Hechos de apóstoles
26 Agripa okilui Pablo: “Uelis titlajtos para timopaleuis”. Pablo okajkokuik ima uan opejki kijtoua:
2 “Tekiua Agripa, nipaki axkan moixpan nimopaleuis porque judíos nechteluiaj. 3 Tejuatsin kuali tikmati tlen kichiuaj judíos uan tlen kinkualania ikinon nimitstlatlaujtia kuali techkaki”.
4 “Miakej judíos tlen onechixmatkej ijkuak onimoskalti, kuali kimatij tlen onikchiuaya itech noaltepe uan ompa Jerusalén. 5 Tla yejuan kinekiskej uelis kijtoskej ne onikchiuaya ken fariseos tlen kitlakamatij* nochi tlen tlamachtia toreligión. 6 Pero axkan nechixkomakaj porque nikneltoka tlen toTajtsin Dios okinmilui touejkatatajuan. 7 Doce ifamilias Israel kichiaj toTajtsin Dios makichiua tlen okijto, ikinon tlajka uan youak kitekichiuiliaj ika nochi inyolo. Tekiua Agripa, judíos nechteluiaj porque nikneltoka nin tlamantli”.
8 “¿Tleka amo nankineltokaj toTajtsin Dios kinyolitis akinmej yoixpolikej? 9 Achto onimokuayejyekouaya* nikintoktis miak tlamantli akinmej kichiuaj ken Jesús Nazareno. 10 Ijkon onikchi ompa Jerusalén. Teopixkej tlen tlayekanaj onechkauilijkej manikintsakua miakej discípulos. Noijki onitlapaleui ijkuak okinekiayaj kinmiktiskej. 11 Miak uelta onikintlajyouilti itech sinagogas* porque oniknekiaya ayakmo matlaneltokakan. Yejuan sapanoua onechkualaniayaj ikinon hasta onikintemojtinemiaya itech okseki altepemej”.
12 “Se tonal onia Damasco porque teopixkej tlen tlayekanaj onechtitlankej ijkon manikchiuati. 13 Tekiua, ijkuak otiayaj itech ojtli kanaj tlajkotonal, se tlauili tlen oualaya iluikak onechualyaualo uan noijki akinmej nouan oyayaj. Non tlauili okachi opetlaniaya amo ken tonaltsin. 14 Tinochtin otiuetsitoj ipan tlali uan onikkak ikaj onechtlapoui ika hebreo: ‘Saulo, Saulo, ¿tleka techtemojtinemi? Te san moselti timokojkoua porque tikchiua ken ijkuak se toro kitejteliksa itlaj yakauitstik’. 15 Ne oniktlajtlani: ‘¿Akin tejuatsin noTeko?’. ToTeko onechnankili: ‘Ne niJesús uan te techtemojtinemi. 16 Ximoketsa, ne onimitsmonextili porque onimitspejpenki techtekichiuili. Noijki nikneki xiktematilti tlen yotikitak uan tlen satepan nimitsititis. 17 Ne nimitsmaluis itech nin altepetl uan itech okseki altepemej kanin nimitstitlanis, 18 para tikinmixtlapos oksekimej, para makisakan kanin tlayoua uan manemikan kanin onka tlauili. Makinnauati toTajtsin Dios uan ayakmo makinnauati Satanás. Ijkon toTajtsin Dios kintlapojpoluilis intlajtlakol uan kinmaxkatilis tlen kiseliskej akinmej yomoyolchipajkej porque nechneltokaj’”.
19 “Tekiua Agripa, ne onikchi tlen onechilui Jesús ijkuak onechmonextili. 20 Achto onikintlapouito akinmej chantij Damasco. Satepan onitetlapouito Jerusalén, itech nochi altepetl Judea uan itech okseki altepemej. Onikinmilui mamoyolkopakan, makiueyichiuakan toTajtsin Dios uan makiteititikan yomoyolkopkej. 21 Ikinon judíos onechkitskijkej itech templo uan okinekiayaj nechmiktiskej. 22 Pero toTajtsin Dios nechpaleuia ok manikintlapoui kuali tlajtoli akinmej ueyititokej uan akinmej amo ueyititokej. Ne san nikijtoua tlen profetas uan Moisés okijtojkej panoskia. 23 Yejuan okijtojkej Cristo tlajyouiskia uan achto kiyolitiskiaj. Ye tetlapouiskia itech nin altepetl uan itech okseki altepemej para kintlauiliskia”.
24 Ijkuak Pablo ijkon okijto para mopaleuis, Festo chikauak okilui: “¡Yotikuatlapolo Pablo! ¡Yotikuatlapolo porque sapanoua otimomachti!”. 25 Pero Pablo okilui: “Tejuatsin Festo ne amo nikuatlapoloua. Kuali tlen nikijtoua uan melauak. 26 Ne amo nimomojtia niktlapouis tekiua porque ye kuali kimati tlen nikijtoua. Ne nikmati ye kuali kimati tlen opanok porque amitlaj opanok san ichtaka. 27 Tekiua Agripa, ¿tikneltoka tlen kijtouaj profetas? Ne nikmati te tikneltoka”. 28 Pero Agripa okilui Pablo: “San niman tikchiuas manimochiua nicristiano”. 29 Pablo okilui: “Niktlatlaujtia toTajtsin Dios nochtin tlen axkan nechkaktokej mayetokan ken ne uan amo san tejuatsin. Pero amo makinmilpikan ika cadenas ijkon ken ne onechilpijkej”.
30 Ijkuakon omoketskej tekiua Agripa, Festo, Berenice uan nochtin tlen ompa okatkaj. 31 Ijkuak okiskej okimoluiayaj: “Nin tlakatl amo moneki kimiktiskej noso kitsakuaskej porque amitlaj okichi”. 32 Agripa okilui Festo: “Nin tlakatl uelis kikajkauaskiaj tla amo kitlajtlaniskia makixkomaka César”.