Achto ilibro Samuel
4 Nochi tlen okijtouaya Samuel okimatiayaj israelitas.
Itech nonmej tonalmej israelitas oyajkej omomijmiktitoj inuan filisteos. Israelitas omokauatoj inakastlan Ebenézer uan filisteos omokauatoj altepetl Afec. 2 Ijkuakon filisteos omotekpanatoj* para kinmiktiskiaj israelitas. Pero israelitas amo okintlaniliayaj filisteos. Kanin omomijmiktijtokaj, filisteos okinmiktijkej kanaj 4,000 tlakamej. 3 Ijkuak soldados israelitas omokopkej ik kanin omokajtokaj, akinmej okinyekanayaj israelitas okijtojkej: “¿Tleka Jehová okika matechtlanilikan filisteos? Matikixtikan uan touan matikuikakan iarca Jehová tlen ika omochi acuerdo* tlen kajki Siló, para matechmakixti inmak akinmej techkokoliaj”. 4 Ikinon okintitlankej tlakamej ompa Siló uan yejuan okikixtitoj arca tlen ika omochi acuerdo tlen iaxka Jehová akin kinnauatia nochtin ángeles. Ye kajki* ipan itrono intlajkotia querubines. Ome ikoneuan Elí, Hofní uan Finehás noijki oyajkej iuan iarca akin melauak toTajtsin Dios tlen ika omochi acuerdo.
5 Ijkuak iarca Jehová tlen ika omochi acuerdo oajsito ik kanin okatkaj israelitas, nochtin chikauak otsajtsikej hasta otlalolinki. 6 Ijkuak filisteos okikakej israelitas chikauak otsajtsikej, okijtojkej: “¿Tleka chikauak tsajtsij kanin katej hebreos?”. Ijkuak okimatkej iArca Jehová okatka ik kanin omokajtokaj hebreos, 7 filisteos omomojtijkej uan okijtojkej: “¡InDios yoajsito kanin katej!”. Noijki okijtouayaj: “¡Techtlaniliskej! ¡Porque amo keman ijkon opanouaya! 8 ¡Techtlaniliskej! ¿Akin techmakixtis imak nin Dios chikauak? Non Dios okintlajyouilti egipcios kanin tlauaki para tlatlamantli mamiktiakan. 9 Namejuan filisteos ximoyolchikauakan uan xikteititikan melauak nantlakamej. Tlamo ijkon nankichiuaj, nankintekichiuiliskej hebreos ijkon ken yejuan nanmechtekichiuiliaj. ¡Ikinon xikteititikan melauak nantlakamej uan xikinmiktikan!”. 10 Ijkuak filisteos okinmixnamikej israelitas okintlanilijkej uan sejse israelita ocholo ikalijtik. Ijkuakon miakej omikej 30,000* soldados israelitas okinmiktijkej. 11 Noijki filisteos okiuikakej iArca toTajtsin Dios uan okinmiktijkej Hofní uan Finehás ome ikoneuan Elí.
12 Kanin omomijmiktijtokaj, se tlakatl benjaminita ocholo uan non tonal oajsito Siló, itlaken okitsayanki uan okipiaya tlali ipan itsonteko. 13 Ijkuak tlakatl oajsito, Elí okatka* inakastlan ojtli. Ompa omochixtoka porque sapanoua okitekipachouaya iArca toTajtsin Dios. Ijkuak tlakatl oajsito itech altepetl uan okinmilui tlen opanok, akinmej ompa ochantiayaj chikauak otsajtsikej. 14 Ijkuak Elí okikak chikauak otsajtsiayaj, ye otlajtlanki: “¿Tleka chikauak tsajtsij?”. Tlakatl san niman okiluito Elí tlen opanok. 15 (Elí okipiaya 98 xiuitl uan ayakmo otlachiaya). 16 Ijkuakon non tlakatl okilui Elí: “¡Ne oniualcholo kanin momijmiktijtokej! Axkan nin tonal ompa oniualcholo”. Ijkuak Elí ijkon okikak, okitlajtlani: “Nokone ¿tlen opanok?”. 17 Non tlakatl okinankili: “Israelitas ocholojkej porque filisteos okintlanilijkej. Noijki mokoneuan Hofní uan Finehás omikej uan filisteos okiuikakej iArca akin melauak toTajtsin Dios”.
18 Ijkuak tlakatl okijto tlen okipanok iArca akin melauak toTajtsin Dios, Elí oajketia uan ouetsito inakastlan puerta kanin ye okatka, omokuexkochposteki* uan omiki. Porque yokokoxkatika* uan sapanoua etik okatka. Elí 40 xiuitl okinmixkomakak israelitas. 19 Ijkuakon isiuamo Elí, isiua Finehás, yikipiaskia ikone. Ijkuak isiuamo Elí okimatki okiuikakej iArca akin melauak toTajtsin Dios, imonta uan inamik omikej, san niman opejki tlajyouia porque yikipiaskia ikone uan ijkuakon oneski* ikone. 20 Non siuatl yomiktoka uan siuamej tlen inakastlan okatkaj okiluijkej: “Oneski se chokotsin ikinon amo ximomojti”. Pero ye amo okinkakili tlen okiluijkej nion okinnankili. 21 Non chokotsin okitokayoti Icabod* uan okijto: “Inueyilis israelitas oksekan oyajki”. Ijkon okijto porque okiuikakej iArca akin melauak toTajtsin Dios uan imonta uan inamik omikej. 22 Non siuatl ijkin okijto: “Inueyilis israelitas oksekan oyajki porque oksekan okiuikakej iArca akin melauak toTajtsin Dios”.