Tlen okijkuilo Lucas
10 Satepan Jesús okinpejpenki ok 70 discípulos uan okintitlanki ojome. Okinmilui mayakan itech nochi altepemej kanin ye yaskia. 2 Ye okinmilui: “Moneki tikololoskej miak tlatoktli pero amo katej miakej tlakeualmej. Ikinon xiktlatlaujtikan akin iaxka tlatoktli makinualtitlani tlakeualmej makololokan. 3 Xiakan uan ximomaluikan, porque namechtitlani ken ichkamej intlajko tekuanimej. 4 Amo xikuikakan namotominbolsa, amo xikuikakan namotlakualbolsa nion amo xikinuikakan namokakuan.* Noijki amo xitetlajpalojtiakan itech ojtli. 5 Ijkuak namajsitiuij tekalijtik, achto xitetlajpalokan: ‘Makipiakan yolseuilistli akinmej nikan chantij’. 6 Tla nankajsitiuij ikaj tlen kineki yolseuilistli, ye kipias yolseuilistli tlen nankinekij makipia. Pero tla amikaj nankajsiskej, namejuan nankipiaskej yolseuilistli. 7 Ximokauakan ichan, xikkuakan uan xikonikan tlen namechmakas, porque akin tekipanoua kimotlanilia itlaxtlauil. Amo san nouian ximokalotijtinemikan”.
8 “Noijki xikkuakan tlen namechmakaskej ijkuak namechseliskej itech se altepetl. 9 Xikinpajtikan kokoxkej tlen ompa katej uan xikinmiluikan: ‘Yiuits iTekiuajkayo toTajtsin Dios’. 10 Pero tla itech se altepetl amo namechseliaj, xiakan itech ojtli kanin miakej panouaj uan xikijtokan: 11 ‘Timokxitsetselouaj para mauetsi tlalpinoli tlen onka itech namoaltepe, uan ijkon xikmatikan amo kuali tlen onankichijkej. Pero xikmatikan yiuits iTekiuajkayo toTajtsin Dios’. 12 Ne namechiluia, yejuan okachi tlajyouiskej ijkuak toTajtsin Dios tlaixkomakas uan amo ken otlajyouijkej akinmej ochantiayaj Sodoma”.
13 “¡Mialmastin akinmej chantij Corazín uan akinmej chantij Betsaida! Porque tla akinmej chantij Tiro uan Sidón kinmitaskiaj milagros tlen onankinmitakej, yejuan yiuejkika moyolkopaskiaj. Noijki kimotlaliliskiaj intlaken tetsojtsopiti* uan motlaliskiaj ijtik tlikonextli. 14 Namejuan okachi nantlajyouiskej ijkuak toTajtsin Dios tlaixkomakas uan amo ken otlajyouijkej akinmej chantij Tiro uan Sidón. 15 ¿Nanyaskej iluikak namejuan tlen nanchantij Capernaúm? Amo. Namejuan nanyaskej ijtik Mikatekochtli”.*
16 “Akin namechkaki noijki nechkaki, uan akin amo namechkaki noijki amo nechkaki. Akin amo nechkaki noijki amo kikaki akin onechualtitlanki”.
17 Ijkuakon 70 discípulos omokopatoj. Yejuan opakiayaj uan okiluijkej Jesús: “ToTeko, hasta ejekamej* techtlakamatij* ijkuak tiknejnekij* motoka”. 18 Ye okinmilui: “Yonikitak ouetsiko Satanás ijkon ken ijkuak tlapejpetlani itech iluikak. 19 Ne yonamechmakak chikaualistli para inpan xitlajtlaksakan* kouamej uan kolomej.* Noijki yonamechmakak chikaualistli para xiktlanilikan akin namechkokolia uan amitlaj uelis namechkojkos. 20 Amo xipakikan porque ejekamej* namechtlakamatij.* Xipakikan porque namotoka yokijkuilojkej ompa iluikak”. 21 ToTajtsin Dios okimakak espíritu santo Jesús. Jesús sapanoua opaki uan okijto: “NoTajtsin, teixpan nimitsueyichiua, te moaxka iluikak uan tlaltikpak. Te otikinmatilti nochi nin tlamantli akinmej yolyamankej ken konemej pero kuali otikintlatili akinmej ixtlamatkej. Kema noTajtsin, tejuatsin ijkon otikmonekilti tikchiuas”. 22 Noijki okijto: “NoTajtsin onechmakak nochi tlen onka. Amikaj kixmati teKone, san toTajtsin kixmati. Noijki amikaj kixmati toTajtsin, san teKone kixmati uan nochtin tlen ye kineki makixmatikan”.
23 Ijkuakon Jesús okinmitak idiscípulos uan okinmichtakailui: “Pakij akinmej kitaj tlen namejuan nankitaj. 24 Ne namechiluia, miakej profetas uan tekiuajkej okinekiayaj kitaskej tlen namejuan nankitaj, pero amo okitakej. Noijki okinekiayaj kikakiskej tlen namejuan nankikakij, pero amo okikakej”.
25 Se tlakatl tlen kuali okixmatiaya iTlanauatil Moisés, omoketski porque okinekiaya kiyejyekos Jesús uan okitlajtlani: “Tlamachti, ¿tlen moneki nikchiuas para nochipa niyoltos?”. 26 Ye okilui: “¿Tlen kijtoua iTlanauatil Moisés? ¿Ken tikajsikamati?”. 27 Tlakatl okinankili: “‘Xiktlasojtla Jehová moDios ika nochi moyolo, ika nochi moyolilis, ika nochi mochikaualis uan ika nochi motlayejyekol’.* Noijki ‘xikintlasojtla oksekimej ijkon ken te timotlasojtla’”. 28 Jesús okilui: “Kuali tlen otikijto. Ijkon xikchijto uan nochipa tiyoltos”.
29 Tlakatl okinekiaya kiteititis okatka yolkuali ikinon okitlajtlani Jesús: “¿Akinmej moneki nikintlasojtlas?”. 30 Jesús okinankili: “Se tlakatl okiski Jerusalén uan okitlachtekijkej ijkuak oyaya Jericó. Yejuan okikixtilijkej itlaken, sapanoua okikojkojkej uan ompa okitlamotlateuakej. 31 Satepan ik ompa opanok se teopixki pero ijkuak okitak non tlakatl, opanok okse lado uan oyajki. 32 Noijki ompa opanok se levita pero ijkuak okitak non tlakatl, opanok okse lado uan oyajki. 33 Satepan ik ompa opanok se tlakatl tlen oualaya Samaria uan okiknomatki tlakatl tlen okikojkojkej. 34 Inauak omotoki, okitlalili aceite uan vino kanin okikojkojkej uan okikimilo ika tsotsoli.* Satepan okitlejkolti ipan iyolka, okikalotito uan ompa okimalui. 35 Mostlatika okimakak ome denario* akin okikaloti uan okilui: ‘Xikmalui uan tla itlaj okachi monekis, nimitstlaxtlauilis ijkuak nimokopati’. 36 ¿Tlen timokuayejyekoua?* ¿Katli ninmej eyi tlakamej okiteititi okitlasojtlak tlakatl tlen okitlachtekijkej?”. 37 Tlakatl okinankili Jesús: “Ye tlen okiknomatki”. Jesús okilui: “Xio uan noijki ijkon xikchiua”.
38 Ijkuak oyajkej, Jesús opanok itech se altepetsintli uan omokaloti ichan se siuatl itoka Marta. 39 Marta okipiaya se ikni itoka María. María omotlali ikxitlan Jesús uan okikaktoka tlen ye okijtouaya. 40 Pero Marta okichijtoka miak tlamantli ikinon okiluito Jesús: “NoTeko, ¿amo mitstekipachoua nokni san ne nechkauilia nochi manikchiua? Xikilui manechpaleuiki”. 41 Jesús okilui: “Marta, Marta, sapanoua timotekipachoua porque tikneki tikchiuas miak tlamantli. 42 Pero moneki tikchiuaskej san se tlamantli uan amo miak tlamantli. María okipejpenki tlen okachi kuali uan amikaj kikixtilis”.