Jueces
21 Ompa Mizpá tlakamej israelitas okijtojkej:* “Nion se tochpoch tiknamiktiskej iuan se tlakatl benjaminita”. 2 Ikinon israelitas oyajkej ompa Betel. Omotlalijkej ixpan akin melauak toTajtsin Dios uan ompa chikauak otsajtsiayaj uan sapanoua ochokayaj hasta ijkuak otlapoyauik. 3 Okijtouayaj: “Jehová inDios israelitas, ¿tleka ijkon okinpanok israelitas? ¿Tleka moneki kipojpoloskej se intribu israelitas?”. 4 Mostlatika san kualkan* omejkej uan okichijkej se altar. Ompa okintlalijkej tetliokolilmej tlen tesetiliaj uan noijki tetliokolilmej tlen mochichinouaj.*
5 Ijkuakon israelitas otlajtlankej: “¿Tlen tribu amo touan omonechiko ixpan Jehová?”. Porque achto okijtojkaj,* akin amo omonechikoskia ixpan Jehová ompa Mizpá omonekiaya kimiktiskej. 6 Israelitas okinyolkoko tlen okinpanok benjaminitas uan okimoluiayaj: “Axkan yokipojpolojkej se intribu israelitas. 7 ¿Kanin tikinmajsiskej siuamej para tikinnamiktiskej inuan benjaminitas tlen ok omokajkej? Porque tejuan otikiluijkaj* Jehová amo tikinnamiktiskiaj inuan tochpochuan”.
8 Yejuan otlajtlankej: “¿Tlen tribu amo touan omonechiko ixpan Jehová ompa Mizpá?”. Ijkuakon omomatki akinmej ochantiayaj Jabés-Galaad amo oajsitoj kanin achto nochtin omonechikojkaj. 9 Ijkuak nochtin okinpojkej, okitakej amikaj oyajki tlen ochantiaya Jabés-Galaad. 10 Ikinon akinmej ompa omonechikojkej okintitlankej 12,000* soldados tlen okachi chijchikauakej uan okinnauatijkej: “Xiakan uan xikinmiktikan ika espada akinmej chantij altepetl Jabés-Galaad. Noijki xikinmiktikan siuamej uan konemej. 11 Ijkin xikchiuakan, xikinmiktikan siuamej tlen omotekakej iuan se tlakatl, noijki xikinmiktikan nochtin tlakamej”. 12 Pero ompa Jabés-Galaad intlajkotia akinmej ompa ochantiayaj, okinmajsikej 400 ichpochmej tlen ayamo omotekayaj iuan se tlakatl. Yejuan okinuikakej altepetl Siló ompa Canaán ik kanin omokajtokaj.
13 Satepan akinmej ompa omonechikojkej, okintitlankej sekimej tlakamej makinmiluitij benjaminitas tlen okatkaj kanin kajki ueyi tepexitl ompa Rimón, okinekiayaj oksepa kuali inuan mouikaskej. 14 Ikinon benjaminitas omokopkej uan israelitas okinmakakej ichpochmej tlen amo okinmiktijkej Jabés-Galaad. Pero amo nochtin okinmakakej insiua porque amo miakej ichpochmej okatkaj. 15 Akinmej ompa omonechikojkej okinyolkoko tlen okinpanok benjaminitas porque Jehová okichi ayakmo mayetokan inuan okseki intribus israelitas. 16 Ijkuakon tlayekankej otlajtlankej: “¿Kanin tikinmajsiskej insiuauan ninmej tlakamej tlen ayamo kipiaj insiua? Porque nochtin siuamej benjaminitas okinmiktijkej”. 17 Ijkuakon okinnankilijkej: “Para amo mapoliui se itribu israelitas, benjaminitas tlen amo okinmiktijkej amo moneki kipoloskej tlen okinkajteuilijkej. 18 Pero tejuan amo uelis tikinnamiktiskej inuan tochpochuan porque otikijtojkaj:* ‘Makiuijuikaltikan* akin kintemolis insiua benjaminitas’”.
19 Ijkuakon okijtojkej: “¡Xikilnamikikan! Sejse xiuitl ompa Siló mochiua se iluitl para Jehová, non altepetl kajki ik inorte Betel, ik kanin kajki ojtli kanin miakej panouaj tlen kisa Betel uan ajsiti Siquem ik kanin kisa tonaltsin uan ik isur Leboná”. 20 Tlakamej benjaminitas okinnauatijkej: “Xiakan uan ximotlatitij kanin katej uvajkojmej. 21 Ijkuak nankinmitaskej ichpochmej tlen chantij Siló mijtotiaj, namejuan moneki nankisaskej kanin katej uvajkojmej uan sejse namejuan xikuikakan se ichpochtli para iuan nanmonamiktiskej. Satepan ximokopakan itech itlal Benjamín. 22 Tla satepan uitsej inpapanuan noso ikniuan uan techiluiskej tleka ijkon opanok, tejuan tikinmiluiskej: ‘Xikinpaleuikan tlakamej benjaminitas, porque amo otikinmajsikej miakej siuamej para nochtin yejuan ijkuak opanok guerra. Namejuan amitlaj namotlajtlakol porque amo onankintemakakej namochpochuan’”.
23 Tlakamej benjaminitas okichijkej tlen okinmiluijkej. Sejse yejuan okiuikakej se ichpochtli tlen omijtotijtoka para iuan monamiktis. Satepan omokopkej itech tlali tlen okinkajteuilijkaj, oksepa okinyektlalijkej altepemej uan ompa omochantijkej.
24 Ijkuakon israelitas omoxexelojkej uan oyajkej kanin okatka intribu uan infamilia. Sejse yejuan oyajkej itech intlal tlen okinkajteuilijkaj.
25 Itech nonmej tonalmej israelitas amo okipiayaj intekiua uan sejse yejuan okichiuayaj tlen kuali okitayaj.