Okse ilibro Samuel
9 David okijto: “¿Ok ikaj yoltok tlen poui itech ifamilia Saúl tlen uelis nikititis niktlasojtla uan amo nikkauas ijkon ken onimoka iuan Jonatán?”. 2 Ijkuakon omomatki okatka se itlakeual Saúl tlen omotokayotiaya Zibá. Tekiua David okitlajtlani: “¿Te tiZibá?”. Ye okinankili: “Kema, noteko”. 3 David noijki okitlajtlani: “¿Ok ikaj yoltok tlen poui itech ifamilia Saúl tlen uelis nikititis toTajtsin Dios kitlasojtla uan amo kikaua?”. Zibá okinankili: “Se ikone Jonatán tlen koxo ok yoltok”. 4 David oksepa okitlajtlani: “¿Kanin kajki?”. Zibá okinankili: “Kajki Lo-Debar, ikalijtik Makir ikone Amiel”.
5 Tekiua David san niman otlanauati makinotsatij Mefibóset tlen okatka Lo-Debar, ikalijtik Makir ikone Amiel. 6 Ijkuakon Mefibóset ikone Jonatán ixui Saúl, okalak kanin okatka David. Ye san niman omotlankuaketski uan omoixtlapacho. David okilui: “¡Mefibóset!”, ye okinankili: “Nikan nika noteko”. 7 Ijkuakon David okilui Mefibóset: “Amo ximomojti, porque nimitstlasojtlas uan amo nimitskauas ijkon ken onikilui mopapa Jonatán. Nimitskopilis nochi itlaluan moabuelito Saúl uan nochipa titlakuas kanin ne nitlakua”.
8 Mefibóset oksepa omoixtlapacho uan okijto: “Ne ken se itskuintli tlen yomiki, ¿tleka moneki techpaleuis? Ne san nimotlakeual”. 9 Satepan David otlanauati makinotsatij Zibá, itlakeual Saúl uan okilui: “Ikalijtik Saúl uan nochi tlen iaxka, nikmakas ixui moteko. 10 Pero te, mokoneuan uan motlakeualuan nankitekiskej tlen nankitokaskej para nochipa makipiakan tlen ika mopanoltiskej itlakeualuan Mefibóset. Pero Mefibóset ixui moteko, nochipa tlakuas kanin ne nitlakua”.
Ijkuakon Zibá okinpiaya 15 ikoneuan uan 20 itlakeualuan. 11 Zibá okinankili tekiua: “Ne nikchiuas tlen tejuatsin otechnauati”. Ikinon Mefibóset opejki tlakua kanin otlakuaya David ijkon ken otlakuayaj ikoneuan tekiua. 12 Ikonetsin Mefibóset omotokayotiaya Micá. Nochtin akinmej ochantiayaj iuan Zibá omochijkej itlakeualuan Mefibóset. 13 Mefibóset akin okatka koxo ochantiaya Jerusalén porque nochipa otlakuaya kanin otlakuaya tekiua David.