Jueces
11 Jefté akin galaadita okatka se soldado chikauak, imama okatka se siuatl tlen omonemakaya uan ipapa omotokayotiaya Galaad. 2 Ipapa noijki okinpixki oksekimej ikoneuan iuan isiua. Ijkuak yejuan omoskaltijkej, okikixtijkej Jefté uan okiluijkej: “Te okse momama ikinon amitlaj tikselis tlen iaxka topapa”. 3 Jefté okinkajtej ikniuan uan ochantito Tob. Noijki iuan oyajkej sekimej tlakamej tlen ayakmo okipiayaj inteki.
4 Satepan ammonitas opejki kinmixnamikij israelitas. 5 Ijkuak akinmej otlayekanayaj Galaad okitakej ammonitas okinmixnamikiayaj israelitas, oyajkej Tob para kiualikaskiaj Jefté. 6 Yejuan okiluijkej Jefté: “Touan xiuiki, tiknekij techyekana para tikinmixnamikiskej ammonitas”. 7 Pero Jefté okinnankili: “¿Amo namejuan akinmej onantechkokoliayaj uan onantechkixtijkej ikalijtik nopapa? Namejuan axkan nantechtemouaj porque nankinekij ikaj manamechpaleui”. 8 Akinmej otlayekanayaj Galaad okiluijkej Jefté: “Ikinon otimitstemokoj, tla te touan tiuits uan tikinmixnamikitij ammonitas, te tikinyekanas nochtin akinmej chantij Galaad”. 9 Jefté okinmilui: “Tla nantechuikaj manikinmixnamikiti ammonitas uan Jehová nechpaleuis manikintlanili, ne namechyekanas”. 10 Yejuan okiluijkej Jefté: “Jehová kikaktok tlen otikijtojkej uan matechixkomaka tla amo tikchiuaj tlen otikijto”. 11 Ijkuakon Jefté oyajki inuan akinmej otlayekanayaj Galaad uan akinmej ompa ochantiayaj okiluijkej makinyekana uan noijki makinyekana soldados. Ompa Mizpá, Jefté oksepa okijto ixpan Jehová nochi tlen yokijtojka.
12 Satepan Jefté okintitlanki sekimej tlakamej makiluitij intekiua ammonitas: “¿Itlaj onimitschiuili para techixnamiki nikan notlala?”. 13 Intekiua ammonitas okinnankili tlakamej tlen okintitlanki Jefté: “Ijkuak israelitas okiskej Egipto, okimokauijkej seki notlal desde Arnón hasta Jaboc uan noijki Jordán. Nikneki techkopili notlal uan ijkon timoyolseuijtoskej”. 14 Pero Jefté oksepa okintitlanki tlakamej makitatij akin okinnauatiaya ammonitas 15 para makiluitij:
“Nin tlen okijto Jefté: ‘Israelitas amo okimokauijkej intlal moabitas nion intlal ammonitas. 16 Ijkuak israelitas okiskej Egipto, onejnenkej ik kanin tlauaki hasta mar Rojo uan oajsitoj Cadés. 17 Ijkuakon israelitas okintitlankej sekimej tlakamej makiluitij akin otlanauatiaya Edom: “Timitstlatlaujtiaj, techkauili matikpanouikan motlal”. Pero akin otlanauatiaya Edom amo okinkauili. Noijki ijkon okiluijkej akin otlanauatiaya Moab pero noijki amo okinkauili mapanokan, ikinon israelitas omokajkej Cadés. 18 Ijkuak onejnenkej kanin tlauaki, san inakastlan okipanouijkej tlali tlen kajki Edom uan Moab. Yejuan onejnenkej ik kanin kisa tonaltsin ijkuak okipanouijkej tlali tlen kajki Moab, omokajkej Arnón uan amo okalakej itech tlali tlen kajki Moab porque intlal moabitas otlamiaya Arnón’”.
19 “‘Satepan israelitas okintitlankej sekimej tlakamej makitatij Sehón akin otlanauatiaya Hesbón para makiluikan: “Timitstlatlaujtiaj, techkauili matikpanouikan motlal para tiajsitiuij kanin tiauij”. 20 Pero Sehón amo okinkauili mapanokan israelitas porque amo okimatiaya kox neli tlen okijtouayaj. Ye okinnechiko isoldados, omokauatoj Jáhaz uan okinmixnamikitoj israelitas. 21 Ijkuak Jehová inDios israelitas okitak nochi non, okinmaktili Sehón uan nochi ialtepe inmak israelitas. Yejuan okintlanilijkej amorreos uan okimoaxkatijkej nochi intlal ik kanin okatkaj. 22 Ijkon okimoaxkatijkej intlal amorreos, desde Arnón hasta Jaboc uan desde kanin tlauaki hasta aueyatl* Jordán’”.
23 “‘Ye Jehová inDios israelitas akin okinkixti amorreos ixpan ialtepe. Axkan te tikneki tikinkixtis israelitas. 24 Akin namodios Kemós kikixtis, ¿namejuan noijki nankinkixtiskej? Tejuan noijki tikinkixtiskej akinmej Jehová toDios kijtos matikinkixtikan toixpan. 25 ¿Te okachi tiueyititok ken Balac ikone Zipor, akin otlanauatiaya Moab? ¿Ye omokualani inuan israelitas noso inuan omomijmikti? 26 Israelitas yikipia 300 xiuitl chantij Hesbón uan altepemej tlen ik ompa katej, noijki Aroer uan altepemej tlen ik ompa katej uan altepemej tlen katej itempa Arnón. ¿Tleka amo ijkuakon onanmochijchikajkej nankinmokauiskej nonmej altepemej? 27 Ne amitlaj onimitstokti* pero te amo kuali tlen techtoktia* porque techixnamiki. Jehová akin Juez, makinmixkomaka israelitas uan ammonitas’”.
28 Pero akin okinnauatiaya ammonitas amo okikak tlen Jefté otlanauati makiluitij.
29 Ijkuakon Jehová okimakak iespíritu Jefté uan ye okipanoui tlali tlen kajki Galaad uan tlali tlen iaxka itribu Manasés, para ajsiti Mizpé tlen kajki Galaad. Desde ompa opejki kinmixnamiki ammonitas.
30 Jefté okilui Jehová kichiuaskia nin tlamantli: “Tla tikchiuas manikintlanili* ammonitas, 31 Jehová, nimitsmaktilis akin achto kisas nokalijtik uan nechnamikiti ijkuak yonikintlanili ammonitas. Niktemakas ken tetliokolil tlen kichichinouaj”.*
32 Jefté okinmixnamikito ammonitas uan Jehová okinmaktili. 33 Jefté okinmiktijtia desde Aroer hasta Minit uan noijki Abel-Keramim. Ijkuakon ye sapanoua miakej okinmikti uan okinmoaxkati 20 altepemej. Ijkon israelitas opejki kinnauatiaj ammonitas.
34 Ijkuak Jefté omokopki ikalijtik ompa Mizpá, ¡ichpoch okiski ikalijtik uan ijkuak okinamikito, okitsilinijtiaya ipandereta uan omijtotijtiaya! San se ichpoch okipiaya, amo okipiaya nion se itelpoch nion okse ichpoch. 35 Ijkuak Jefté okitak ichpoch, okitsayanki itlaken uan okilui: “¡Nochpoch! Nimoyolkokoua miak, porque te uejka tias. Onikilui Jehová itlaj nikchiuas uan axkan moneki ijkon nikchiuas”.
36 Pero ye okilui: “Nopapa tla otikilui Jehová itlaj tikchiuas, xikchiua nouan ken yotikijto, porque Jehová yomitspaleui xikintlanili ammonitas akinmej mitskokoliaj”. 37 Noijki okilui: “San nikneki techkauili manio manichokati tepeyo ome metstli inuan noyolikniuan, porque amo keman nimonamiktis”.
38 Ipapa okilui: “Uelis tias”. Jefté okikauili ichpoch mauia ome metstli uan ye oyajki ochokato inuan iyolikniuan ompa tepeyo, porque amo keman monamiktiskia. 39 Ijkuak opanok ome metstli ye omokopki ikalijtik uan ipapa okichi tlen okijto kichiuaskia. Ichpoch Jefté amo keman omotekak iuan se tlakatl. Ijkuakon israelitas opejki ijkin kichiuaj: 40 sejse xiuitl ichpochmej israelitas oyayaj naui tonal kiyolchikauatiuij* ichpoch Jefté akin galaadita.