Okse ilibro Samuel
23 Nin tlen saiktlami okijto David:
“Itlajtoluan David ikone Jesé,
itlajtoluan tlakatl tlen okiueyitlalijkej,
akin okipejpenki iDios Jacob
uan akin teyolpakti tlakuika itlakuikaluan altepetl Israel.
2 Iespíritu Jehová nopatka otlajto,
itlajtoluan okatkaj ipan nonenepil.
3 IDios Israel otlajto,
akin se Ueyi Tetl* tlen iaxka Israel onechilui:
‘Tla akin tlanauatia yolkuali
uan ijkuak tlanauatia sapanoua kitlakaita* Dios,
4 non yetoskia ken tlauili ijkuak tlanesi uan ijkuak petlani tonaltsin,
ken ijkuak tlanesi uan amo tlamixtemi.
Yetoskia ken ijkuak yopanok kiauitl uan yotlachipauik,
tlen kichiua tlalpan matlaxoxouia’.
5 ToTajtsin Dios kita nofamilia ijkon tlanauatia,
porque ye nouan okichi se acuerdo tlen nochipa yetos,
ye okiyekijto tlen kichiuas uan nikneltokilia ijkon mochiuas.
Tlen ye okijto nechpaleuis manipaki uan nechmakixtis,
ikinon ne uan nofamilia kuali tiyetoskej.
6 Pero akinmej amitlaj inpati kintlamotlaj ken xiuitl uitsyo,
tlen amikaj ueli kikitskia.
7 Tla se tlakatl kineki kikitskis,
moneki kipias se tepostli uan ikojyo se lanza
uan ompa moneki nochi kichichinoskej”.*
8 Ijkin intoka isoldados David tlen chijchikauakej: Joseb-Basébet akin tahkemonita, ye okinyekanaya ok ome soldados chijchikauakej. Se tonal okinmikti 800 tlakamej ika ilanza. 9 Satepan okatka Eleazar ikone Dodó, ikone Ahohí. Ye noijki okatka iuan ok ome soldados chijchikauakej tlen okatkaj iuan David ijkuak okinmixnamikej filisteos. Filisteos ompa omonechikojkej ijkuak omochi guerra uan ijkuak tlakamej israelitas oyajkej, 10 Eleazar ompa omoka uan okinmikti filisteos hasta omasotlauak uan omasepouik porque okikitskijtoka espada. Non tonal Jehová okichi matlatlanikan uan soldados ikuitlapan oyayaj para kinkixtiliskiaj tlen ipati akinmej yomikaj.
11 Okse soldado okatka Samá ikone Agué akin hararita. Ijkuak filisteos omonechikojkej Lehí, ik kanin okatka se tlali kanin otoktoka lentejas, israelitas okincholilijkej filisteos. 12 Pero ye omoka itlajkotia tlali para kimaluis tlatoktli uan okinmikti filisteos, ijkon Jehová otlatlanki.
13 Okatkaj treinta akinmej otlayekanayaj, eyi tlen ompa opouiayaj, otemokej ijkuak otlaololouayaj uan okitatoj David ijtik cueva tlen okatka Adulam. Miakej soldados filisteos omokajtokaj ixtlauak* Refaím. 14 David okatka kanin omotlatiaya uan sekimej soldados filisteos okatkaj Belén. 15 Ijkuakon David okijto okinekiaya nin tlamantli: “¡Inakastlan ipuerta altepetl Belén kinechikouaj atl uan niknekiskia nikonis non atl!”. 16 Satepan nonmej eyi soldados chijchikauakej okalakej kanin omokajtokaj filisteos, inakastlan ipuerta altepetl Belén kanin okinechikouayaj atl, okikixtijkej atl uan okiuikilijkej David. Pero ye amo okinek konis uan tlalpan okinoki* ken se tetliokolil para Jehová. 17 Okijto: “¡Jehová ne amo keman ijkon nikchiuaskia! ¿Kox uelis nikonis inmieso ninmej tlakamej tlen oyajkej maski uelis mikiskiaj?”. David amo okinek konis non atl. Ijkon okichijkej eyi isoldados tlen chijchikauakej.
18 Okatkaj ok eyi soldados chijchikauakej, se de nonmej soldados okatka Abisái ikni Joab ikone Zeruyá, ye okinyekanaya ok ome soldados. Abisái ika ilanza okinmikti trescientos tlakamej, yejuan eyi miakej okinmixmatiayaj. 19 De nonmej eyi, Abisái otlayekanaya uan okixmatiayaj pero amo okichi ijkon ken achto eyi soldados chijchikauakej.
20 Benaya ikone Jehoiadá okatka yolchikauak uan ompa altepetl Cabzeel okichi miak tlamantli tetlajtlachialti. Ye okinmikti ome ikoneuan Ariel tlen ialtepe okatka Moab, noijki se tonal ijkuak otlaseuetski okalak ijtik se tekochtli uan ompa okimikti se león. 21 Noijki okimikti se egipcio tlen okatka sapanoua uejkapantik.* Benaya san okiuikaya se kouitl pero egipcio okikitskijtiaya se lanza. Ye okixnamik egipcio, okikuili ilanza uan ika okimikti. 22 Benaya ikone Jehoiadá ijkon okichi uan miakej okixmatiayaj ijkon ken eyi soldados chijchikauakej. 23 Maski Benaya okachi okixmatiayaj amo ken oksekimej treinta soldados, ye amo okichi ijkon ken achto eyi soldados chijchikauakej. Pero David okitlali Benaya makinyekana isoldados tlen okimaluiayaj.
24 Sekimej tlen opouiayaj inuan treinta soldados chijchikauakej ijkin omotokayotiayaj: Asahel ikni Joab, Elhanán ikone Dodó tlen ialtepe okatka Belén, 25 Samá akin harodita, Elicá akin harodita, 26 Hélez akin paltita, Irá ikone Iqués akin tecoita, 27 Abí-Ézer akin anatotita, Mebunái akin husatita, 28 Zalmón akin ahohíta, Maharái akin netofatita, 29 Héleb ikone Baaná akin netofatita, Ittái ikone Ribái, ye ochantiaya Guibeá intlal benjaminitas, 30 Benaya akin piratonita, Hidái tlen ialtepe okatka ik ibarrancas Gaas, 31 Abí-Albón akin arbatita, Azmávet akin bar-humita, 32 Eliahbá akin saalbonita, ikoneuan Jasén, Jonatán, 33 Samá akin hararita, Ahiam ikone Sarar akin hararita, 34 Elifélet ikone Ahasbái, ikone Maacat, Eliam ikone Ahitofel akin guilonita, 35 Hezró akin carmelita, Paarái akin arbita, 36 Igal ikone Natán tlen ialtepe okatka Zobá, Baní akin gadita, 37 Zélec akin ammonita, Naharái akin beerotita, akin okinuikiliaya iteposuan Joab ikone Zeruyá, 38 Irá akin itrita, Gareb akin itrita 39 uan Urías akin hitita. Okatkaj 37 soldados chijchikauakej.