Okse ilibro Samuel

14 Joab ikone Zeruyá, okimatki tekiua David okilnamikiaya Absalón. 2 Ijkuakon Joab otlanauati mauiaj altepetl Tecoa makitemotij se siuatl ixtlamatki uan okilui: “Xikchiua ken ikaj akin sapanoua moyolkokoua, xikonaki* motlaken tlen makiteititi sapanoua timoyolkokoua uan amo xikmotlalili aceite. Xikchiua ken se siuatl tlen yikipia miak tonal kichokilia ikaj akin omiki. 3 Satepan xikitati tekiua uan xikilui tlen nimitsiluis”. Joab okilui non siuatl tlen omonekiaya kiluis tekiua.

4 Ijkuak siuatl tecoita okitato tekiua, ouetski tlalpan, omoixtlapacho uan okilui: “Tekiua, techpaleui”. 5 Tekiua okitlajtlani: “¿Tlen mitspanoua?”. Ye okilui: “Nonamik omiki. 6 Noteko, ne onikinpiaya ome notelpochuan pero ijkuak okatkaj tlala omokitskijkej* uan amikaj okatka para kinxelos ikinon se nokone okikojko okse uan okimikti. 7 Axkan nochi nofamilia nechixnamiki uan kijtojtinemi: ‘¡Xiktemakti motelpoch akin okimikti ikni para matikmiktikan uan ijkon kitlaxtlauas iyolilis ikni tlen okimikti! Maski amikaj makimokaui tlen moaxka’. Yejuan kimiktiskej saiktlami nokone, ijkon kiseuiskej notlixoch,* noijki itoka nonamik pojpoliuis uan nikan ayakmo nikinpias noxuiuan”.

8 Ijkuakon tekiua okilui non siuatl: “Xio mokalijtik, ne nitlanauatis makiyektlalikan tlen mitspanotok”. 9 Non siuatl okilui tekiua: “Noteko uan notekiua, ne uan ikalijtik nopapa matechtlajtlakoltikan pero tejuatsin uan motekiuajkayo amo mamitstlajtlakoltikan”. 10 Ijkuakon tekiua okilui: “Tla ikaj ok itlaj mitsiluia, techualikili uan ayakmo keman mitskuejsos”.* 11 Siuatl okijto: “Nimitstlatlaujtia xikilnamiki Jehová moDios para akin kineki momakopas amo okachi manechtlajyouilti nion makimikti notelpoch”. Ye okinankili: “Ijkon ken Jehová melauak yoltok, ne nimitsiluia motelpoch amitlaj kitoktiskej”.* 12 Ijkuakon siuatl okilui: “Noteko uan notekiua, nimitstlatlaujtia techkauili itlaj manimitsilui”. Ye okinankili: “Xitlajto”.

13 Siuatl okilui: “¿Tleka otikchi tlen kintlajyouiltia akinmej pouij itech ialtepe toTajtsin Dios? Noteko, yotimotlajtlakolti ika tlen otikijto porque amo tikchiua mamokopa motelpoch tlen uejka kajki. 14 Timikiskej uan tipoliuiskej ijkon ken ijkuak atl kinokiaj* tlalpan. ToTajtsin Dios amikaj kimiktia, ye kimati akin uejka kajki amo moneki nochipa ompa yetos. 15 Ijkin onikiluiko noteko uan notekiua porque onechmomojtijkej ikinon onikijto: ‘Techkauilikan manimotlapoui iuan tekiua, xamo ye nechkakis uan nechpaleuis. 16 Xamo tekiua nechmakixtis imak tlakatl tlen kineki techkuilis ne iuan notelpoch tlen toTajtsin Dios otechmakak’. 17 Ikinon onikijto: ‘Manechyolseui tlen nechiluis tekiua’. Porque noteko uan notekiua kimati tlen kuali uan tlen amo kuali ijkon ken iángel akin melauak toTajtsin Dios. Mouan mayeto Jehová moDios”.

18 Tekiua okilui non siuatl: “Itlaj nimitstlajtlanis pero nikneki nochi techilui”. Ye okinankili: “Noteko uan notekiua, nimitstlatlaujtia xitlajto”. 19 Ijkuakon tekiua okitlajtlani: “¿Ye Joab omitsnauati ijkin xikchiua?”. Siuatl okinankili: “Ijkon ken tejuatsin melauak tiyoltok, noteko uan notekiua tlen tikijtoua melauak. Motlakeual Joab onechnauati tlen omonekiaya nikchiuas uan tlen omonekiaya nimitsiluis. 20 Motlakeual Joab ijkon okichi para xikpatla tlen timokuayejyekoua* pero tejuatsin tiixtlamatki ijkon ken iángel akin melauak toTajtsin Dios uan tikmati tlen panotok itech altepetl”.

21 Satepan tekiua okilui Joab: “Ijkon nikchiuas, xio uan xiknotsati Absalón”. 22 Joab ouetski tlalpan, omoixtlapacho uan okiueyichi tekiua. Ye okijto: “Noteko uan notekiua, axkan nikmati techselia porque otikchi tlen onimitsilui”. 23 Ijkuakon Joab oyajki Guesur uan okiualikak Absalón ompa Jerusalén. 24 Pero tekiua okijto: “Mamokopa ikalijtik pero amo uelis nechitaki”. Absalón omokopki ikalijtik pero amo okitato tekiua.

25 Itech nochi altepetl Israel san ye Absalón okatka okachi kuajkualtsin. Desde ikxiuan hasta itsonteko nochi kualtsin omotaya. 26 Itlamian sejse xiuitl omonekiaya motsonkaltekis porque okimachiliaya itsonkal sapanoua etik. Ijkuak omotsonkaltekiaya, itsonkal okatka etik kanaj ome kilo,* ijkon ken okatka etik tetl* tlen ika otlatamachiuayaj itech palacio. 27 Absalón okinpixki eyi ikoneuan uan se ichpoch okitokayoti Tamar, ye okatka kuajkualtsin.

28 Absalón ok ochantik Jerusalén ome xiuitl. Pero amo okitato tekiua. 29 Absalón okinekiaya kititlanis Joab makitati tekiua ikinon otlanauati makinotsatij pero ye amo okinek yas. Satepan otlatitlanki oksepa makinotsatij pero amo okinek yas. 30 Ikinon Absalón okinmilui itlakeualuan: “Inakastlan notlal, Joab kipia itlala kanin okitokak cebada. Xiakan xikchichinotij”.* Ijkuakon itlakeualuan Absalón okichichinotoj* itlala Joab. 31 Ijkuak ijkon opanok, Joab oyajki ikalijtik Absalón uan okilui: “¿Tleka motlakeualuan okichichinojkej* notlal?”. 32 Absalón okilui Joab: “Ne onitlanauati ijkin mamitsiluitij: ‘Xiuiki porque nikneki nopatka xiktlajtlaniti tekiua: “¿Tleka otitlanauati manechnotsatij Guesur? Okachi kuali tla ompa niyetoskia. Notekiua techkauili manimitsitati uan tla itlaj notlajtlakol, techmikti”’”.

33 Joab oyajki ixpan tekiua uan ijkon okilui. Ijkuakon tekiua okinotski Absalón, ijkuak ye oajsito ouetski tlalpan uan omoixtlapacho. Satepan tekiua okipipitso* Absalón.