Tlen okijkuilo Marcos
9 Noijki okinmilui: “Ne namechiluia, sekimej tlen nikan katej amo ixpoliuiskej hasta ijkuak kitaskej yitlanauatijtok iTekiuajkayo toTajtsin Dios”. 2 Chikuase tonal satepan, Jesús oyajki itech se ueyi tepetl. Okinuikak Pedro, Santiago uan noijki Juan uan ompa inselti okatkaj. Ompa Jesús okse tlamantli okinmonextili. 3 Itlaken opetlanki uan sapanoua oistayak. Nikan tlaltikpak amikaj uelis ijkon kistaliskia. 4 Noijki omonextijkej Elías uan Moisés omotlapouijtokaj iuan Jesús. 5 Pedro okilui Jesús: “Tlamachti, tipakij nikan tikatej. Matikinchiuakan eyi kaltsitsintin. Se para te, okse para Moisés uan okse para Elías”. 6 Pero eyi discípulos omomojtiayaj, ikinon Pedro amo okimatiaya tlen kichiuas. 7 Ijkuakon oualmonexti se mixtli tlen okinpacho uan ikaj oualtlajto ijtik mixtli uan okijto: “Nin noKone niktlasojtla. Xikkakikan”. 8 Ijkuak otlajtlachixkej kanin okatkaj, ayakmo ikaj okitakej uan san Jesús ompa okatka.
9 Pero ijkuak oualtemouayaj itech tepetl, Jesús okinnauati amikaj makiluikan tlen okitakej hasta ijkuak toTajtsin Dios kiyolitiskia iKone Tlakatl. 10 Yejuan okichijkej tlen okinnauati pero omotlajtlaniayaj tlen kijtosneki ijkuak okinmilui toTajtsin Dios kiyolitiskia. 11 Ijkuakon discípulos okitlajtlanijkej Jesús: “¿Tleka akinmej tlamachtiaj tlanauatil kijtouaj achto uits Elías?”. 12 Ye okinnankili: “Non melauak. Elías achto uits uan oksepa tlayektlaliki. Pero ¿tleka ijkuilitok tlajyouis iKone Tlakatl uan kitlauelitaskej? 13 Pero ne namechiluia, Elías youitsa uan okitoktijkej tlen yejuan okinekej. Okipanok ijkon ken okijkuilojkej”.
14 Ijkuak okinmajsitoj oksekimej discípulos, okitakej miakej ompa okatkaj. Noijki ompa okatkaj sekimej tlen otlamachtiayaj tlanauatil uan okintsatsajtsiliayaj discípulos. 15 Miakej omotlajtlachialtijkej ijkuak okitakej Jesús uan san niman okitlajpalotoj. 16 Ye okintlajtlani: “¿Tleka nanmotsatsajtsiliaj?”. 17 Se tlakatl tlen ompa okatka okinankili: “Tlamachti, onimitsualikili notelpoch porque kipia se ejekatl* tlen amo kikauilia matlajto. 18 Ejekatl* kichiua mamotlatlamotla telpochtli uan makamapoposojkisa. Noijki motlannetsonia* uan sotlaua. Onikinmilui modiscípulos makikixtilikan ejekatl* pero amo ouelik okichijkej”. 19 Jesús okijto: “¡Akinmej axkan yoltokej amo tlaneltokaj! ¿Hasta keman namouan niyetos? ¿Hasta keman namechxikojtos? Xikualikakan telpochtli”. 20 Yejuan okiuikilijkej telpochtli, uan ejekatl* okichi mamimiki ijkuak okitak Jesús. Telpochtli omotlatlamotlak uan okamapoposojkiski. 21 Jesús okitlajtlani ipapa telpochtli: “¿Yiuejkika ijkon kipanoua?”. Ye okinankili: “Opejki ijkon kipanoua ijkuak okatka tsikitsin. 22 Ejekatl* miak uelta yokitlamotlak ijtik tlitl uan ijtik atl porque kineki kimiktis. Pero tla te uelis techpaleuis, techiknomati uan techpaleui”. 23 Jesús okilui: “¿Tleka otechilui kox uelis nimitspaleuis? Akin tlaneltoka nochi uelis kichiuas”. 24 Ipapa telpochtli san niman okijto: “¡Nitlaneltoka! ¡Pero techpaleui okachi manitlaneltoka!”.
25 Jesús okajuak ejekatl* ijkuak okitak miakej ompa oualmotlalouayaj. Okilui: “Ejekatl,* nimitsnauatia xikisa ijtik telpochtli uan ayakmo oksepa xikalaki, porque tikchiua amo matlajto uan amo matlakaki”. 26 Ejekatl* okichi mamimiki telpochtli uan chikauak matsajtsi uan satepan okiski. Telpochtli omotaya ken yoixpoliuik uan miakej okijtouayaj: “¡Yoixpoliuik!”. 27 Pero Jesús okimakitski telpochtli uan okipaleui mamoketsa. 28 Satepan Jesús uan idiscípulos okalakej itech se kali. Yejuan okichtakatlajtlanijkej: “¿Tleka tejuan amo ouelik otikkixtijkej ejekatl?”.* 29 Ye okinnankili: “Ninmej ejekamej* san uelis kisaskej tla tiktlatlaujtiskej toTajtsin Dios matechpaleui”.
30 Satepan oksekan oyajkej uan opanokej ik Galilea. Pero Jesús amo okinekiaya ikaj makimati 31 porque okinmachtijtoka idiscípulos. Ye okinmilui: “IKone Tlakatl kitemaktiskej inmak tlakamej uan kimiktiskej, pero ipan eyi tonal toTajtsin Dios kiyolitis”. 32 Yejuan amo okajsikamatkej tlen okijto uan omomojtiayaj kitlajtlaniskej.
33 Satepan oajsitoj Capernaúm uan ijkuak okatkaj itech se kali, Jesús okintlajtlani: “¿Tleka onanmokualanijtiualayaj itech ojtli?”. 34 Yejuan amo okinankilijkej. Omokualanijtiayaj porque okinekiayaj kimatiskej akin okachi ueyititok. 35 Jesús omotlali, okinnotski 12 apóstoles uan okinmilui: “Akin kineki tlayekanas, moneki mokauas tlakuitlapan uan kinpaleuis oksekimej”. 36 Ijkuakon okinotski se chokotsin, okitlali tlatlajkotia, okajkolkitski uan okinmilui: 37 “Akin nechtlakaita kiselis se chokotsin uan ne noijki nechselis. Akin nechselis amo san ne nechselis, noijki kiselis akin onechualtitlanki”.
38 Juan okilui: “Tlamachti, otikitakej se tlakatl okinkixtiaya ejekamej* ika motoka. Pero otikiluijkej amo ijkon makichiua porque amo touan onemiaya”. 39 Pero Jesús okijto: “Amitlaj xikiluikan porque amikaj uelis kichiuas se milagro ika notoka uan nechteneuas.* 40 Porque akin amo techixnamiki kijtosneki techpaleuia. 41 Xikneltokakan kiteochiuaskej akin namechmakas atl porque namejuan nannodiscípulos. 42 Pero tla ikaj kichiuas ayakmo matlaneltoka akin yolyamanki, okachi kuali makikechpililikan se ueyi tetl* uan makitlamotlakan ijtik mar”.
43 “Tla se tonal moma kichiua xitlajtlakolchiua, xikmotekili. Okachi kuali tiyoltos maski timakotonki,* uan amo mamitstlamotlakan ika ome momauan ijtik Gehena* kanin amo keman seui tlitl. 44 * 45 Noijki tla mokxi kichiua xitlajtlakolchiua, xikmotekili. Okachi kuali tiyoltos maski tiikxikotonki,* uan amo mamitstlamotlakan ika ome mokxiuan ijtik Gehena.* 46 * 47 Uan tla moixtololo kichiua xitlajtlakolchiua, uejka xiktlamotla. Okachi kuali tikalakis itech iTekiuajkayo toTajtsin Dios maski san ika se moixtololo. Uan amo mamitstlamotlakan ika ome moixtololouan ijtik Gehena,* 48 kanin okuilimej amo mikij uan kanin tlitl amo keman seui”.
49 “Porque nochtin kinualtitlaniliskej tlitl ijkon ken ijkuak kipoyeliaj tlakuali. 50 Istatl melauak kuali pero tla ayakmo poyek, ¿ken uelis oksepa tlapoyelis? Xiyetokan ken istatl uan kuali ximouikakan inuan oksekimej”.