Tlen okijkuilo Marcos
13 Ijkuak Jesús okiski itech templo, se idiscípulo okilui: “Tlamachti, ¡xikinmita temej* kuajkualtsitsintin uan uejueyij uan noijki tepamitl!”. 2 Pero Jesús okilui: “¿Tikita nin uejueyij tepamitl? Ayakmo nepanitos nion se tetl porque nochi kixixiniskej”.
3 Ijkuak Jesús okatka* itech tepetl Olivos ik kanin omotaya templo, Pedro, Santiago, Juan uan Andres okichtakatlajtlanijkej: 4 “Techilui, ¿keman ijkon panos uan tlen kiteititis yitlamis nochi non tlamantli?”. 5 Jesús opejki kinmiluia: “Ximomaluikan. Amikaj manamechkajkayaua. 6 Miakej uitsej, kinejnekiskej* notoka uan kijtoskej: ‘Ne niCristo’, uan miakej kinkajkayauaskej. 7 Noijki nankikakiskej onka guerra itech miakej altepemej. Pero amo ximomojtikan porque moneki ijkon panos pero ayamo tlatlamis”.
8 “Porque se altepetl mokualanis iuan okse altepetl uan noijki tekiuajkej mokualaniskej. Nouian tlalolinis uan tlaapistis. Ijkuak ijkon panos, yikin peuas tlajyouilistli”.
9 “Moneki ximomaluikan porque namechtemaktiskej inmak jueces. Noijki namechuitekiskej itech sinagogas.* Namechuikaskej inmixpan akinmej tlanauatiaj uan tekiuajkej porque nantechneltokaj. Ijkon yejuan kimatiskej akin ne. 10 Noijki achto motetlapouis kuali tlajtoli para nochtin makimatikan. 11 Ijkuak namechtemaktiskej inmixpan tekiuajkej, amo manamechtekipacho tlen nankijtoskej. Non tonal xikijtokan tlen namechmatiltis espíritu santo. Ye namechpaleuis xitlajtokan uan amo san namejuan nantlajtoskej. 12 Noijki sekimej kitemaktiskej inmikni makimiktikan. Oksekimej kitemaktiskej inkone makimiktikan. Oksekimej kinmixnamikiskej inpapanuan uan kintemaktiskej makinmiktikan. 13 Nochtin namechkokoliskej porque nankichiuaj ken ne nikchiua. Pero momakixtis akin tlaxikos hasta ijkuak tlatlamis”.
14 “Ijkuak nankitaskej tlen tetlajyalti uan teixpolo moketok kanin amo moneki yetos, (akin kitlajtoltia makajsikamati tlen okijto profeta), akinmej yetoskej Judea mayakan itech tepeyo. 15 Akin yetos ikpak* ikal, amo matemo itlaj makikixtiti. 16 Noijki akin yetos itlala amo mamokopa makikuiti* itlaken. 17 ¡Mialmastin siuamej tlen yikipiaskej inkone noso tlen tlachichitijtoskej! 18 Ximotlatlaujtikan para amo mapano ijkuak seua. 19 Ijkuakon yetos tlajyouilistli. Non amo keman ijkon panoua desde ijkuak toTajtsin Dios otlachijchi uan amo keman oksepa ijkon panos. 20 Amikaj momakixtiskia tla nonmej tonalmej uejkauaskiaj, pero Jehová kichiuas amo mauejkauakan nonmej tonalmej para sekimej mamomakixtikan. Ijkon kichiuas para kinpaleuis akinmej okinpejpenki”.
21 “Noijki amo xikneltokakan tla ikaj namechiluis: ‘¡Cristo nikan kajki!’ noso namechiluis: ‘¡Nepa kajki!’. 22 Porque yetoskej cristos uan profetas tekajkayajkej. Yejuan kinchiuaskej miakej milagros uan ijkon tlakajkayauaskej. Noijki kinekiskej kinkajkayauaskej akinmej toTajtsin Dios okinpejpenki. 23 Ximomaluikan porque ne yonamechilui nochi tlen panos”.
24 “Itech nonmej tonalmej ijkuak yopanok tlajyouilistli, tonaltsin seuis, metstli ayakmo tlauis, 25 sitlalimej tlen katej iluikak uetsiskej uan nochi tlen onka iluikak motsetselos.* 26 Ijkuakon kitaskej iKone Tlakatl uits ika ueyi chikaualistli ipan mixtli. 27 Ye kintitlanis iángeles uan kinnechikos tlapejpenalmej maski san kanin yetoskej itech tlaltikpak, kanin peua tlaltikpak hasta kanin tlami iluikak”.
28 “Xikajsikamatikan tlen kipanoua higoskouitl. Ijkuak selia imamayo uan moxijyotia, nankimatij yipeuas tlatotonias. 29 Noijki ijkuak nankitaskej panos nin tlamantli, xikmatikan ye san niman uits. 30 Ne namechiluia, amo ixpoliuiskej akinmej axkan yoltokej hasta mapano nochi nin tlamantli. 31 Iluikak uan tlaltikpak pojpoliuiskej pero tlen nikijtoua amo keman pojpoliuis”.
32 “Tonal noso hora amikaj kimati, nion ángeles ompa iluikak nion teKone, san toTajtsin kimati. 33 Ximotlachilijtokan uan xiijsatokan porque amo nankimatij keman ijkon panos. 34 Nin panos ken ijkuak se tlakatl oyajki okse altepetl. Ye okinmilui itlakeualuan makimaluikan ichan uan nochtin okinmilui tlen kichiuaskiaj. Akin otlamaluiaya kaltempa okilui nochipa mayektlachixto. 35 Namejuan noijki ximotlachilijtokan porque amo nankimatij keman ajsiki tlakatl tlen iaxka kali. Xamo ajsiki tiotlak, tlajkoyouak, ijkuak yitlanestiuits noso kualkan. 36 Ijkon amo namechajsiki nankochtokej ijkuak ualajsiki. 37 Nochtin nikinmiluia mamotlachilikan ijkon ken namejuan namechiluia”.