Eyi icarta Juan
1 Ne akin yonikokoxkatik* nimitstlajkuililia tokni Gayo uan nimitstlasojtla. Ne nimitstlasojtla ika nochi noyolo.
2 Nokni, nimotlatlaujtia kuali makisa nochi tlen tikchiua uan kuali xiyeto, ijkon ken axkan kuali kisa tlen tikchiua. 3 Sapanoua onipaki ijkuak oualajkej tokniuan uan okijtojkej amo tikkaua tlen melauak uan nochipa tikchiua tlen melauak. 4 Okachi nipaki porque nikmati nokoneuan nochipa kichiuaj tlen melauak.
5 Nokni, te tikteititia amo tikkaua toTajtsin Dios ijkuak tikinpaleuia tokniuan maski amo tikinmixmati. 6 Yejuan okinmiluijkej akinmej monechikouaj* te titetlasojtla. Nimitstlatlaujtia xikinmaka tlen kinpoloua ijkuak yejuan yaskej uan xikchiua ijkon ken kipaktia toTajtsin Dios. 7 Porque yejuan okitematiltitoj itoka toTajtsin Dios uan amo okiselijkej tlen inmiaxka akinmej chantij itech okseki altepemej. 8 Ikinon tejuan moneki kuali tikinseliskej tokniuan ken yejuan para titlapaleuiskej mamotematilti tlen melauak.
9 Onikintlajkuilili akinmej monechikouaj* pero Diótrefes tlen nochipa kineki tlayekanas, amo kitlakaita tlen tejuan tikijtouaj. 10 Ikinon tla nias namechitati, nikteititis tlen kichijtok porque kijtojtinemi amo kuali tlen tikchiuaj. Pero amo san non kichiua, noijki amo kintlakaita tokniuan uan amo kinselia. Uan akinmej kinekij kinseliskej tokniuan, ye amo kinkauilia makinselikan uan kinkixtia itech tlanechikol.
11 Nokni, xikchiua ken akinmej kichiuaj tlen kuali uan amo xikchiua ken akinmej kichiuaj tlen amo kuali. Akin kichiua tlen kuali kijtosneki kichiua ken toTajtsin Dios. Akin kichiua tlen amo kuali kijtosneki amo kixmati toTajtsin Dios. 12 Nochtin tokniuan kijtouaj kuali tlen kichiua Demetrio porque ye kichiua tlen melauak. Tejuan noijki tikijtouaj tlen ye kichiua uan te tikmati melauak tlen tikijtouaj.
13 Nikneki miak tlamantli nimitsiluis pero amo nikneki nikijkuilos itech se carta. 14 Nikneki nias nimitsitati uan mouan nimotlapouis.
Xikpia yolseuilistli.
Mitsontlajpalouaj tokniuan. Noijki techintlajpalili sejse tokniuan.