Okse ilibro Samuel
22 David ijkin okitlakuikili Jehová ijkuak Jehová okimakixti inmak akinmej okikokoliayaj uan imak Saúl. 2 Ye okijto:
“Jehová ueyi tepexitl tlen noaxka, ye nechmakixtia, inauak nimopaleuia.
3 NoDios ueyi tetl tlen noaxka, kanin nimopaleuia,
ye noescudo, nechmakixtia porque chikauak. Kanin uelis nimopaleuis
uan kanin uelis nias, akin nechmakixtia. Te techmakixtia itlajkotia tlen amo kuali.
4 Ne niknotsa Jehová, san ye kinamiki makiueyichiuakan
uan ye nechmakixtis inmak akinmej nechkokoliaj.
5 Mikilis onechyaualouaya ken atl tlen majkokui ipan mar,
tlakamej tlen amitlaj inpati onechmomojtiayaj ken ijkuak ualtlaatemi.
6 Mikatekochtli* onechyaualoj ika mekamej
uan mikilis yonechkitskiaya.
7 Ijkuak onimotekipachouaya oniknotski Jehová,
oniknotski noDios.
Desde itemplo onechtenkak,
ijkuak chikauak onikijto manechpaleui, ye onechkak.
8 Tlaltikpak chikauak omolini uan omouiuioni,
kanin mokitskijtok iluikak otlalolinki
uan chikauak omolini porque ye fiero okualanki.
10 Okichi mamotlankuaketsa iluikak ijkuak ye otemouaya
uan ikxitlampa omotaya miak mixtli ken ijkuak mota kiauis.
11 Ye opatlantiualaya ipan se querubín.
Oualmonexti ipan iajasuan* se ángel.
12 Omoyaualo ika tlayoualotl uan ika mixtlayoualotl,
ken yetoskia omopacho* ika se kaltsintli.
13 Ika tlauili tlen okatka ixpan, okiski tlixochtli.
14 Ijkuakon desde iluikak Jehová okichi matlatijtikuini,
akin Ueyititok okichi mamokaki ijkuak otlajto.
15 Ika flechas okinmotlak uan ijkon okinxexelo,
okichi matlapejpetlani* uan san yejuan mamomojtikan.
16 Omotak tlen onka ijtik mar,
omotak kanin mokitskijtok tlaltikpak ijkuak Jehová okinmajuak,
ijkuak ye chikauak oyekaijyopitski.
17 Desde kanin tlauejkapan omaso,
onechkitski uan onechkixti ijtik atl kanin tlauejkatlan.
18 Onechmakixti imak akin onechkokoliaya tlen okatka chikauak,
onechmakixti inmak akinmej onechkokoliayaj tlen okatkaj okachi chijchikauakej.
19 Ijkuak onitlajyouijtoka yejuan onechixnamikej
pero Jehová onechpaleui.
20 Ye onechuikak kanin onimopaleui,
onechmakixti porque onikyolpaktiaya.
21 Jehová manechteochiua tla nikchiua tlen kuali,
nechchiuilia tlen kuali tla nomauan chipauakej.
22 Porque nio ipan iojui Jehová
uan amo nikkaua noDios.
23 Nochipa nikilnamiktos tlen okijto mamochiua
uan amo keman nikinkauas itlanauatiluan.
24 Ixpan nochipa niyetos niyolchipauak,
nimomaluis para amo nikchiuas tlen amo kuali.
25 Jehová manechteochiua tla nikchiua tlen kuali
uan manechteochiua tla amitlaj notlajtlakol.
26 Akin amo tekaua, te noijki amo tikkauas,
tlakatl akin yolchipauak te noijki iuan tiyolchipauak.
27 Akin chipauak te tikititia tichipauak
pero akin kichiua tlen amo kuali te tikititia tiixtlamatki.
28 Porque tikinmakixtia akinmej yolyamankej
pero amo kuali tikinmita akinmej moueyinekij uan tikteititis amitlaj inpati.
29 Pero te Jehová tinotlauil,
te Jehová techtlauilia kanin tlayoua.
30 Ijkuak techpaleuia ne ueli nikinmixnamiki akinmej tlachtektinemij,
ika ichikaualis noDios ueli nitlejko ipan se tepamitl.
31 Ajsitok iojui akin melauak toTajtsin Dios,
itlajtoluan Jehová chipauakej.
Akinmej itech mopaleuiaj ye ken se escudo.
32 Amo onka okse Dios ken Jehová.
San toTajtsin Dios se ueyi tetl.
33 Nimopaleuia itech akin melauak toTajtsin Dios,
ye kichiua mayeto ajsitok noojui.
34 Ye kichiua manitsikuini* ken se masatl,
kichiua manimoyekketo kanin tlauejkapan.
35 Ye kinyektlalia nomauan para ijkuak mochiuas guerra,
ika nomauan ueli niktilinia se arco de cobre.
36 Te techmaluia ika moescudo para techmakixtis
uan ken te tiyolyamanki nimoueyitlalia.
37 Te tikpatlaua ojtli kanin nio,
para amo niuetsis.
38 Nikinkuitlapantokas akinmej nechkokoliaj uan nikinmiktis,
amo nimokopas tla amo nikinpojpoloua.
39 Nikinmiktis uan nikinpatlachos para ayakmo mamoketsakan
uan mokauaskej nokxitlampa.
40 Te techchikauas ijkuak nias guerra,
tikchiuas akinmej nechkokoliaj noixpan mauetsikan.
41 Tikchiuas akinmej nechkokoliaj manechcholilikan
uan nikintlanilis akinmej nechkokoliaj.
42 Yejuan kitlajtlanij makinpaleuikan pero amikaj kinpaleuia,
maski kinotsaj Jehová ye amo kinnankilia.
43 Kuali nikinkuechos uan mokauaskej ken tlalpinoli,*
nikintlalpinolkopas* uan nikintlajtlaksas* ken sokitl* tlen kajki ipan ojtli.
44 Ijkuak noaltepe nechteneuas,* te techmakixtis.
Techmaluis para nikinyekanas altepemej
uan nechtekichiuilis se altepetl tlen ayamo nechixmati.
45 Akinmej uitsej itech okse altepetl nonauak moualtilantiaskej,
nechtlakamatiskej* ijkuak kikakiskej akin ne.
46 Akinmej uitsej itech okse altepetl ayakmo yetoskej yolchikauakej,
uiuiokaskej ijkuak kisaskej kanin mopaleuijtokej.
47 ¡Jehová yoltok! ¡Makiueyichiuakan Ueyi Tetl tlen noaxka!
¡Makiueyichiuakan noDios, ye se ueyi tetl tlen nechmakixtia!
48 Akin melauak toTajtsin Dios nopatka momakopa,
kichiua manikinnauati altepemej,
49 nechmakixtia inmak akinmej nechkokoliaj.
Inpan akinmej nechixnamikij, te techuejkapantlalia
uan techmakixtia imak akin kichiua tlen amo kuali.
50 Jehová nimitstlasojkamatilis intlajkotia altepemej
uan niktlakuikilis motoka,
51 te nopatka tikchiua manitlatlani,
otechpejpenki uan nochipa techititis
techtlasojtla uan amo techkauas ne nion noxuiuan”.