Achto ilibro Samuel
6 Chikome metstli filisteos okipixtokaj iArca Jehová. 2 Satepan filisteos okinnotskej teopixkej uan tlachixkej uan okintlajtlanijkej: “¿Tlen moneki tikchiuaskej ika iArca Jehová? Techiluikan ken tiktitlaniskej kanin okatka”. 3 Yejuan otlanankilijkej: “Tla nankititlaniskej iarca Jehová tlen ika omochi acuerdo, tlen iaxka inDios israelitas, noijki xiktitlanikan se tetliokolil. Amo xikilkauakan nankititlaniliskej non tetliokolil para ye manamechtlapojpolui. Ijkon nanpajtiskej uan nankimatiskej tleka namechtlajyouiltia”. 4 Filisteos okintlajtlanijkej: “¿Tlen tetliokolil moneki tiktitlaniskej para matechtlapojpolui?”. Teopixkej uan tlachixkej okinnankilijkej: “Xiktitlanikan makuili sauamej de oro uan makuili kimichimej de oro, porque makuili tekiuajkej namechnauatiaj. Uan noijki yejuan tlajyouiaj ijkon ken namejuan. 5 Moneki nankinchiuaskej imágenes de sauamej uan imágenes de kimichimej, porque kintlajyouiltijtokej akinmej chantij itech altepetl. Moneki nankiueyichiuaskej inDios israelitas, xamo ijkon ayakmo namechtlajyouiltis nion kitlajyouiltis namodios uan namoaltepe. 6 ¿Tleka moneki nanyoltlakuauaskej ijkon ken okichi faraón uan egipcios? Ijkuak inDios israelitas okintlajyouilti egipcios, yejuan okinkauilijkej israelitas makisakan uan oksekan oyajkej. 7 Xikchiuakan se yankuik carreta uan xikintemokan ome vacas tlen ayamo kintekipanoltiaj* uan tlen kinpiaj inkoneuan. Xikinmilpikan vacas itech non carreta pero inkoneuan oksepa xikintsakuatij kanin okatkaj. 8 Ipan carreta xiktlalikan iArca Jehová. Inakastlan non Arca xiktlalikan se caja uan ijtik non caja xikintlalikan sauamej uan kimichimej de oro uan xiktitlanikan ken tetliokolil para manamechtlapojpolui. Satepan xikkauilikan mauia 9 uan xikitakan kox yaui ipan ojtli tlen tlejko Bet-Semes, ik tlali kanin okatka. Tla ik ompa yaui, kijtosneki inDios israelitas ye akin fiero otechtlajyouilti. Pero tla amo ik ompa yaui, kijtosneki san porque ijkon opanok uan amo ye akin otechtlajyouilti”.
10 Tlakamej okichijkej tlen okinmiluijkej. Okintemojkej ome vacas tlen okinpiayaj inkoneuan uan okinmilpijkej itech carreta pero inkoneuan oksepa okintsakuatoj. 11 Satepan ipan carreta okitlalijkej iArca Jehová uan noijki caja tlen okinpiaya kimichimej de oro uan imágenes de sauamej. 12 Vacas melajka oyajkej ipan ojtli tlen tlejko altepetl Bet-Semes. Amo oyayaj inyekma nion inmiopochma uan noijki otsajtsitiayaj. Akinmej okinnauatiayaj filisteos oyayaj inkuitlapan vacas hasta kanin opeuaya Bet-Semes. 13 Akinmej ochantiayaj Bet-Semes okololojtokaj trigo ipan tlamaniktli uan ijkuak okitakej Arca sapanoua opakej. 14 Carreta okalak uan omoketsato inakastlan se ueyi tetl* itech itlala Josué akin betsemita. Okixitinijkej carreta uan vacas okimaktilijkej Jehová ken tetliokolil tlen mochichinoua.*
15 Satepan levitas okitemouijkej iArca Jehová uan caja tlen ijtik okatkaj sauamej uan kimichimej de oro uan okintlalijkej ipan ueyi tetl. Non tonal tlakamej tlen ochantiayaj Bet-Semes okimakakej Jehová tetliokolilmej tlen mochichinouaj* uan okimiktilijkej yolkamej.
16 Ijkuak makuili tekiuajkej tlen okinnauatiayaj filisteos okitakej nochi non, omokopkej Ecrón non tonal. 17 Filisteos okintitlankej sauamej de oro para Jehová makintlapojpolui. Altepetl Asdod okititlanki se, altepetl Gaza okititlanki okse, altepetl Asquelón okititlanki okse, altepetl Gat okititlanki okse uan altepetl Ecrón okititlanki okse. 18 Kimichimej de oro okatkaj makuili ijkon ken inmialtepeuan makuili tekiuajkej filisteos (altepemej tlen kuali otsaktokaj uan altepetsitsintin tlen okatkaj tlala).
Ueyi tetl tlen kajki itech itlala Josué akin betsemita uan kanin okitlalijkaj iArca Jehová hasta axkan kajki para itlaj makilnamikikan. 19 Pero toTajtsin Dios okinmikti tlakamej tlen ochantiayaj Bet-Semes porque okitakej iArca Jehová. Okinmikti 50,070* tlen ompa ochantiayaj. Nochtin akinmej ompa ochantiayaj okinchokilijkej akinmej omikej porque Jehová miakej okinmikti. 20 Tlakamej tlen ochantiayaj Bet-Semes otlajtlankej: “¿Akin uelis yetos ixpan Jehová, nin Dios santo? ¿Kanin yas ijkuak techkauas?”. 21 Satepan okintitlankej sekimej tlakamej makinmiluitij akinmej ochantiayaj Quiryat-Jearim: “Filisteos okikopkej iArca Jehová ikinon xiualtemokan uan xikuikakan”.