkuak niyoltos, 27 porque amo techkauas ijtik Mikatekochtli.* Amo tikkauas maijtlakaui nocuerpo porque ne amo keman nimitskauas. 28 Yotechititi ojtli tlen kichiuas maniyolto. Tikchiuas manipaki ijkuak moixpan niyetos”’”.
29 “Nokniuan, techkauilikan manamechtlapoui ika yolchikaualistli tlen okipanok touejkatata David. Ye oixpoliuik uan hasta axkan toktok itech toaltepe. 30 David okatka profeta uan okimatiaya toTajtsin Dios okijto se ixui motlaliskia ipan itrono. 31 Ye achto okitak okiyolitijkej Cristo, uan okijto amo kikauaskiaj ijtik Mikatekochtli* uan amo ijtlakauiskia icuerpo. 32 Tinochtin tikmatij toTajtsin Dios okiyoliti Jesús. 33 Jesús oyajki iluikak uan omotlali iyekma toTajtsin Dios. Ye okiseli espíritu santo ijkon ken okijto iTajtsin. Axkan ye yotechmakak espíritu santo ijkon ken nankitaj uan nankikakij. 34 David amo oyajki iluikak pero ye okijto: ‘Jehová okilui noTeko: “Ximotlali noyekma 35 hasta manikintlali mokxitlampa akinmej mitskokoliaj”’. 36 Nochtin akinmej chantij Israel, makimatikan toTajtsin Dios okitlali Jesús mayeto toTeko uan Cristo tlen namejuan onankimiktijkej itech kouitl”.
37 Ijkuak ijkon okikakej, omoyolkokojkej uan okintlajtlanijkej Pedro uan oksekimej apóstoles: “Tokniuan, ¿tlen moneki tikchiuaskej?”. 38 Pedro okinnankili: “Ximoyolkopakan uan ximoapolaktikan ika itoka Jesucristo. Ijkon namechtlapojpoluiliskej namotlajtlakol uan nankiseliskej espíritu santo. 39 Porque toTajtsin Dios okijto namechmakas espíritu santo namejuan uan namokoneuan. Noijki akinmej uejka katej uan akinmej kinnotsas toTajtsin Dios Jehová”. 40 Noijki okinyekilui okseki tlamantli uan okinmilui tlen omonekiaya kichiuaskej: “Xikinkauakan ninmej amo yolkualmej para amo nanmixpoliuiskej”. 41 Ijkuakon omoapolaktijkej akinmej kuali okiselijkej tlen okijto Pedro. Non tonal kanaj 3,000 omochijkej idiscípulos Jesús. 42 Omochijchikajkej omomachtijkej tlen otlamachtiayaj apóstoles. Noijki okimotliokoliayaj tlen okipiayaj, san sekan otlakuayaj uan san sekan omotlatlaujtiayaj.
43 Apóstoles opejki kinchiuaj milagros tetlajtlachialtijkej uan nochtin opejki momojtiaj. 44 Nochtin tlen otlaneltokayaj, omoyekuikayaj uan okimotliokoliayaj tlen okipiayaj. 45 Omotlalnemakijkej uan okinemakakej tlen okipiayaj uan tomin okinxejxelilijkej akinmej okinpolouaya. 46 Mojmostla san sekan oyayaj templo. Opakiayaj tlakuaskej inchan oksekimej uan ika nochi inyolo okimoxejxeliliayaj tlakuali. 47 Okiueyichiuayaj toTajtsin Dios uan nochtin okintlakaitayaj. Noijki Jehová mojmostla miakej okinmakixtiaya uan yejuan omochiuayaj discípulos.