Hechos de apóstoles
6 Itech nonmej tonalmej ijkuak omomiaktilijtokaj discípulos, judíos tlen otlajtouayaj griego okinmixnamikej judíos tlen otlajtouayaj hebreo, porque siuamej tlen oixpoliuik innamik amo okinmakayaj miak tlakuali tlen mojmostla okixejxelouayaj. 2 Ikinon 12 apóstoles okinnechikojkej nochtin discípulos uan okinmiluijkej: “Tejuan amo uelis tikkauaskej titlamachtiskej iTlajtol toTajtsin Dios para tikxejxeloskej tlakuali. 3 Nokniuan, xikinpejpenakan chikome tlakamej tlen namouan katej uan kipiaj kuali inyelis. Noijki makipiakan espíritu santo uan mayetokan ixtlamatkej. Yejuan makichiuakan non tekitl miak ipati. 4 Tejuan nochipa tiktlatlaujtiskej toTajtsin Dios uan titlamachtiskej iTlajtol”. 5 Nochtin discípulos okinpakti tlen okijtojkej apóstoles. Yejuan okipejpenkej Esteban porque otlaneltokaya uan okipiaya espíritu santo. Noijki okinpejpenkej Felipe, Prócoro, Nicanor, Timón, Parmenas uan Nicolás tlen oualaya Antioquía uan omochi judío. 6 Satepan okinuikakej inmixpan apóstoles. Yejuan omotlatlaujtijkej uan inpan okintlalijkej inmauan.
7 ITlajtol toTajtsin Dios okachi omotematiltiaya uan okachi omomiaktiliayaj discípulos ompa Jerusalén. Noijki miakej teopixkej otlaneltokakej.
8 ToTajtsin Dios okiseliaya Esteban uan okimakaya ichikaualis. Esteban okinchiuaya miakej milagros uan miak tlamantli tetlajtlachialti inmixpan oksekimej. 9 Pero sekimej tlakamej omokualanitoj iuan Esteban. Yejuan opouiayaj itech sinagoga* tlen omotokayotiaya Libertos. Oksekimej oualayaj altepetl Cirene, Alejandría, Cilicia uan Asia. 10 Pero amo ueli okitlaniliayaj Esteban ijkuak otlajtouaya, porque ye okatka ixtlamatki uan okipiaya espíritu santo. 11 Ikinon yejuan okinmichtakatlatlaluijkej sekimej tlakamej makijtokan: “Otikkakej okiuijuikalti Moisés uan toTajtsin Dios”. 12 Ijkon okinkualanijkej akinmej ochantiayaj itech altepetl, tlayekankej uan akinmej otlamachtiayaj tlanauatil. Yejuan san niman okikitskitoj Esteban uan okiuikakej inmixpan akinmej opouiayaj Sanedrín. 13 Okintemojkej sekimej tlakamej tekajkayajkej uan yejuan okijtojkej: “Nin tlakatl san kiteneua itemplo toTajtsin Dios uan iTlanauatil Moisés. 14 Yotikkakej kijtojtinemi Jesús Nazareno kixixinis nin templo, uan kipatlas tlen kijtoua iTlanauatil Moisés”.
15 Nochtin tlen okatkaj* itech Sanedrín okitakej ixko Esteban omotaya ken ixko se ángel.