Josué
7 Israelitas amo otetlakamatkej* ijkuak okinnauatijkej omonekiaya seki tlamantli kipojpoloskej. Porque Acán okimokaui itlaj tlen omonekiaya kipojpoloskej, ye okatka ikone* Carmí, ikone Zabdí, ikone Zérah tlen opouiaya itech itribu Judá. Ikinon israelitas sapanoua okikualanijkej Jehová.
2 Ijkuakon Josué okintitlanki sekimej tlakamej tlen okatkaj Jericó mayakan altepetl Hai, non altepetl okatka ik altepetl Bet-Aven uan altepetl Betel ik kanin kisa tonaltsin. Noijki okinmilui: “Xitlejkokan uan xiichtakatlachiatij itech non altepetl”. Ikinon tlakamej otlejkokej uan oichtakatlachiatoj Hai. 3 Ijkuak yejuan omokopatoj okiluijkej Josué: “Amo moneki tlejkoskej nochtin soldados porque amo miakej akinmej ompa chantij. San xikintitlani 2,000 noso 3,000 soldados para tikintlaniliskej akinmej chantij Hai”.
4 Otlejkokej san kanaj 3,000 soldados pero ijkuak tlakamej tlen okatkaj Hai okinnamikitoj, nonmej soldados ocholojkej. 5 Soldados tlen okatkaj Hai okinmiktijkej 36 soldados israelitas, okinkuitlapantokakej desde ipuerta non altepetl hasta Sebarim uan okinmiktijtiayaj ijkuak ocholouayaj. Ijkuakon nochtin israelitas omomojtijkej, inyolo opatik uan omochi ken yetoskia atl.
6 Ijkuak Josué ijkon okitak, okitsayanki itlaken uan omoixtlapacho tlalpan iyekapan iArca Jehová. Ye uan tlayekankej ijkon omokajkej hasta tiotlak uan okimotlaliliayaj tlikonextli* ipan intsonteko. 7 Josué okijto: “¡ToTeko Jehová tejuatsin tiUeyititok! ¿Tleka otechnejnemiti uan otikchi matikpanouikan aueyatl* Jordán? ¿Para tikinkauilis amorreos matechixpolokan? ¡Okachi kuali timokauaskiaj ik okse lado itempa aueyatl Jordán! 8 Israelitas okincholilijkej akinmej kinkokoliaj. Jehová techtlapojpolui porque amo nikmati tlen nikijtos. 9 ¿Uan axkan tlen kipanos motoka? Porque ijkuak cananeos uan akinmej nikan chantij kimatiskej tlen otechpanok techyaualoskej, techmiktiskej uan ayakmo ikaj techilnamikis”.
10 Jehová okilui Josué: “¡Ximoketsa! ¿Tleka otimoixtlapacho tlalpan? 11 Israelitas otlajtlakolchijkej uan amo okichijkej tlen okijtojkaj kichiuaskej. Okimokauijkej itlaj tlen omonekiaya kipojpoloskej, okichtekej uan okitlatijkej kanin kipiaj tlen inmiaxka. 12 Israelitas amo uelis kintlaniliskej akinmej kinkokoliaj. Yejuan kincholiliskej akinmej kinkokoliaj porque moneki kinpojpoloskej. Tla amo nankimiktiaj akin moneki mikis, ayakmo niyetos namouan. 13 ¡Ximoketsa, xikinyektlali israelitas! Ijkin xikinmilui: ‘Ximoyektlalikan para mostla porque nin tlen kijtoua Jehová, inDios israelitas: “Israelitas, ikaj tlen namouan kajki otlajtlakolchi ikinon moneki mikis. Tla amo nankimiktiaj, amo uelis nankintlaniliskej akinmej namechkokoliaj. 14 Moneki san kualkan* ajsitiuij sejse tribu. Itech nonmej tribus Jehová kipejpenas sejse familia. Itech nonmej familias Jehová kinpejpenas akinmej san sekan chantij. Uan akinmej san sekan chantij, Jehová kipejpenas se tlakatl. 15 Moneki kichichinoskej* akin okimokaui tlen omonekiaya kipojpoloskej uan nochi tlen iaxka, porque amo okitlakamatki* iacuerdo Jehová uan okichi itlaj tepinati itech altepetl Israel”’”.
16 Mostlatika Josué san kualkan omejki uan okinnotski nochtin intribus israelitas uan okipejpenki itribu Judá. 17 Satepan okinnotski familias tlen pouij itech itribu Judá uan okipejpenki infamilia zerahítas. Satepan okinnotski nochtin tlakamej tlen pouij itech infamilia zerahítas uan okipejpenki tlakatl Zabdí. 18 Saiktlami okinnotski nochtin tlakamej tlen ochantiayaj iuan Zabdí uan okipejpenki Acán ikone Carmí, ikone Zabdí, ikone Zérah tlen opouiaya itech itribu Judá. 19 Josué okilui Acán: “Nimitstlatlaujtia nokone, xiktlakaita Jehová, inDios israelitas uan ixpan xikijto tlen otikchi. Amo techkajkayaua, nimitstlatlaujtia techilui tlen otikchi”.
20 Ijkuakon Acán okinankili Josué: “Kema, ne onitlajtlakolchi ixpan toDios Jehová, inDios israelitas. Nin tlen onikchi, 21 kanin okatka tlen okachi kuali otiktlankej, onikitak se kuajkualtsin tlakemitl tlen okichijkej Sinar, kanaj ome kilo* plata uan oro tlen okatka etik kanaj tlajko kilo,* oniknek uan onikinuikak. Nochi non uan tomin oniktlalpacho itlampa nokaltsin* kanin nika”.
22 Josué san niman okintitlanki sekimej tlakamej matlachiatij ikaltsin, yejuan san niman ompa oajsitoj uan itlampa ikaltsin non tlakatl okajsikej tlakemitl uan tomin. 23 Yejuan okiuikilijkej Josué uan nochtin israelitas, nochi tlen okatka itlampa non kaltsintli uan okitlalijkej ixpan Jehová. 24 Josué uan nochtin israelitas okiuikakej Acán ikone Zérah ixtlauak* Acor. Noijki okiuikakej ikaltsin, plata, tlakemitl, oro, ikoneuan, itoro, iburro, ichkauan uan nochi tlen okipiaya. 25 Josué okilui: “¿Tleka otikchi matechtlajyouiltikan? Axkan Jehová te mitstlajyouiltis”. Satepan israelitas okimojmotlakej ika tetl* Acán iuan nochi ifamilia uan okinchichinojkej.* 26 Satepan ipan okitsonejkej tetl uan hasta axkan ijkon katej nonmej temej.* Ijkuakon Jehová ayakmo okualanki uan ompa okitokayotijkej ixtlauak Acor* uan hasta axkan ijkon itoka.