Okse ilibro Samuel
16 Ijkuak David yopanotoka ikpak* tepetl, ompa okichixtoka Zibá itlakeual Mefibóset. Zibá okinuikaya ome burros tlen okinpejpechti uan okinmamalti doscientos panes, cien panes tlen okinchijkej ika pasas, cien panes tlen okinchijkej ika higos uan dátiles, noijki se ueyi komitl tlen okipiaya vino. 2 Tekiua okitlajtlani Zibá: “¿Tleka otikualikak nochi nin tlamantli?”. Zibá okinankili: “Onikinualikak ninmej burros para inpan mayakan akinmej pouij mokalijtik, pan uan tlakilotl makikuakan motlakeualuan uan vino makonikan akinmej sotlauaskej kanin tlauaki”. 3 Tekiua okitlajtlani: “¿Kanin kajki ixui moteko?”. Zibá okinankili: “Omoka Jerusalén porque okijto: ‘Israelitas nechkopiliskej itekiuajkayo noabuelito’”. 4 Tekiua okilui Zibá: “Xikita axkan moaxka nochi tlen iaxka Mefibóset”. Ijkuakon Zibá okilui: “Moixpan nimotlankuaketsa noteko uan notekiua, techseli”.
5 Ijkuak tekiua David oajsito Bahurim, okiski se tlakatl tlen opouiayaj itech ifamilia ikalijtik Saúl, omotokayotiaya Simeí ikone Guerá. Ye okajsito David uan chikauak otlauijuikaltiaya.* 6 Simeí opejki kimojmotla David uan itlakeualuan ika tetl,* noijki akinmej inuan oyayaj uan hasta isoldados chijchikauakej tlen tekiua David okinpiaya iyekma uan iopochma. 7 Ijkuak Simeí okiuijuikaltiaya David, okijtouaya: “¡Te titemiktia uan amitlaj mopati! ¡Oksekan xio! 8 Jehová kichijtok xiktlaxtlaua tlen otikchi porque otikinmikti akinmej opouiayaj ikalijtik Saúl uan otikkuili itekiuajkayo. Ikinon Jehová okitlali mokone Absalón mayeto tekiua. ¡Mitspanotok tlen amo kuali porque te titemiktia!”.
9 Ijkuakon Abisái ikone Zeruyá okilui tekiua: “Noteko uan notekiua, ¿tleka tikkauilia neka itskuintli tlen yomiki mamitsuijuikalti? Nimitstlatlaujtia techkauili manikechtsontekiti”. 10 Tekiua David okinankili: “Namejuan ikoneuan Zeruyá nin amo nanmotekij, xikkauakan manechuijuikalti porque Jehová okilui: ‘¡Xikilui David makipano tlen amo kuali!’. Ikinon amo uelis ikaj kitlajtlanis tleka ijkon kichiua”. 11 Ijkuakon David okilui Abisái uan nochtin itlakeualuan: “Xikkakikan, tla nokone tlen kipia noeso kineki nechmiktis, ¡se benjaminita okachi kinekis ijkon kichiuas! ¡Xikkauilikan manechuijuikalti porque Jehová ijkon okilui! 12 Xamo Jehová kitas ken nitlajyouijtok uan Jehová nechteochiuas uan amo manechpano ken nechuijuikaltiaj”. 13 Ijkuak ijkon opanotoka, David uan itlakeualuan onejnentiayaj pero Simeí ik ompa oyaya inakastlan tepetl, okinuijuikaltiaya uan okinmojmotlaya ika tetl uan ika tlalpinoli.*
14 Satepan tekiua uan akinmej iuan oyayaj, oajsitoj kanin omonekiaya ajsitiuij uan ompa omoseuijkej porque osotlajtokaj.
15 Ijkuakon Absalón oajsito Jerusalén inuan nochtin tlakamej israelitas. Ahitofel noijki iuan okatka. 16 Ijkuak Husái akin arkita tlen okatka iyolikni David okalak kanin okatka Absalón, opejki kiluia: “¡Maueyitito tekiua! ¡Maueyitito tekiua!”.* 17 Absalón okitlajtlani Husái: “¿Ijkon tikititia tiktlasojtla uan amo tikkaua moyolikni? ¿Tleka amo iuan otia?”. 18 Husái okinankili Absalón: “Amo, ne nikpaleuis akin Jehová okipejpenki uan noijki akin okipejpenkej ninmej tlakamej uan nochtin tlakamej israelitas, ne san ye nikpaleuis. 19 Ne oksepa nimitsiluia, ¿akin niktekichiuilis? ¿Amo moneki niktekichiuilis ikone noyolikni? Ijkon ken oniktekichiuili mopapa, ijkon nimitstekichiuilis”.
20 Satepan Absalón okitlajtlani Ahitofel: “Techilui, ¿tlen tikchiuaskej?”. 21 Ahitofel okinankili Absalón: “Ximoteka inuan oksekimej isiuauan mopapa, akinmej okinkajtej makimaluikan ipalacio. Ijkon nochtin israelitas kitaskej ika tlen otikchi tikteititia amo tiktlakaita mopapa, non kichiuas mamoyolchikauakan akinmej mitspaleuiaj”. 22 Ijkuakon Absalón okichiuilijkej se kaltsintli ikpak palacio uan inmixpan nochtin israelitas, ye ompa omotekak inuan oksekimej isiuauan ipapa.
23 Itech nonmej tonalmej tlen okijtouaya Ahitofel, okitayaj ken itlajtoluan akin melauak toTajtsin Dios. David uan Absalón ijkon okitayaj tlen Ahitofel okijtouaya.