Achto ilibro Samuel
7 Ijkuakon tlakamej tlen ochantiayaj altepetl Quiryat-Jearim oajsitoj uan okiuikakej iArca Jehová uan okitlejkoltijkej ikalijtik Abinadab tlen okatka ipan tepetsintli. Uan okitlalijkej Eleazar ikone Abinadab makimalui iArca Jehová.
2 Opanok 20 xiuitl desde ijkuak Arca okiuikakej Quiryat-Jearim uan nochtin israelitas opejki kitemouaj Jehová para makinseli. 3 Samuel okinmilui nochtin israelitas: “Tla ika nochi namoyolo nankinekij nanmokopaskej inauak Jehová, xikmakakan Jehová ajsitok namoyolo, moneki san ye xiktekichiuilikan uan ayakmo xikinpiakan dioses tlen oksekan kinueyichiuaj nion imágenes de Astoret. Ijkon ye namechmakixtis inmak filisteos”. 4 Ijkuakon israelitas ayakmo okinpixkej Baales nion imágenes de Astoret uan opejki kiueyichiuaj san Jehová.
5 Ijkuakon Samuel okijto: “Ximonechikokan nochtin israelitas ompa Mizpá uan ne namopatka niktlatlaujtis Jehová”. 6 Ikinon omonechikojkej Mizpá, okikixtijkej atl uan okinokijkej* ixpan Jehová, non tonal amo otlakuajkej* uan okijtojkej: “Otitlajtlakolchijkej ixpan Jehová”. Ompa Mizpá, Samuel omochi injuez israelitas.
7 Filisteos okimatkej israelitas omonechikojkej Mizpá, ijkuakon akinmej okinnauatiayaj filisteos oyajkej para kinmiktiskiaj israelitas. Yejuan omomojtijkej ijkuak okimatkej. 8 Ikinon israelitas okiluijkej Samuel: “Ok xiktlajtlanilijto Jehová toDios matechpaleui uan matechmakixti inmak filisteos”. 9 Ijkuakon Samuel okonanki se ichkakonetl* uan okimakak Jehová ken tetliokolil tlen mochichinoua.* Samuel okitlatlaujti Jehová makinpaleui israelitas uan Jehová okinankili. 10 Filisteos omotokijkej para kinmixnamikiskiaj israelitas ijkuak Samuel okitemakatoka tetliokolil tlen mochichinoua. Non tonal Jehová okichi chikauak matlatijtikuini inpan filisteos, yejuan sapanoua omomojtijkej uan israelitas otlatlankej. 11 Ijkuakon tlakamej israelitas okiskej Mizpá, okinkuitlapantokakej uan okintlanilijtiajkej filisteos hasta ik isur Bet-Car. 12 Satepan Samuel okonanki se tetl,* okitlali itlajkotia Mizpá uan Jesaná, ompa okitokayoti Ebenézer* uan okijto: “Jehová hasta axkan techpaleuijtok”. 13 Ijkon israelitas opejki kinnauatiaj filisteos uan ayakmo okalakej intlal. Jehová amo okitekauili filisteos makinmixnamikikan israelitas ijkuak Samuel oyoltoka. 14 Israelitas oksepa okinmokauijkej altepemej uan tlalmej tlen filisteos okinkixtilijkaj, desde Ecrón hasta Gat.
Israelitas uan amorreos amitlaj okimotoktiayaj.*
15 Samuel okinmixkomakak israelitas ijkuak oyoltoka. 16 Sejse xiuitl ye oyaya altepetl Betel, Guilgal uan Mizpá, ompa okinmixkomakaya israelitas. 17 Satepan omokopaya ikalijtik tlen okatka Ramá kanin noijki okinmixkomakaya israelitas. Ompa Ramá okichiuili Jehová se altar.