Hechos de apóstoles
1 Teófilo, itech achto libro onikijkuilo nochi tlen Jesús opejki kichiua uan opejki tlamachtia 2 hasta ijkuak toTajtsin Dios okiuikak iluikak. Ijkuak Jesús yiyaskia, ika espíritu santo okinnauati tlen kichiuaskiaj apóstoles tlen okinpejpenki. 3 Satepan ijkuak ye yotlajyoui, miak uelta okinmonextili uan okinmititi ye melauak oyoltoka. Yejuan okitakej Jesús 40 tonal uan ye okitematilti iTekiuajkayo toTajtsin Dios. 4 Ijkuak Jesús inuan okatka, okinnauati: “Ximokauakan Jerusalén. Xikchiakan tlen noTajtsin yokijto namechmakas ijkon ken ne yonamechilui. 5 Juan oteapolakti ijtik atl pero ipan kanaj keski tonal namejuan namechapolaktiskej ika espíritu santo”.
6 Ijkuak yejuan omonechikojkej, okitlajtlanijkej: “ToTeko, ¿axkan tikyektlalis tekiuajkayotl itech altepetl Israel?”. 7 Ye okinmilui: “Namejuan amo moneki nankimatiskej tlen hora noso keman porque san toTajtsin Dios kinamiki kijtos. 8 Pero nankipiaskej chikaualistli ijkuak nankiseliskej espíritu santo. Nanyetoskej notestigos ompa Jerusalén, Judea, Samaria uan ipan nochi tlaltikpak”. 9 ToTajtsin Dios okiuikak Jesús iluikak ijkuak otlanki ijkon okijto uan yejuan okitokaj. Ijkuakon se mixtli okipacho uan ayakmo okitakej. 10 Yejuan okitokaj Jesús ijkuak otlejkotia iluikak. Ijkuakon innakastlan oualmonextijkej ome tlakamej tlen okipiayaj intlaken istak. 11 Yejuan okinmiluijkej: “Tlakamej tlen nanuitsej Galilea, ¿tleka nantlachixtokej iluikak? Jesús tlen namouan okatka, toTajtsin Dios yokiuikak iluikak. Satepan uits ijkon ken onankitakej oyajki iluikak”.
12 Yejuan okatkaj itech tepetl Olivos uan omokopkej Jerusalén. Non tepetl okatka kanaj se kilómetro* ik Jerusalén. 13 Ijkuak oajsitoj kanin omokalotiayaj, otlejkokej itech cuarto tlen okatka tlakpak. Ompa okatka Pedro, Juan, Santiago, Andrés, Felipe, Tomás, Bartolomé, Mateo, Santiago itelpoch Alfeo, Simón tlen okipaktiaya tlapaleuis uan Judas itelpoch Santiago. 14 Nochtin yejuan san sekan omotlatlaujtiayaj inuan sekimej siuamej. Noijki ompa okatkaj ikniuan Jesús uan imama tlen omotokayotiaya María.
15 Itech nonmej tonalmej, Pedro omoketski intlajko kanaj 120 tokniuan uan okinmilui: 16 “Nokniuan tlakamej, omonekiaya mamochiua tlen kijtoua iTlajtol toTajtsin Dios. Espíritu santo okipaleui David makitematilti tlen kichiuaskia Judas. Ye okinyekanki akinmej okikitskijkej Jesús. 17 Ye touan okatka uan okipejpenkej touan matlapaleui. 18 (Non tlakatl omotlalkoui ika tomin tlen okimakakej ijkuak okichi tlen amo kuali. Ijkuak ouetski ika itsonteko, otlalaxtsayanki* uan okiski ikuetlaxkol.* 19 Nochtin tlen ochantiayaj Jerusalén okimatkej uan non tlali okitokayotijkej Akéldama, ika intlajtol kijtosneki ‘estlala’). 20 Porque itech Salmos ijkuilitok: ‘Mamokaua iselti ichan uan amikaj ompa machanti’. Noijki ijkuilitok: ‘Okse makiseli iteki tlen okichiuaya ijkuak otlayekanaya’. 21 Ikinon moneki tikpejpenaskej se tlakatl tlen touan onentinemiaya ijkuak toTeko Jesús touan okichi iteki. 22 Opejki ijkuak Juan okiapolakti hasta ijkuak toTajtsin Dios okiuikak iluikak ijkuak touan okatka. Nin tlakatl moneki touan kitematiltis Jesús okiyolitijkej”.
23 Ijkuakon okinpejpenkej ome tlakamej. Se omotokayotiaya Matías uan okse José tlen okiluiayaj Barsabás uan noijki okixmatiayaj ken Justo. 24 Satepan omotlatlaujtijkej uan okijtojkej: “Jehová, tejuatsin tikmati tlen kipiaj nochtin inyolipan. Nikan katej ome tlakamej uan techmatilti akin otikpejpenki 25 para mitstekichiuilis uan yetos apóstol. Kipatkayotis Judas porque ye okika iteki uan okichiuato tlen okinekiaya”. 26 Ijkuakon omotlatlankej uan otlatlanki Matías. Satepan ye okipojkej inuan 11 apóstoles.