Hechos de apóstoles
24 Makuili tonal satepan, teopixki Ananías tlen otlayekanaya oyajki Cesarea inuan sekimej tlayekankej uan se abogado itoka Tértulo. Yejuan okitatoj tekiua uan okiteluitoj Pablo. 2 Ijkuak okiluijkej Tértulo matlajto, ye opejki kiteluia Pablo ixpan tekiua Félix uan okijto:
“Timitstlasojkamatiliaj porque techpaleuia kuali matiyetokan. Itech nin altepetl tikpiaj miak tlamantli porque tiixtlamatki uan kuali titlanauatia. 3 Tejuatsin tekiua Félix, timitstlasojkamatiliaj nochi nin tlamantli. 4 Pero amo tiknekij okachi timitstonalpoloskej, ikinon nimitstlatlaujtia tepitsin xikkaki tlen timitsiluiskej porque te tiyolkuali. 5 Yotikitakej nin tlakatl san tlakuejsojtinemi. Ipan nochi tlaltikpak kintlatlaluijtinemi judíos makinmixnamikikan tekiuajkej. Ye kiyekana inreligión nazarenos. 6 Noijki okinekiaya kisokiotis templo ikinon otikkitskijkej. 7 * 8 Ijkuak moneuian tiktlajtlanis tlen okichi, tikitas melauak tlen timitsiluiaj”.
9 Satepan judíos noijki opejki kiteluiaj uan okijtojkej melauak tlen omoijto. 10 Tekiua okiyekitak Pablo para matlajto. Ijkuakon Pablo okijto:
“Nipaki moixpan nimopaleuis porque nikmati yikipia miak xiuitl titlaixkomaka itech nin altepetl. 11 Yikin kipia 12 tonal onia* Jerusalén onikueyichiuato toTajtsin Dios. Tejuatsin uelis tikmatis melauak tlen nikijtoua. 12 Yejuan okitakej amikaj iuan onimokualanijtoka itech templo. Noijki amo onikinkuejsojtinemiaya oksekimej itech sinagogas* nion itech altepetl. 13 Yejuan amo uelis kiteititiskej tleka axkan nechteluiaj. 14 Pero ne nikmokuitia niktlakamati* tlen yejuan kitokayotiaj yankuik religión. Niktekichiuilia inDios nouejkatatajuan. Nikneltoka tlen ijkuilitok itech iTlanauatil Moisés uan tlen okijkuilojkej profetas. 15 Ne nikneltoka toTajtsin Dios kinyolitis akinmej yoixpolikej ijkon ken ninmej tlakamej kineltokaj. Kinyolitis akinmej yolkualmej uan akinmej amo yolkualmej. 16 Ikinon nochipa nimochijchikaua nikpias chipauak notlalnamikilis ixpan toTajtsin Dios uan inmixpan tlakamej. 17 Opanok miak xiuitl uan onikintliokoliko tomin akinmej chantij itech noaltepe. Noijki oniktlatliokoliko toTajtsin Dios. 18 Ijkuak onechajsitoj itech templo nikchijtok nin tlamantli, ne yonimochipajka ken kijtoua iTlanauatil Moisés. Amo miakej nouan okatkaj uan amikaj onikkualaniaya, pero ompa okatkaj sekimej judíos tlen oualayaj Asia. 19 Yejuan omonekiaya nikan yetoskej uan nechteluiskej tla onikchi itlaj amo kuali. 20 Tlamo ninmej tlakamej makijtokan tlen amo kuali onikchi ijkuak onikatka kanin kajki Sanedrín. 21 Ne san chikauak ompa onikijto: ‘¡Axkan namoixpan nechixkomakaj porque nikneltoka kinyolitiskej akinmej yoixpolikej!’”.
22 Félix kuali okinmixmatiaya akinmej opouiayaj itech Ojtli tlen melauak. Ikinon okijto okse tonal kitaskia nin tlamantli uan nochtin okinmilui: “Nikijtos ken tikyektlaliskej nin ouijkayotl ijkuak uits* soldado Lisias tlen tlayekana”. 23 Satepan okinauati tlakatl tlen okinyekanaya soldados makitsakua Pablo uan makimalui. Pero okilui makikauili makichiua seki tlamantli, uan makinkauili tokniuan makimakatij tlen okipolouaya.
24 Seki tonal satepan, Félix oajsito iuan isiua tlen okatka judía uan omotokayotiaya Drusila. Félix otlanauati makinotsatij Pablo uan okikak ijkuak okilui ye okineltokaya Cristo Jesús. 25 Pablo okijto moneki tikchiuaskej tlen kuali uan moneki timonauatiskej. Noijki okijto toTajtsin Dios tlaixkomakas ikinon Félix omomojti uan okilui: “Axkan xio uan oksepa nimitsnotsas ijkuak nimajxilis”. 26 Félix otlanauatiaya miak uelta makinotsatij Pablo para iuan motlapouiskia, porque okinekiaya makimaka tomin. 27 Ome xiuitl satepan, Porcio Festo okipatkayoti Félix. Pero Félix okika Pablo matsakto porque okinekiaya kuali mokauas inuan judíos.