Tlen okijkuilo Juan
11 Itech altepetsintli Betania, okatka se tlakatl itoka Lázaro tlen omokokouaya. Ye ochantiaya inuan ikniuan tlen omotokayotiayaj María uan Marta. 2 María ye tlen okixauili Jesús aceite ajuiak uan ika itsonkal okinuajuachili ikxiuan. Ye okatka ikni Lázaro tlen omokokouaya. 3 María uan Marta otlatitlankej makiluitij Jesús: “ToTeko, mokokoua moyolikni tlen tiktlasojtla”. 4 Ijkuak Jesús okimatki, okijto: “Non kokolistli amo kimiktis, ijkon kiueyichiuaskej toTajtsin Dios uan noijki kiueyitlaliskej iKone toTajtsin Dios”.
5 Jesús okintlasojtlaya Marta, María uan Lázaro. 6 Ijkuak okimatki Lázaro omokokouaya, ye ok omoka ome tonal kanin okatka. 7 Satepan okinmilui discípulos: “Oksepa matimokopakan Judea”. 8 Pero discípulos okiluijkej: “Rabí, yikin okinekiayaj mitsmojmotlaskej ika tetl ompa Judea, ¿uan tikneki oksepa tias?”. 9 Jesús okinnankili: “¿Amo melauak se tonal tlanestok 12 horas? Akin nemi ijkuak tlanestok, amitlaj ika mokxitlanuia porque kita tlauili tlen onka itech tlaltikpak. 10 Pero akin nemi youak, mokxitlanuia porque amo kipia tlauili”.
11 Satepan Jesús okijto: “Toyolikni Lázaro kochi pero ne nias nikijxititi”. 12 Discípulos okiluijkej: “ToTeko, pajtis tla san kochi”. 13 Jesús okinekiaya kinmiluis Lázaro oixpoliuik, pero yejuan omokuayejyekojkej* okinmilui moseuia uan kochi. 14 Ijkuakon Jesús okinyekilui: “Lázaro yoixpoliuik. 15 Nipaki porque amo ompa nankatej uan ijkon nantlaneltokaskej. Tiauij matikitatij”. 16 Tomás tlen okiluiayaj Gemelo okinmilui oksekimej discípulos: “Tejuan noijki matiuiaj para iuan tiixpoliuiskej”.
17 Ijkuak Jesús oajsito, Lázaro yokipiaya naui tonal otoktoka. 18 Betania okatka kanaj eyi kilómetros ik Jerusalén. 19 Miakej judíos okinyolchikauatoj Marta uan María porque oixpoliuik inmikni. 20 Marta okinamikito Jesús ijkuak okimatki ompa oyaya, pero María omoka kalijtik. 21 Marta okilui Jesús: “NoTeko, nokni amo ixpoliuiskia tla nikan tiyetoskia. 22 Pero nikmati toTajtsin Dios mitsmakas nochi tlen tiktlajtlanilis”. 23 Jesús okilui: “Mokni moyolitis”. 24 Marta okilui: “Ne nikmati moyolitis itech saiktlami tonal”. 25 Jesús okilui: “Ne niteyolitia uan niktemaka yolilistli. Akin nechneltokas oksepa yoltos maski mikis. 26 Noijki akin yoltok uan nechneltoka amo keman ixpoliuis. ¿Tikneltoka?”. 27 Marta okinankili: “Kema noTeko, nikneltoka te tiCristo. Te tiiKone toTajtsin Dios tlen ualaskia nikan tlaltikpak”. 28 Satepan Marta okinotsato María uan ichtaka okilui: “Tlamachti nikan kajki uan mitsnotsa”. 29 Ijkuak María ijkon okikak, omoketeuak uan okitato Jesús.
30 Jesús ayamo oajsiaya itech altepetsintli. Ye okatka kanin Marta okinamikito. 31 Judíos tlen okiyolchikauatoj María uan okatkaj kalijtik, okitakej omoketeuak uan oyajki. Yejuan okitokakej porque omokuayejyekojkej* okichokilito ikni kanin otoktoka. 32 María oajsito kanin okatka Jesús, ixpan omotlankuaketski ijkuak okitak uan okilui: “NoTeko, nokni amo ixpoliuiskia tla nikan tiyetoskia”. 33 Jesús oyoltilinki uan sapanoua omoyolkoko ijkuak okitak María ochokaya uan noijki judíos tlen iuan oyayaj. 34 Jesús okintlajtlani: “¿Kanin onankitokakej?”. Yejuan okinankilijkej: “ToTeko, xiuiki uan tikitas kanin toktok”. 35 Jesús ochokak. 36 Judíos okitakej uan okijtojkej: “Sapanoua okitlasojtlaya”. 37 Pero sekimej okijtojkej: “Tla ye okipajti se tlakatl tlen amo otlachiaya, ¿tleka amitlaj okichi para amo maixpoliui Lázaro?”.
38 Jesús oksepa oyoltilinki uan oyajki kanin otoktoka Lázaro. Lázaro otoktoka ijtik se cueva tlen otentsaktoka ika se tetl. 39 Jesús okijto: “Xiktokikan tetl”. Pero Marta ikni Lázaro, okilui: “NoTeko, xamo yotsojyayak porque yikipia naui tonal toktok”. 40 Jesús okitlajtlani: “¿Amo onimitsilui tla titlaneltokas tikitas ichikaualis toTajtsin Dios?”. 41 Ijkuakon okitokijkej tetl. Jesús oajkotlachixki uan okijto: “NoTajtsin, nimitstlasojkamatilia porque otechkak. 42 Ne nikmati nochipa techkaki, pero ijkon nimitsiluia para akinmej nikan katej makineltokakan te otechualtitlanki”. 43 Satepan chikauak okijto: “¡Lázaro, xikisa!”. 44 Ijkuakon okiski tlakatl tlen yoixpolika. Ikxiuan uan imauan okimilitokaj ika tsotsoli* uan noijki oixkimilitoka. Jesús okinmilui: “Xikkixtilikan tsotsoli* uan xikkauakan mauia”.
45 Miakej judíos tlen okitlajpalotoj María, okineltokakej Jesús ijkuak okitakej tlen okichi. 46 Pero oksekimej oyajkej okinmiluitoj fariseos tlen okichi Jesús. 47 Teopixkej tlen otlayekanayaj uan fariseos okinnechikojkej akinmej opouiayaj itech Sanedrín uan okijtojkej: “¿Tlen tikchiuaskej? Porque nin tlakatl kinchiua miakej milagros. 48 Nochtin kineltokaskej tla tikkauiliskej ijkon makichijtinemi. Romanos techkixtilikiuij templo uan kimoaxkatiskej toaltepe”. 49 Pero ompa okatka se tlakatl itoka Caifás tlen okatka teopixki itech non xiuitl. Ye okinmilui: “Namejuan amitlaj nankajsikamatij. 50 Namejuan amo nankitaj okachi namechpaleuis mamiki san se tlakatl inpatka nochtin, uan amo tla pojpoliuis nochi altepetl”. 51 Caifás amo ijkon okijto san porque ye ijkon omokuayejyeko.* Ijkon okijto porque okatka teopixki non xiuitl uan okitematilti toTajtsin Dios okijto Jesús mikiskia inpatka judíos. 52 Pero amo mikiskia san inpatka judíos. Noijki para san sekan kinnechikos ikoneuan toTajtsin Dios tlen xixintokej. 53 Ijkuakon opejki kitemouaj ken kimiktiskej Jesús.
54 Ikinon Jesús ayakmo onemiaya teixpan kanin okatkaj judíos. Ye oyajki itech se altepetl itoka Efraín, ik kanin tlauaki uan ompa omoka inuan discípulos. 55 Ijkuakon judíos yikichiuaskiaj Pascua. Miakej tlen oksekan ochantiayaj, oyajkej* Jerusalén ijkuak ayamo opeuaya Pascua para mochipauaskiaj ijkon ken okijtouaya iTlanauatil Moisés. 56 Yejuan opejki kitemouaj Jesús. Itech templo omotlajtlaniayaj: “¿Tlen nankijtouaj? ¿Kox uits itech iluitl noso amo?”. 57 Fariseos uan teopixkej tlen otlayekanayaj, otlanauatijkej tla ikaj kimatiskia kanin okatka Jesús makinmiluiti para kikitskiskej.