Apocalipsis
7 Satepan ijkuak ijkon opanok, onikinmitak naui ángeles omoketokaj itech naui ilados tlaltikpak. Yejuan okitsakuilijtokaj ejekatl tlen oualaya itech naui ilados tlaltikpak para amo maejeka ipan tlaltikpak, ipan mar nion ipan se kouitl. 2 Noijki onikitak okse ángel tlen oualaya kanin kisa tonaltsin uan okiuikaya se isello toTajtsin Dios tlen yoltok. Ye chikauak okintsajtsili naui ángeles tlen okinkauilijkej makijtlakokan tlaltikpak uan mar. 3 Okinmilui: “Amo xikijtlakokan tlaltikpak, mar nion kojmej hasta matikintlalilikan sello inmixkuak itlakeualuan toTajtsin Dios”.
4 Onikkak keski okintlalilijkej sello: 144,000* okintlalilijkej sello. Nochtin opouiayaj itech ifamilias ikoneuan Israel.
5 Itech ifamilia Judá 12,000* okintlalilijkej sello.
Itech ifamilia Rubén 12,000.*
Itech ifamilia Gad 12,000.*
6 Itech ifamilia Aser 12,000.*
Itech ifamilia Neftalí 12,000.*
Itech ifamilia Manasés 12,000.*
7 Itech ifamilia Simeón 12,000.*
Itech ifamilia Leví 12,000.*
Itech ifamilia Isacar 12,000.*
8 Itech ifamilia Zabulón 12,000.*
Itech ifamilia José 12,000.*
Itech ifamilia Benjamín 12,000* okintlalilijkej sello.
9 Satepan ijkuak ijkon opanok, onikinmitak sapanoua miakej tlen amikaj ueli okinpouaya. Yejuan nouian ochantiayaj, tlatlamantli infamilia, tlatlamantli inmialtepe uan tlatlamantli intlajtol. Yejuan omoketokaj ixpan trono uan ixpan Ichkatsin. Okipiayaj intlaken ueyak uan istak uan okikitskijtiayaj soyatl. 10 Chikauak okijtouayaj ijkuak omotlasojkamatiayaj: “¡ToTajtsin Dios tlen kajki* ipan trono uan Ichkatsin otechmakixtijkej!”.
11 Nochtin ángeles omoketokaj uan okiyaualojtokaj trono, okinyaualojtokaj tlayekankej uan naui querubines.* Yejuan omotlankuaketskej ixpan trono uan okiueyichijkej toTajtsin Dios. 12 Okijtojkej: “¡Amén! ToTajtsin Dios nochipa makiueyichiuakan, makiueyitlalikan, makipia ixtlamatilistli, makitlasojkamatilikan, makitlakaitakan, matlanauati uan makipia chikaualistli. Amén”.
13 Ijkuakon se tlayekanki onechtlajtlani: “¿Akinmej kipiaj intlaken ueyak uan istak? ¿Kanin oualajkej?”. 14 Ne san niman oniknankili: “NoTeko tejuatsin tikmati”. Ye onechilui: “Yejuan okiskej itech ueyi tlajyouilistli. Okipakej intlaken ueyak ika ieso Ichkatsin uan oistayakej. 15 Ikinon katej ixpan itrono toTajtsin Dios uan kitekichiuiliaj tlajka uan youak itech itemplo. Akin kajki* ipan trono kinmaluis. 16 Ayakmo apismikiskej nion ayakmo amikiskej. Amo tonaltlatlaskej nion amo tonalmikiskej. 17 Porque kinmaluis Ichkatsin tlen kajki itlajko trono. Noijki kinyekanas kanin kisa atl tlen kitemaka yolilistli. ToTajtsin Dios kinmixayouajuatsas”.