Josué

24 Ompa Siquem ixpan akin melauak toTajtsin Dios, Josué okinnechiko nochtin intribus israelitas, tlayekankej, jueces, akinmej otlayekanayaj uan akinmej okinnauatiayaj israelitas. 2 Josué okinmilui nochtin israelitas: “Nin tlen kijtoua Jehová iDios Israel: ‘Namouejkatatajuan ochantiayaj okse lado Aueyatl,* yejuan achto okinueyichiuayaj oksekimej dioses noijki Taré ipapa Nacor uan Abrahánʼ”.

3 “‘Satepan namouejkatata Abrahán onikuikak okse lado ik kanin kajki Aueyatl. Onikchi makipanoui nochi tlali Canaán uan onikinmiakili ixuiuan. Onikmakak ikone Isaac, 4 uan Isaac onikmakak Jacob uan Esaú. Satepan Esaú onikmakak tepetl Seír, Jacob uan ikoneuan otemokej altepetl Egipto. 5 Satepan onikintitlanki Moisés uan Aarón ompa Egipto, noijki oniktitlanki chauistli uan onamechmakixti. 6 Ijkuak onikinkixti namopapanuan Egipto uan egipcios tlen oyayaj inpan incaballos uan incarretas tlen ika otemiktiayaj okinkuitlapantokakej hasta kanin kajki mar Rojo uan yejuan oajsitoj kanin kajki mar, 7 opejki kitlatlaujtiaj Jehová. Ikinon oniktlali se mixtli tliliuik tlatlajkotia para egipcios amitlaj makintoktikan* uan inpan onikkajka mar para mamikikan. Namejuan onankitakej tlen onikintokti* egipcios, noijki miak xiuitl onankatkaj kanin tlauakiʼ”.

8 “‘Satepan onamechuikak ik okse lado Jordán ik kanin kajki intlal amorreos uan yejuan okinekiayaj namechmiktiskej. Pero onanmechinmaktili para xikmokauikan intlal uan ne namoixpan onikinmikti. 9 Ijkuakon Balac ikone Zipor akin otlanauatiaya Moab, okinmixnamik israelitas. Ye okinauati Balaam ikone Beor para manamechuijuikalti.* 10 Pero amo oniknek nikkakis Balaam ikinon ye onamechteochi miak uelta uan inmak onamechmakixtiʼ”.

11 “‘Namejuan onankipanouijkej aueyatl Jordán uan onanmajsitoj altepetl Jericó. Ne onikchi xiktlanilikan akin okiyekanaya Jericó uan akinmej okinyekanayaj amorreos, perizitas, cananeos, hititas, guirgaseos, heveos uan jebuseos. 12 Ne onikchi yejuan mamoyolkokokan* uan onamechcholilijkej ijkon ken okinpanok ome tekiuajkej tlen okinnauatiayaj amorreos. Amo porque otikintlanili ika moespada uan moarco. 13 Namejuan opejki nanchantij itech tlalmej tlen amo onanmochijchikajkej nankimoaxkatiskej uan altepemej tlen amo onankinchijkej. Nankikuaj tlen kitemakaj uvajkouitl uan olivoskouitl tlen namejuan amo onankitokakejʼ”.

14 “Ikinon sapanoua xiktlakaitakan* Jehová uan xiktekichiuilikan ika namoyolo chipauak uan amo xikkauakan. Xikinpojpolokan dioses tlen okinueyichiuayaj namouejkatatajuan ik okse lado Aueyatl uan Egipto uan xiktekichiuilikan Jehová. 15 Tla namejuan amo nankinekij nankitekichiuiliskej Jehová, axkan xikpejpenakan akin nankinekij nankitekichiuiliskej. ¿Nankinekij nankintekichiuiliskej dioses tlen okinueyichiuayaj nanmouejkatatajuan ik okse lado Aueyatl? Noso ¿nankintekichiuiliskej indioses amorreos, tlen katej kanin namejuan nanchantij? Pero ne uan akinmej nouan chantij tiktekichiuiliskej Jehová”.

16 Ijkuakon nochtin israelitas okinankilijkej: “Amo tikintekichiuiliskej oksekimej dioses, san tiktekichiuiliskej Jehová. 17 ToDios Jehová otechkixti uan okinkixti topapanuan ompa Egipto kanin otikatkaj titlakeualmej. Ye toixpan okinchi uejueyij milagros uan otechmalui ipan ojtli uan intlajkotia altepemej kanin otipanokej. 18 Jehová okinkixti akinmej ochantiayaj itech ninmej altepemej uan noijki amorreos tlen nikan ochantiayaj. Ikinon tejuan noijki tiktekichiuiliskej Jehová porque san ye toTajtsin Dios”.

19 Josué okinmilui israelitas: “Namejuan amo uelis nankitekichiuiliskej Jehová, porque ye se Dios santo uan se Dios tlen kineki san ye makitekichiuilikan. Amo namechtlapojpoluis tla nankixnamikij uan nantlajtlakolchiuaj. 20 Tla nankikauaj Jehová uan nankintekichiuiliaj dioses tlen oksekan kinueyichiuaj, ye namouan kualanis uan namechixpolos maski ye yonamechpaleuijka”.

21 Pero israelitas okiluijkej Josué: “¡Tejuan tiktekichiuiliskej Jehová!”. 22 Josué okinmilui: “Axkan namejuan nankimatij namoselti onankipejpenkej nankitekichiuiliskej Jehová”. Yejuan otlanankilijkej: “Kema, tikmatij”.

23 Josué okijto: “Xikinpojpolokan dioses tlen oksekan kinueyichiuaj tlen katej ik kanin nanchantij uan ika nochi namoyolo xiktekichiuilikan Jehová iDios Israel”. 24 Nochtin israelitas okiluijkej Josué: “¡Tiktekichiuiliskej toDios Jehová uan tiktlakamatiskej!”.*

25 Non tonal Josué okichi se acuerdo iuan israelitas, okinmilui itlaj makichiuakan uan okinmakak se tlanauatil ompa Siquem. 26 Tlen omoijto, Josué okijkuilo itech iTlanauatil toTajtsin Dios uan okitlali se ueyi tetl* itlampa ueyi kouitl ompa tlanakastlan kanin Jehová okichi mayeto santo.

27 Josué okinmilui israelitas: “Nin tetl okikak tlen Jehová otechilui, ikinon ijkuak nankitaskej nin tetl namechilnamiktis amo nankijtoskej ye amo namoDios”. 28 Satepan Josué okintitlanki israelitas uan yejuan oyajkej itech tlali kanin okinkajteuilijkej.

29 Ijkuak opanok nochi nin, Josué ikone Nun itekipanojka Jehová, okipiaya 110 xiuitl ijkuak omiki. 30 Josué okitokatoj itech tlali kanin okikajteuilijkaj ompa Timnat-Sérah itech tepeyo tlen kajki Efraín, ik inorte tepetl Gaas. 31 Israelitas okitekichiuilijkej Jehová ijkuak oyoltoka Josué uan noijki ijkuak oyoltokaj tlayekankej maski yomika Josué. Porque tlayekankej okitakej ken Jehová okinpaleui israelitas.

32 Desde Egipto israelitas okinualikakej iomiouan José uan okintokakej ompa Siquem. Kanin Jacob okinkouilijka ika 100 platajtomin seki tlali ikoneuan Hamor ipapa Siquem. Nochi non tlali okinkajteuilijkej ikoneuan José.

33 Noijki omiki Eleazar ikone Aarón, ye okitokakej itech tepetsintli tlen iaxka Finehás ikone Eleazar. Non tepetsintli kajki itech itepeyo Efraín.